Read Tangkhul Naga PHONGKHAMI 1 Bible Online

PHONGKHAMI 1 - Tangkhul Naga bible

PHONGKHAMI 1

¹Thākta rāshokphalungki kaji, awui raobingli chithei khavai Varena ali khami Jishu Khristawui phongkhami; hi ana awui kazingrao chihoda awui rao John,

²Varewui tui kala Jishu Khristawui vang kala ana kathathei saikora shākhi sakhame Johnli chitheimi.

³Phongkhami tuibing hi kapā mi, kala kashābing kala hiwui alungli kapi kahai otbing khuikasangbing ka̱lā mahairanu! Kaja atam chi nganaihaira.

⁴ Asiali khalei Church shinili Johnna kagapina: Aruila, achāla, kala naodala chiching kaje, kala wungpamkhong mangāli khalei Manglā shini chiwui eina,

⁵ kala ningtongda shākhi sākhame Jishu Khrista, kathiwui eina pharākhare kala okathuili awungabingli khamungawui eina lukhamashan kala chingri kahai ngasāranu. Ana ithumli leishi kala awui thikhamiwui pha̱kaphayā eina ana ithumli moreiwui eina ningkhān ngasakhaira.

⁶ Kala Vare, Avāva̱li otram ngatha̱ khavai ithumli pāngmonwui wungram sāmihaira. Jishu Khristali mashimānda tekhamatei kala pangshap ngasāranu. Amen.

⁷ Yanglu, ana muiyā tongda rārāli, mi kachiva̱na ali theira; ali kharungbingla theira; kala awui vang okathui miyur saikorana chapngachāra. Chitharanu, Amen.

⁸ Proho Vare aruila, ridala, naodala pangshap sāshapana, “I Alpha eina Omegana” da hānga.

⁹I nathumwui achinā Johnna, kala Jishuwui thikashura akha sāda, awui wungramwui mi ngasā kahaibingwuitungli kharā kakhanang kachot chi khāngda nathumli phungruma. Varewui tui kala Jishuna phongkhami mashuntui shākhiwui vang I Patmos kaho yikuiramli leisai.

¹⁰Prohowui zimiksholi I Manglā eina leisai, kala talla̱khon thada chuilak kahai akhon akhana ikhanukshong khamatui shai.

¹¹Kala china hānga, “Nana kathei chi kapikhuilu kala lairik chi church shini hili chihovālu; chiya, Ephesus, Smyrna, Pergamum, Thyatira, Sardis, Philadelphia, kala Laodicea.”

¹²Ili khangazeka akhon chi khipākhala da yangkhui khavai ngareikhaung eina sinā thaomeishong shini thei;

¹³ Thaomeishong chiwui ngachaili miwui naomayara thada, kachon akha phei tumda khangava, kala sināwui shānneira̱ eina mathikli neikahai akha thei.

¹⁴Akui kala kuisam sahā thada kala horam thada charshihai, kala amik meiwon thai,

¹⁵ aphei meili ruimaling kahai pithrai thai; kala akhon kong kathui thai.

¹⁶ Awui yāpāngli sirā shini singa; kala akhamorli zankhangasunga kazana raikhai akha shoka. Awui mai zimik malingting kahaiwui kahor thai.

¹⁷ Ali theilaga I kathi thada awui pheizingli pizanghaowa. Kha awui yāpāng ili parza̱da hānga, “Mangacheealu! I khare eina khanaowana,

¹⁸kala kharing chi Ina; I thihailaga, yanglu ara mashimānda ringdalei kala Kathi eina Kazeiramwui pangshap lei.

¹⁹Chiwui vang eina nana theikahai, theida khalei kala naoda rākikaji otbing chi kapikhuilu.

²⁰Iwui yāpāngli nana sirā shini kathei, kala sināwui thaomeishong shini chiwui khangathum kakhalat chi hina; sirā shini chi church shiniwui kazingraobingna, kala thaomei shini chi Church shini china.