Read Tangkhul Naga WUNGVA̱-WUNGVĀ 5 Bible Online

WUNGVA̱-WUNGVĀ 5 - Tangkhul Naga bible

WUNGVA̱-WUNGVĀ 5

¹Chieina chithang Deborah eina Abino-amwui naomayara Barakna laa sai:

²Israelwui kathānabingna thānda, mibingna athum khalatta mathānthup eina chigata, PROHOli solu!

³Nganālu, O awungabing; nāshunglu, O wungnaobing; Ina PROHOli laa sāra; Israelwui PROHO Vareli, mayori kahai laa sāra.

⁴PROHO, nana Seirwui eina zatkaphok tharan, nana Edomshongwui eina kharā tharan okathui nganuka, kala kazing rotai, mah, muiyāwui eina zingrotla tai.

⁵ PROHOwui mangāli, phungreibing nganuka, Sinai kānvāda, Israelwui PROHO Varewui mangāli.

⁶Shamgar, Anathwui naomayarawui atamli, Jaelwui atamli, chānrei thingmihaida ramkazatabing shongchon shurzata.

⁷Israelwui kha̱pān-rampān shimānhairasai, Deborahna Israelli ava̱ thāda mathuimungranglakha.

⁸Khangatei varebing kapangkakhui tharan, raina ngavei pemhairasai. Israel thing hangmatiwui alungli chāngvei kazei khaleisāla?

⁹Mibingwui alungli mathānthup kachigat Israelwui kathānabingli iwui ningkashi! PROHOli solu!

¹⁰Hungrisi gadhā katongbingli, khamathā chonham[1] tungli kapambingli, phei eina kazatbingla, hāngmilu.

¹¹Laa kathemabingwuikhon [2] ra̱khongpamli, athumna PROHOna khayuiwui masot miluishita; khikha makhaning Israelna khayui laa sai. PROHOwui mibingna ngavei vāshungda zatvai.

¹²Thuilu, thuilu, Deborah! Thuilu, thuilu, laa thuisalu! Ngakarthuilu, O Abino-amwui naomayara, Barak, tukkhui kahai nawui mibingli thānthuiulu.

¹³Kapinga shākkahaibing china kaphung eina tai; kapanga athumli ngarar khavai PROHOwui mibingna awui vang rai.

¹⁴Ephraimwui eina athumna tampākshong vai, Benjamin nali kala nawui mibingwui thishurda, Machirwui eina raithānabingna tai, kala Zebulunwui eina otva̱bingwui khāmshui singmebing rai.

¹⁵Issacharwui wungnaobing Deborahli ngasovai; kala Issachar ningtongtingta Barakwui thi shura, athumna tampāk eina tangda ali shurvai, Reubenwui meiphungli ning sa̱ra̱-sa̱rāhaowa.

¹⁶Na khisāda yaobingli kahokhon nganānganaolaga nganongpamhao, yaobingli kahokhon shākhavaila? Reubenwui meiphungli ning sa̱ra̱-sa̱rāhaira,

¹⁷Gileadna Jordan makānvāda pama; kala Danna khisāda marikhongbingli pamkahai? Asherna shamadrupheili pamda yansāngsa̱ pāna.

¹⁸Zebulun athumwui mirin kashimānli makhangachee miyurna; Naphtalila rai khavā machihui!

¹⁹Awungabing rai, athumna ngararra; chiwui thili Canaanwui awungabingna ngararra, Taanachwui Megiddo tara̱pamli; athum lupāsā khikha mangaponkhuimana.

²⁰Kazingramwui eina sirāna ngararra, athumwui shongzatwui eina Siserali ngararra.

²¹Kishon kongwui tara̱na athumli kheithuihaowa, kapanga Kishon tara̱. Imanglā, pingda muivālu.

²²Yongtarak kazat eina siguiwui pheikhon, awui siguiwui yongkazat pheikhon panglāk eina shoka.

²³“Merozli khonshilu,” kala chiwui mibingli khonshilu da, “PROHOwui kazingraona hānga, khikhalajila athum PROHOli ngachonkida kharā maningmana, kapangali ngarar khavai kharā maningmana.”

²⁴Kenwui Heber preiva̱̱ Jael mahaimeikapranu, kachonshimli kapama sha̱nao saikorawui ngachaili.

²⁵Ana ali tara̱ poi, kha ana ali seina̱ mi, makhanla wungnao tengkot eina khuimi.

²⁶Ana pāngli kachonshimwui thingshun khamarik khui, kala awui yāpangna yāmkarnao singda; Siserawui kuili ngaphita, ana akui ngaphitkhaimi, awui najee ngarui-utmihaowa.

²⁷A pisanghaowa, awui[3] pheizingli tātunga. Awui pheizingli pisanga, saosanghaowa; ana pisang kahaipam chili thihaowa,

²⁸Charfanao sholaga ana yangshoka, Sisera shāva̱na: “Awui siguigari khisāda maunglak kajikhala?” “Khisāda hirankha jihaokhala?”

²⁹Awui thangmeimeikap kaje sha̱naobingna ali ngahānkai; kha a khalatta hānga,

³⁰“Athum ngaponkakhui ngayarnganao kahairala?— Raimi kachiva̱ ngalānao ava̱va̱, khaninirip samphanglapai; Sisera wui vang phorei phorkasang kachon, ikahungli neikhavai aphor kazang machu khamathā khani ngaponungki kajirala?”

³¹ “Chithāda nawui yangkashebing shimānserhaolu, O PROHO! Kha nawui ngasotnaobinga, athumna ngakarkathui eina zimik thāda malingmeira.” Kala ngalei chi kum hangmati chingri eina leisai.