Read Tangkhul Naga PHONGKHAMI 10 Bible Online

PHONGKHAMI 10 - Tangkhul Naga bible

PHONGKHAMI 10

¹Chiwui thili pangshap khalei kazingrao akha kazingram eina katā ina thei. Muiya eina romma, akuili changjeengawuta; amai zimik thada horra kala aphei meiwui pakra̱ thai.

²Apāngli lairik akhaluinao akha hārlaga singa. Awui yāphei shamadrutungli nai, wuiphei ngaleili nai.

³Chiwui thili kazingkha̱ kakhangang thada panglāk eina vaowa; ana khavao eina kazing khangashum shini china matuishoka.

⁴Kazing khangashumna hāngkhaleoda, ina kapikida sai. Kha kazingramwui eina akhon akha hithada hāngkharā ina shai, “Kazing khangashum shinina kahāng chi thumtithaisālu, makapikhuialu.”

⁵ Chiwui thili shamadru eina ngaleitungli khanganinga kazingrao china yāpāng katingkāda,

⁶okathuila, kazingla, shamadrula, kala chibingwui alungli khalei saikora kasaa kala mashimānda ringching kaje chiwui ming singda ina katheiya kazingrao china “Atam maleiluimana” da shākhi kasā thei.

⁷Kha kashine kazingraona talla̱ kakhong eina, Varena awui raobing kala paokazatbingli chithei kahai athishurda awui ngathum kahai angarān chi ungshung ngasaka.

⁸Chiwui thili ina kazingramwui eina kashākhon china ili hāngluishit kaji ina shai, “Shamadru eina ngaleitungli nganingda khalei kazingraowui pāngli hārkahai lairik chi akhuilu.”

⁹ Chieina lairik akhaluinao chi ili mikhavai kazingrao chili apoi. Ana ili hānga, “Hi khuilaga shailu; hina nawukli khāshihaira, kha nakhamorli khuira̱ thada shimshira.”

¹⁰Kazingrao chiwui pāng eina lairiknao chi khuilaga ina shaitāhaowa, kala ikhamorli khuira̱ thada shimshuna, kha shaikatā eina wuklungli khāshihaowa.

¹¹ Chiwui thili ili hānga, “Ngalei kachungkhawui, miyur kachungkhawui, tuiyur kachungkhawui kala awunga kachungkhawui maramli Varewui pao nana marānmiphalungra.”