Read Tangkhul Naga 3 JOHN 1 Bible Online

3 JOHN 1 - Tangkhul Naga bible

3 JOHN 1

¹ Ararra ina kachangkhat leikashe Gaiusli kagapina.

²Leikashe ngasotnao, ot saikora tāchamhai khavai kala makhanang-makazā khavai ina seihā sali. Chieina ngasoda Manglāwui pongli na ringphāchinga kaji ina thei.

³Nana mashun eina okthuiching kaji thada khamashungwui pongli nana kayākha ningtongkhala kaji avānao kaikhana rakahāng shālaga ringkaphā khi hāngra!

⁴Inaongarā khamashung eina okthuida lei kaji paoli lāngmeida ringphākhamei maleiluimana.

⁵Leikashe ngasotnao, achinā kaikha kha̱mi sāsālala ningtonglak eina nana otram ngatha̱mi.

⁶Nawui leikashi kachitheiwui pongli athumna church hili unghānghaira. Varewui ningyāng ungkapai, apongli ot sāda athum kha̱ram zatpaimei khavai ngachonmilu.

⁷Khristawui otram ngatha̱ khavai mashitkasangbingwui eina khikha makhuilakla athum zatthui kahaina.

⁸Athumna khamashungwui ot kasā chili ithumwui yarla zangkhavai chikathā mibingli ithumnala ngachonngayiya.

⁹Ina churchli chithinao akha kapiya, kha athumwui kathāna sākhangai Diotrephesna ina kahāngli khikha machāpmilakmana.

¹⁰I kharā tharan ana sākahai saikora rāhāngsera: ithumwuitungli mahāngkhaleng tui kahāng, awui kakapik-kakhayāng chi rāhāngsera, kha awui vang china mashapmana; ana avānaobingli marā ngasakmana, rākhangaibinglila ana khāma kala churchwui einala ana kasham khavai sai.

¹¹Leikashe ngasotnao, makaphā masha̱alu, kha kaphā sha̱khuilu. Kaphā kasā chi Varewuina, kha makaphā ot kasāpā chi Vareli matheimana.

¹² Mi kachiva̱na Demetriusli sosera, mashun khalattanala chiwui shākhina. Ithumla chiwui shākhina kala ithumwui shākhi mashunga da nathumna thei.

¹³ Ina nali hāngkhavai tārakha lei, kha chithi eina makapingaimana.

¹⁴Thakta rāsamphang khavai chihānda lei, chitharan mashā eina ngazeknaosa.

¹⁵Chingrihairanu. Nawui ngasotnaobing saikorana shālam chiphunli. Ngasotnao saikorali namashā eina shālam tui kahāngmihailu.