Read Tangkhul Naga WUNGVA̱-WUNGVĀ 7 Bible Online

WUNGVA̱-WUNGVĀ 7 - Tangkhul Naga bible

WUNGVA̱-WUNGVĀ 7

¹Chiwui thili Jerubbaalna (chiya, Gideon) kala ali khangasobing saikorana ngathorthakva̱ thuida Harodwui ura̱wok ngalemli rairum asai; kala Midianaobingna athumwui atungshong, Moreh kaphung ngalem, tampāk chili rairum sai.

²PROHOna Gideonli hānga, “Midianaobing nathumwui pāngli horsangmi khavai nali ngasokazata mi hi iwui vang chungnāhaira, Israelna lāngsoda, ‘Ithumwui pangshap eina kankakhuina’ jipaishina.

³ Chieina saikorana shākhavai vaosanglu, ‘Khangacheena kakathirbing athumli shim hanunghaoranu.’” Kala Gideonna athumli chithāda tamkhayang eina thingmaga̱da khani latunghaida thingtharāmāng leisai.

⁴Kala PROHOna Gideonli hānga, “Aruila chungnāfaya; athumli tara̱pamli thanvālu, chili ina athumli nawui vang tamyangra; kala ina ‘Mi hi nali ngasovāra’ kajipa china nali ngasovāra; kala ‘Mi hi nali mangasovāmara’ kaje chi mangasovāmara.”

⁵Chiwui vang ana mibingli tara̱pamli thānzanga, kala PROHOna Gideonli hānga, “Fa thāda male eina tara̱ khamarop mi chi ngateida hailu, kala khuktizanglaga khamangbing chi ngateida hai jilu.”

⁶Kala pāng eina homkhuida khamang athum shākathumāng leisai; kha kateibing chiya maropkhamang mānga.

⁷Kala PROHOna Gideonli hānga, “Pāng eina homkhamang athum shākathum chi ina nali mida, ina Midianaobing chi nawui pāngli horsangmira; kala khangateibing chi kachichā ramli ungserhaoranu.”

⁸Chieina ana athumwui ham eina talla̱ chi khuilaga, shākathum chi maningla ana Israel katai katonga kachichāwui kachonshimli hanungngasakhaowa; kala Midianaobingwui rāmrah chi azingwui tampāk chili leisai.

⁹Chithang ngayā PROHOna ali hānga, “Ngakarthuida athumwui rairum takailu; kaja ina athumli nawui pāngli horsangmi kahaina.

¹⁰Kha rairum chili namāng matālengakha nawui rao Purahli ngasotālu;

¹¹kala athumna khangazek chi nana shālaga naoda nawui pangshap shokta athumwui rairumli akaishapra.” Chieina ana awui rao Purahli ngasoda rairum ayarli khalei raimi pamkhavai rairum tāyanga.

¹²Chili Midianaobing, Amaleknaobing kala zingshoshongwui mi saikora, khaoh thāda sorkhangasai leisai, utla shamadruwui situi ngayāda shānla makhuimana.

¹³Gideonna tākhayang eina, yanglu, mi akhana angasotali mang hāngsai; ana hithāda hānga, “Yanglu, ili mang akha shimana, kala yanglu, nāpai khamuitang akha Midianaobingwui rairumli shireotārāsai, kala kachonshimli khangatak eina shim chi phalatlaga ja̱khuphaowa.”

¹⁴Chieina awui ngasotana ngahānkai, “Chi Israelpa Joashwui nao, Gideonwui raighai maningla khangatei maningmana, Midianaobing kala rai ashangva̱ saikora hi Varena awui pāngli horsangmi kahaina.”

¹⁵Mang kahāng kala chiwui kakhalat kahāng shālaga Gideonna Vareli khoruma; kala Israelwui rairumli latungda hānga, “Ngakarthuilu; Midiawui rai ashangva̱ PROHOna nathumwui pāngli horsangmihaira.”

¹⁶Kala raimi shākathum chi ana akhum kathum khailaga mi kachiva̱li talla̱ akharip, kala tara̱ham khamasaili meilā sanglaga akharip misera.

¹⁷Kala ana athumli hānga, “Ili yanglu, laga chithada sālu; ina rairumwui ayarli rākahai tharan ina kasā chi tākam eina sāserlu.

¹⁸Ina kala ili khangasobing saikorana talla̱ ̱ kakhong eina, nathumla rairum chiwui eina khongserlu, kala, ‘PROHOwui vang, kala Gideonwui vang’ da vaolu.”

¹⁹Chieina Gideonli ngasoda athum shākha china ngayāsailung rairum ayārli vāda hāngkahai atam ungkhaleoda talla̱ khonglaga athumwui pāngli kasing ham chi shaokazama.

²⁰Chieina khum kathum china uishong kasing ham shaokhaikazamda meilā singripta yāshong eina talla̱ khonga, kala “PROHOwui vang, kala Gideonwui vang raighai” da vaosera.

²¹Athumna kuimareida kachichāwui pamli nganingsera, kha yangkashebing chi ngaunlop eina yāmserhaowa.

²²Athum shākathumna talla̱ kakhong eina, PROHOna raimibing chi akha eina akha ngashāt ngarok ngasakta yāmphokuwa, kala Zererahshong Beth-shittah tāshungda kala Tabbath ngalem Abel-meholah thari vāshungda yāmvāhaowa.

²³Kala Israelwui mibing, Naphtaliwui, Asherwui, Manassehwui raimi hokhuilaga athumna Midianaobingli kharomvai.

²⁴Kala Gideonna Ephraim kaphungramli khaleibing saikorali paomebing shivātta hānga, “Midianaobingli tāngararlu, kala athum mamakānshok khavai Jordan kala Beth-barah tāshungda kongrābing chi nganingphinhaolu.” Chithāda Ephraimwui raimi hokhuiserda athumna Beth-bara tāshungda kala Jordan zangda nganingphinhaowa.

²⁵Kala athumna Midianaobingli kharomvāda athumwui wungnao khani, Oreb eina Zeebli tukkhui; athumna Orebli Orebwui lunghār chili shaothathaowa, kala Zeebli athumna Zeebwui drakhāra̱ surkhavai chili shaothathaowa. Kala aniwui kui Jordan kong kānda Gideonli khuiungmi.