Read Tangkhul Naga JUDE 1 Bible Online

JUDE 1 - Tangkhul Naga bible

JUDE 1

¹Jameswui agato kala Jishu Khristawui otram khangatha̱a Judena, Jishu Khristana ngākkhami kala Avāva̱ Varewui leikashilungli kharinga Varena hokhui kahaibingli kagapina.

²Phaningkhami, chingri kahai kala leikashi chi nathumli mataisangmiranu.

³Leikashebing, ithumna samphangrumda khalei huikhamiwui pongli kapingailakhaoda, katharabingli metkhakashi eina vaikahai shitkasang chiwui vang ngarar khavai nathumli kapo hi darkar salakhaowa.

⁴ Ithumwui Akhavā Proho Jishu Khristali makhamayā kala athumwui morei thumkhavai Varewui lukhamashan otli nguida tamkachithei ithumwui alungli rāngathizanghaira. Athumwui khayon otsak hi achālakha kathara tuili kapihaisai.

⁵Hiwui pongli nathumna theida lei jilala Israelnaobingli Prohona Egyptwui eina kathada thānshokmi, kala naoda mashitkasangbingli kathada shimān ngasakhao kajiwui pongli ina nathumli phaningung ngasakli.

⁶Kazingraobingna athumwui pangshap chi shichinnguihaida athumwui pam chiho kahaiwui vang, khanaowa zimiksho chi marāranglakha eina tangda Varena katang makhavai marikhānghui eina khalaplaga tangkhamangli haira, chi phaningung ngasakngai.

⁷ Sodom eina Gomorrah kala chiwui luinganaili khaleibing athumna chikathā kazingraobingwui thada kasā, khamathang-khamarang kala makaphā-makhayā otmāng kasāwui vang makhamit meiwui tandi samphangra da saikorali theikhangasak hi phaningunglu.

⁸Chi tākam eina mibing hinala athumwui phasāli khalatta morei sākhavaimāng chukmaja̱ya; Varewui pangshaplila athumna ningkachai kala atungshongwui tekhamatei chili machāpmimana.

⁹ Kathāna kazingrao Michael eina tangda chithada masāmana. Moseswui phasā khipāna khuirakhala da khangaphat tharan Michaelna chipeeli kazei tui eina makaharmana; kha hithada hānga, “Prohona nali hāngmachinra.”

¹⁰Kha mibing hina athumna bhap makatā otlila zeiphāphai; kala sāyur thada athumna ningli kaza̱za̱ china athumli shimān ngasaka,

¹¹ kayākha khangachee-khangacha otkhala! Athum Cainwui athi shura; thada tongzā khavai vang khayon otmāng sai, kala Korahna khangashao thada, athumlila khangashaona shimān ngasakra.

¹²Athumwui khamarip china ngarumsakwui morsonli nathumli maishi ngasakta hamak neokhami kathāna. Athumna athum khalattawui vangmāng phaninga. Athum chi zingrot makazang muiyā masina phankazat kathāna. Athum chi māthei kachāng eina tangda athei makhamathei kala angayung phurshoklaga thichao kahai thingrong kathāna.

¹³Athuma shamadruwui sākashe ra̱ngaphao thada athumwui khayākhamala otsak chi amalao kashok thada phongshoka. Athum hi sirāpai kathāna, athumwui vang Varena makashimān tangkhamang chi ngarānmihaida lei.

¹⁴Adamwui naothot kashine Enochna athumwui pongli rida marānhaikasā chiya: “Yanglu, Prohona, kathara kazingrao thingthingli ngasoda rāra.”

¹⁵Kala varebingli kaphaningabing, Vareli ngakaikashe, morei kasābingna makaphā-makhayā kaphentui khamatui saikorawui vang bichar sāda khayon mira.

¹⁶Mibing hina chānkhalop eina kateili phenphāphai, kachorkashe, malungkachāng, katho-kachir makhavai kala tongzā khavai mili sotkhamasaoli akachanga sai.

¹⁷Ivānaobing, Proho Jishu Khristawui paokazatbingna rida hāngkahai chi phaningunglu.

¹⁸Athumna, “Khangachang atamli makaphā otli kazata athum china nathumli mana̱shinganaora” da hānghai.

¹⁹Hikathā mibing hiya phasāwui otli ningkachāngna pemkahaiya kala tui kakaili akachanga kasā mibingna. Athumwuili Manglāwui otsak maleimana.

²⁰Kha leikashebing, nathumwui kathara shitkasang chi reisang khavai sālu, kala Manglā Katharawui pangshap eina ngasoda seihā sālu.

²¹Proho Jishu Khristawui phaningkhami chiwui mangā eina makashimān mirin miki kaji chi ngaraimamānda Varewui leikashilungli leichinglu.

²²Ningmaongda khaleibingli theishingkhui ngasaklu.

²³ Meifawui eina shimenshokmida kanmilu. Mi kaikhali, moreiwui khamathang china makhao ngasak kahai kashankachon chili yangkharinglala, athum shimānhaipainada malungkharingwui phaningkhami chitheilu.

²⁴Ara kongluipaishinada mayonkhame, tekhamateiwui mangāli chukhara̱ maleila mathānthathup eina thānzangkhame,

²⁵kala Proho Jishu Khristawui mangā eina ithumwui Huikhame Vare chili tekhamatei khangam-kharei, khamashung kala sāshap pangshap saikora thot kachida, aruila naodala mashimānda awui sachingrānu. Amen.