Read Tangkhul Naga 2 JOHN 1 Bible Online

2 JOHN 1 - Tangkhul Naga bible

2 JOHN 1

¹ Ararra imāng maningla khamashung theikahaia saikorana leishikachangkhat kaje kapangkhui kahaia achon kala awui nao ngangarāli kagapina;

²kaja khamashung chi ithumli lei kala katang mavaila leichingra.

³Avāva̱ Varivara kala Avāva̱wui naomayara Jishu Khristawui eina kharā lukhamashan, phaningkhami kala chingri kahai china ithumli khamashung kala leikashi eina ngasomira.

⁴Avāva̱na ithumli kakaso athishurda nanao ngarā kaikhana khamashung eina okathuili kaji shālaga ringphālaka.

⁵ Chiwui vang eina achon, ithum akha eina akha leishi ngaroksa. Hi ningkhami kadhar maningmana, kha haokaphokwui eina samphang kahai leishi ngaroklu kaji chipapama.

⁶ Ina hāngda khalei leikashi hiwui kakhalatva Varewui kakaso nganāda okthuisa kajina. Haokaphokwui eina nathumna shākahai ningkhami chi hina, nathum leikashi eina okthuilu.

⁷ Jishu Khristana mikumo thada rai kaji makhuikasang mi kachungkha okathuili leihaira. Hikathā mi hi mashongachei khangasak Khristali Makhamayāna.

⁸Ithumna nathumwui vang sāmi kahai chi mashimān khavai, kha nathumwui sāman pongzongri eina samphang khavai hikathā mibingli ningngasharlu.

⁹Khristawui tamkachithei mamayonla, kānda sākazat mi chi Varewuili maleimana. Kha Khristawui tamkachithei khamayona mi china Avāva̱lila, Anaolila lei.

¹⁰Chieina kachikathā mina hikathā mashun pheisin matamchitheiakha, chikathā mili shimlila, mazang ngasakalu kala shālamtuila mahāngalu.

¹¹Kaja chikathā mili shālamtui kahāng mi chi awui makaphā otsakli khangarumna.

¹² Ina hāngkhangai kachungkha lei, kha chithi eina machiphunngaimana; I phasā rāchaolaga ngazek ngarokakha ithumwui khamathān kāshungmeira.

¹³Nawui leikashiva̱ nachināva̱wui nao ngarābingna shālam chiphunli.