Read Tangkhul Naga PHONGKHAMI 13 Bible Online

PHONGKHAMI 13 - Tangkhul Naga bible

PHONGKHAMI 13

¹ Chiwui thili shamadruwui eina sāyur akha kashok ina thei. Awuili angachee tharā kala akui shini kai. Angachee ava̱va̱li kuihon ava̱va̱ kala akui ava̱va̱li Vareli zeikakharui aming kapihai.

²Ina kathei sāyur chi kuirāng thai, phei singom thai, akhamor kazingkha̱ thai. Dragon china awui pangshap, awui wungpamkhong kala awui khamungsin sā chili mi.

³Akui akhava thikapai khamā za̱kahai thai, kha khamāva raihairasai. Matakhakhaida okathui katongana sāyur chili shurzata.

⁴Mibingna dragon chili khoruma, kaja ana awui pangshap chi sāyur chili mihaowa. Sāyur chilila khorumda hānga, “Sāyur hikathā khipā leikhala, ali ngararshapa khipā leikhala?”

⁵ Langsolak eina Vareli zeikakharui kala kachipat tui matui khavai khamor mi, kala kachāng hangmatida khani mungkhavai pangshap mi.

⁶Ana khamor makāda Vareli kachipat tui matui; awui ming kala kazingramli pamda khaleibingli mashāta.

⁷ Varewui mibingli rai ngararda yuikhavaila mayāmi, kala yur jat kala tuiyur kachiva̱wuitungli mungkhavai pangshapla mi.

⁸Okathui masāranglakha shaothat kahaia Yaonaowui kharinga lairikli kapisang kahaibing chi maningla okathui katongana ali khorumra.

⁹ Khanā kakaa china nganākhuiranu:

¹⁰ Tukhuiki kaje chili tukhuiphalungra. Raighai eina shātthatphalungki kaje chili mashoila raighai chieina shātthatphalungra. Hili ja̱mikatha kala ningkatonga Varewui mibingwui ot lei.

¹¹Chiwui thili ngalei eina kashok sāyur akha theilui; yao thada angachee khani kai, kha dragon thada matui.

¹²Ana sāyur kharewui pangshap saikora chi shichina, kala okathuila chili khalei saikorala akuiwui khamā raikahai sāyur khare chili khorum khavai tandi sai.

¹³Ana matakhak kahai ot kachungkha sai; mi saikorawui mangāli kazingramwui eina okathuili mei tāngasaka.

¹⁴Ali sāyur khare chiwui mangāli matakkhak kahai ot sākhangasak chiwui mangā eina ana okathuili minamda, akui khamā za̱laga raikahaiya sāyur chiwui meoma̱ sākhui ngasaka.

¹⁵ Kala ana sā chiwui ama̱ chili khak suikhavai pangshap sangmida matui ngasaka kala ama̱ chili makhokharumbingli thingasaka.

¹⁶Chili lāngda machutkhui khavai ana kateola, khareila, kachāmala, kashāngala, raola, shimva̱la yāpāngli maningakha khaveili machut sāsang khavai tandi sai.

¹⁷Machut kaja sāyur chiwui aming maningakha sāyur chiwui amingwui mashing makakāpa chi ot khayorla mayorpai, khalola malopaimana.

¹⁸Hi thangmeiwui tuina; theishingkakhui khalei mi china sā chiwui number chi ngachākkhuiranu, kaja hi mi akhawui mashingna, awui mashing hi shātharuk hangtharukta tharukna.