Read Tangkhul Naga PHONGKHAMI 17 Bible Online

PHONGKHAMI 17 - Tangkhul Naga bible

PHONGKHAMI 17

¹ Chiwui thili tengkot shini kasing kazingrao shiniwui ngachaili akhana ili rāhānga, “Rālu, khamahova̱ pha̱khayorva̱̱, tara̱tungli chipam kahaiva̱wuitungli bichar kasā ina chitheira.

² Okathui awungabingna ali ngashāma, kala okathuiwui mibingna awui shāmsak zam eina maripa.”

³Manglā eina ana ili lamhāng akhali thānvai, kala chili sha̱nao akha hungping kahai sāyur akha tongda thei; sāyur chiwuitungli zeikakharui ming tarākha kapihai. Sāyur chi akui shini angachee tharā kai.

⁴ Sha̱naopava̱ chiya hungrisi eina hungping kahai sāri ngavai, sinā, khayingmukta kala amankasaka ngalung eina thāngpeohai. Apāngli shamkasāwui kala ningkakachaina pemting kahai sinā tengkot akha singa,

⁵akhaveili ngathum kahai kakhalat khalei aming hithada kapihai: “Khareia Babylon, pha̱khayorva̱̱bing kala okathuiwui ningkakachaiwui ava̱va̱”,

⁶sha̱naopava̱ chi kathara mibingwui ashee kala Jishuwui vang khamashung khangarong eina thimi kahaibingwui ashee mangda mariprei eina khalei ina thei. Ina ali kathei tharan I matakhakhaowa.

⁷Kha kazingrao china hānga, “Khisāda matakhakhaikhala? Sha̱nao kala ali phungkazata akui shini, angachee thara kakā sāyur chiwui ngathum kahai pongli ina hāngmira.

⁸ Nana kathei sāyur chi rida ringsai, kha ara maringluimana, ana katang makhalei leizingkhurwui eina shokra kala kashimānli azangra. Okathui haokaphok eina thuilaga kharingawui lairikli aming makapi kahaibingna sāyur chili theilaga matakhakhaira, kaja akhashida ringlaga, maringlui, laga rāchitheiluishitki kajiwui vangna.

⁹“Hi thangkhamei kala theishingkakhui khaleiwui tuina. Akui shini chi sha̱naopāva̱na pamkhavai kaphung shini china,

¹⁰athum chi wungnao shinina, phangāva kongluihaira, akhana mungda lei, akhava marārangli, kha ana rālala kasha̱khawui vang māngmara.

¹¹Rida ringkasā, ara maleilui kaje chi kachishatana, kha shiniwui ngachaili akhana, kala ana kashimānli azangra.

¹² “Nana kathei angachee tharā hiya wungnao pangshap masamphangrang kaje awunga tharāna, kha athumna pung akhawui vang sāyur chili ngasoda mungkhavai pangshap samphangra!

¹³Athumwui ningrin ngaraichāhaoda athumwui pangshap sāyur chili mi.

¹⁴ Athumna Yaonaoli rai ngararra, kha Yaonao china ana hokhui kahaibing kapangkakhuibing kala ningtongda kashurabingli ngasoda athumli maikashi mira, khikhalajila a prohobingwui Proho, awungabingwui Awungana.”

¹⁵Kazingraona ili hānga “Pha̱khayorva̱̱na kapama tara̱ nana kathei chi mibing, yarui, miyur kala tuiyurbingna.

¹⁶Kala nana kathei angachee tharā kala sāyur china khayorva̱̱ chili ningkachaira; kala ali horhailaga awui kashankachon raimihaida khamahong eina haira, awui asāla shaira kala mei eina riktāra

¹⁷Khikhalajila Varena awui sāki kaji ot wungshung khavai athumwui ningli sangmihaira, kaja Varena hāngtā kahai maungshungranglakha eina tangda, athum khokkha sāda sāyur chiwuitungli pangshap horsangmira.

¹⁸“Nana kathei sha̱nao chiya okathui awungabingwuitungli khamunga reikhamatai keinung china.”