Read Tangkhul Naga WUNGVA̱-WUNGVĀ 3 Bible Online

WUNGVA̱-WUNGVĀ 3 - Tangkhul Naga bible

WUNGVA̱-WUNGVĀ 3

¹Chitharan Israelli khaleibing, Canaanli rai kasāwui raisak makathei Israelnaobingli chāng yangkhavai PROHOna taikahai yurbing chi hina;

²hi rida raili mavālakrang kaji Israelwui ara̱-azā rai sāthei khavai ana kasāna.

³Yurbing chiya: Philistinewui wungnao phangā, kala Canaanaobing saikora, kala Sidonbing, kala Baal-hermon Kaphung eina thuilaga Hamath zangkhavai vāshungda Lebanon Kaphungli khalei Hivnaobing hina.

⁴Avāva̱ ngarāli PROHOna kaso kahai, ana Mosesli hāngkhangasak chiwui athishurda Israelna sānikā masānikhala da chāng yangkhavaina.

⁵Chiwui vang Israelwui mibingna Canaannaobing, Hitnaobing, Amornaobing, Periznaobing, Hivnaobing, kala Jebusnaobingli pamrum kajina;

⁶kala athumna yur khangateibingwui nao ngalāva̱bing athumwui preiva̱ sākhavai vākhui, kala athumwui nao ngalāva̱bing athumwui naomayarabingli fachithota; kala athumna kateiwui varebingli otram ngatha̱ya.

⁷Kala Israelwui mibingna PROHOwui mangāli makhayā otsakmāng sai, athumwui PROHO Vareli malaihaida Baal eina Asherothli otram ngatha̱haowa.

⁸Chiwui vang PROHOwui malungkhavāt Israelli rāshunga, kala ana Mesopotamiawui awunga Cushan-rishathaimwui pāngli yorsangmihaowa; kala Israelwui mibingna Cushan-rishathaimli kum chishat otram ngatha̱mi.

⁹Kha Israelwui mibingna PROHOli khangakao eina, Israel mibingwui kankhame akha, Calebwui agato Kenazwui nao Othni-elli shokngasakta ana athumli kankhuiya.

¹⁰PROHOwui Manglāna awuitungli tāshungmida ana Israelli mungsai; kala ana thānda rai vai, kala PROHOna Mesopotamiawui awunga Cushan-rishanthaimli awui pāngli horsangmida ana yuihaowa.

¹¹Chiwui thili ngalei chi kum hangmati chingri eina leisai. Chiwui thili Kenazwui naomayara Othni-el thihaowa.

¹²Kala Israelwui mibingna PROHOwui mangāli makhayā otsak sāluishita; kala athumna makhayā otmāng kasāwui vang PROHOna Moabwui awunga Eglonli pangshap sangmida Israelli ngarar ngasaka.

¹³Ana Ammonnaobing kala Amaleknaobing kazipkhuilaga Israelli angararda yuihaowa; kala athumna yuihaida khaneirong keinung chi vākhuiya.

¹⁴Kala Israelwui mibingna Moab awunga Eglonli kum tharāda chishat otram ngatha̱ya.

¹⁵Kha Israelwui mibingna PROHOli khangakao eina, PROHOna athumli kankhame akha, Benjaminli khalei Gerawui naomayara Ehud kaho, uikathapa mi chili shokngasakta athumli kankhui.

¹⁶Kala Ehudna akhalattawui vang zankhangasunga, khuining akha kasānga raighai akha sākhui, kala yā-kashānli ngapilaga kachon eina farorhai.

¹⁷Kala ana Moabwui awunga Eglonli shai khuivāmi. Eglon hi mi kathaovana.

¹⁸Kala Ehudna shai chigat kahaiwui thili, ana shai phungkhara mibingli chihohaowa.

¹⁹Kha ana Gilgal ngalemli khalei ngalunggui shānkahai apam chili vāshunglaga hanunga, kala ana hānga, “O awunga ina nawui vang khangathuma pao akha khuiphungli” da hānga. Kala awungana awui mibingli, “Thuisālu” kaji eina athum thuiserhaowa.

²⁰Kala ana makuinen kahai mathāng atoli amāng pamda leilakha Ehudna kāda hānga, “Varewui eina pao akha ina nawui vang khuiphungli,” chieina ana awui pamwui eina ngakarthui.

²¹Kala Ehudna yāshong thāngkaphung raighai chi awui pāng uishong eina sutshokta awukli tosangmihaowa;

²²kala khaishāngla tophumshanhaida athaona khaila tumhaowa; ana raighai chi awui awukwui eina kasutla masutshokluimana, kha khamakhao shokrāsai.

²³Chiwui thili Ehudna ali khāmong taknarhailaga khanukshong eina yāmngathumshokhaowa.

²⁴Ana thuikahaiwui thili raobing karāsai, kala athumna ato khāmong tākhaikasā chi theilaga, “A khamakui kālungli ngasāmkhuida leili” da phaninga.

²⁵Kala athumna ngararailaga khisaunikhala da matheithuwa, kha ana khāmong masholak kaji eina, athumna sho chi khuilaga shoyanga; kala kākhayang eina chili athumwui awunga chonnartungli thihaisai.

²⁶Athumna ngarainganaoda leilakha Ehudva ngalunggui eina shānkakhui ama̱ chiwui eina Se-irahli yāmvāhairasai.

²⁷Ana ungshung khaleoda Ephraim kaphungramli talla̱ kākhonga; kala ana mangā thānda Israelwui mibing kaphungram chiwui eina tai.

²⁸Kala ana athumli hānga, “Ithi shurlu, kaja nathumwui yangkashe Moabnaobing hi PROHOna nathumwui pāngli horsangmihaira.” Chieina athumna awui thi shurda Moabnaobingna Jordan makān khavai apam chi akhui, kala mi akhala makān ngasakmana.

²⁹Kala athumna Moabnaobing, kapingabing, yāng kakābing, chithang thingtharā sha̱kha, akhala machakshok ngasakla shaothatserhaowa.

³⁰Chieina chithang Israelna Moabli yuihaowa. Kala ngalei chi kum hangchishat chingri eina leisai.

³¹Ehudwui thili Anathwui naomayara Shamgarna, ana seira̱kui eina Philistinenaobing shātharuk shaothata; kala anala Israelli kanshoka.