Read Tangkhul Naga WUNGVA̱-WUNGVĀ 8 Bible Online

WUNGVA̱-WUNGVĀ 8 - Tangkhul Naga bible

WUNGVA̱-WUNGVĀ 8

¹Kala Ephraimwui mibingna ali, “Midianaobingli nathumna ngarar khavai khavā tharan, kachiwui vang eina ithumli mahothukhala?” da Gideonli malungvātsir eina hānga.

²Kha ana athumli hānga, “Nathumli ngaheolaga ina ara khi sāhaira? Abizerbingna drakhāthei pangda hātkakhuile Ephraimwui drakhāthei athamna maphāmeimala?

³Varena nathumwui pāngli Midiawui wungnao Oreb eina Zeebli horsangmihaira; chili ngaheolaga ina nathumli khi phāmeida sāshapkhala?” da hānga. Ana chi kahāng eina athumwui malungkhavāt suitāhaowa.

⁴Kala Gideonna Jordanli vāshunga, ali ngasoda mi shākathum china vānhailala kala thailala kong makāna.

⁵Chieina ana Succothwui mili hānga, “Midiawui awunga khani Zebah eina Zalmunnali kharomkazatna, iwui thi kashurbing kathaina vānhaira, khamuishom khamilu” da poi.

⁶Kala Succothwui otva̱bingna, “Zebah eina Zalmunna hi napāngli leihaida chieina nawui raimibingli khamizālu kajila?” da hānghaowa.

⁷Chieina Gideonna hānga, “Chithakha phai, Zebah eina Zalmunnali PROHOna iwui pāngli horsangkhami tharan, nathumwui phasāli ina lamhāngwui ka̱shāt, kala lenghui eina ngapora.”

⁸Kala ana chiwui eina Penuelli shanga, kala kharewui tākam eina ahānga; kha Succothna kahāng thāda athumnala ngahānkāhaowa.

⁹Ana Penuelwui mibingli hānga, “Ina yuihaida chingri eina latkhaung tharan, dolan hi ina sakhaira.”

¹⁰Chitharan Zebah eina Zalmunna raimibingli thānlaga Karkorli leisai, zingshoshongwui raimi thing tharāda phangā shākhamāng leisai, kaja raighai kasing raimi lakh akha thing maga̱ shaothathairasai.

¹¹Kala Gideonna, Nobah eina Jogbehahwui zingshoshong khalei ut shongfa eina vālaga raimi chili angarara; atam chili raimiwui raikān maleisāmana.

¹²Kala Zebah eina Zalmunna yāmhaida ana vākharomkhui, kala Midiawui awunga khani, Zebah eina Zalmunnali tukkhui kahai eina ashi raimibing ngacheenahaida ning maphākhuithuwa.

¹³Chiwui thili Joashwui nao Gideonna Hereswui shongshanshong eina latunghaowa.

¹⁴Kala ana Succothwui yaronnao akha tukkhuida khangahān eina, ana Succothwui otva̱bing, ararbing, mi hangshinida shiniwui ming kapimi.

¹⁵Kala ana Succothwui mibingli samphangda, “Yanglu Zebah eina Zalmunnali mayuithukmara da ili zeida, ‘Zebah eina Zalmunnali yuihaida vānkahaia nawui mibingli mizālu kajila?’ da kahāngabing, ara nathum theilu” da hānga.

¹⁶Kala ana keinungwui ararbing tukkhuilaga lamhāngwui ka̱shāt kala lenghui eina tandi miya.

¹⁷Kala ana Penuelwui dolanla shaokhaimihaida keinungwui mila shaothathaowa.

¹⁸Kala ana Zebah eina Zalmunnali hānga, “Taborli nanina shaokathatbing chi azak kathākhala?” Anina ngahānkai, “Nathum thāsera, awunga akhawui nao thāda ngaraichasera.”

¹⁹Kala ana hānga, “PROHOwui ming singda kahāngna, athum, ishāvāna kapharā ichināngarāna; nanina athumli mashaothathaisāsi kaja, ina nanilila mashaothatmara.”

²⁰Kala ana awui naochizai Jetherli, “Ngakarthuida anili shaothathaolu” da kasoi. Kha nao china nganuināhaoda ngachee haowa, kala awui raighai masutlengthuwa.

²¹Chieina Zebah kala Zalmunnana hānga, “Ngakarthuida nakhalattana sāthatlu, kaja mayarnao akhana awui pangshap athishurda saki kajina.” Chieina Gideonna ngakarthuida Zebah eina Zalmunnali shaothathaowa, kala ana aniwui utli ngachākhami chā chi khui.

²²Chiwui thili Israelwui mibingna Gideonli hānga, “Midiawui pāng eina nana ithumli kankhuikhamiwui vang ara nana munglu, kala nawui thili nanao ngarāna kala nara̱ ngarāna mungchinglu.”

²³Gideonna athumli hānga, “Ina nathumli mamungmara, inaonala mamungmara, kha PROHOna nathumwuitungli mungra.”

²⁴Kala Gideonna athumli hānga, “Ina nathumwui eina akha poka, kachichāna ngaponkakhui unra̱ ili miserlu.” (kaja athum Ishmaelnaobing sāthuda athum sinā unra̱ ngathetsera).

²⁵Kala athumna mathānthathup eina, “Ithumna mingailak eina mira” da ngahānkai. Kala kachon hamhailaga athum kachichāwui unra̱ horsangmiserhaowa.

²⁶Kala ana pokakhui unra̱ saikora chi kaziplaga sinā chiwui kharit shekel thingkha shāshini shoka; chili lāngda chā, huishon, kala Midiawui wungnaona khangavai khamenga kachon, utbingli ngachākhami chā, kachungkha hi mashānarmana.

²⁷Chieina Gideonna ephod akha sākhuilaga awui keinung Ophrahli haihai; kha Israel saikorana khayorva̱wui otsak sāda Gideonli kala awui shimkhurwui vang china phei ngaphok khavai sāthuihaowa.

²⁸Chithāda sāda Israel mibingwui mangāli Midianaobing maikashi samphangda mangakarthukluithuwa. Chiwui vang Gideonwui atamli ngalei chi kum hangmati chingri eina okthuisai.

²⁹Joashwui naomayara Jerubbaalna ungda akhalattawui shimli ungpamhaowa.

³⁰Gideonna ngalā kachungkha khuida akhalattawui naothei, mayarnaomang hangshini leisai.

³¹Kala angashirva Shechemli kapampāva̱nala naomayara akha pharāda ali Abimelech hoi.

³²Kala Joashwui naomayara Gideon, sarlak eina thihaowa, kala avāva̱wui chikhur, Abiezwui Ophrahli chifahaowa.

³³Gideon thihaikhaleoda Israelwui mibingna Baal varebingwui thili khayorva̱wui otsak sathuihaowa, kala Baal-berith hi athumwui varena da khui.

³⁴Kala apam kachiva̱li khalei yangkashibing saikorawui eina athumwui PROHO Varena athumli kankhami chi Israelnaobingna malaihaowa;

³⁵kala athumna Jerubbaalna (chiya Gideon) Israelnaobingli kapha sāmi kahai saikora chiwui vang, athumna ningkashi khikha machitheilakthuwa.