Read Tangkhul Naga PHONGKHAMI 2 Bible Online

PHONGKHAMI 2 - Tangkhul Naga bible

PHONGKHAMI 2

¹“Ephesus Churchwui kazingraoli hithada kapilu: “Yāpāngli sirā shini singlaga thaomeishong shiniwui ngachaili yaothui kazata chiwui eina kharā paona.

²Ina nawui otsakbing, nawui kachot kala ningzinghākharing, makaphā mibingli nana mamayāngaiphalung kaji, kala athum khalatta pao kazata holaga, nana tamkhayang eina akachang makhaninganada samphang kahai ina theisera.

³Nana ningzingharingda iwui mingwui vang khāngmihaira, thālala mathāhailakrangli kaji ina thei.

⁴Kha nali mamayākhangai hi lei; khareli nana ili leikashi leishāt chi ara maleithura.

⁵Kachiwui eina na tātunghaokhala da phaningyanglu; laga ningngateida kharewui sākasā thada sālu. Nawui moreiwui eina ning mangateiakha ina nali rāda nawui thaomeishong chi awui apamwui eina rākhuithuihaora.

⁶Hichang hi na sai; ina ningkakachai thada nathumna Nocolaitannaobingwui otsak chili ningkachai.

⁷ “Manglāna churchbingli kahāng chi khanā kakaana nganākhuiranu! “Khayuiya chili, Varewui Paradiseli khalei kharing thingrongwui athei chi ina shaingasakra.

⁸ “Smyrna churchwui kazingraoli kapilu; “Khare eina khanaowa, thihailaga ringkhaluiya chiwui eina kharā paona.

⁹Ina nawui kachotkachāng kala kachām thei, (kha nathum shānglaka). Jehudina da hānglaga maningkasā athumna khamashāt ina thei, athum Satanwui synagogue akhana.

¹⁰ Nathum khanangki kaji khikhikhawui vang mangangalu. Yanglu nathumli chāng tamyang khavai chipeena kaikhali phātop sangra; kala tharāthangwui vang kakhanang samphangra. Kathi eina tangda ili shitsangmalu; Ina kharingawui kuihon mira.

¹¹“Manglāna churchbingli kahāng chi khanā kakaana nganākhuiranu! “Khayuiapa chili thikakhanena masāza̱rarmara.

¹²“Pergamum churchwui kazingraoli kapilu: “Zankhangasunga kazana raikhai kasingpā chiwui eina kharā paona.

¹³Ina nawui pamkhavai thei; chi Satanwui wungpamkhonglina. Chithālala iming nana singtita, nana iwui kahāng nganai kala Satanna kapam apam chili shākhi khame ili ningkatonga Antipasli sākathat tharan nana ili shitkasang mangacheilakmana.

¹⁴ Kha nathumli mamayākhangai kateokha lei; nathumwui ngachaili Balaamwui tamkachithei khuikasang mi kha lei, ana Balakwui tui tamchitheida Israelnaobingli phei ngaphok khavai sai. Kameoli kapha̱sā shaikhavai, ngalā ngashām khavai ana kasatsanga.

¹⁵Chi tākam eina Nicolaitanbingna tamkachithei chi khuikasanga mi nathumwui ngachaili zanga.

¹⁶Chiwui vang eina ning ngateilu. Chi maningakha ina thākta rāda ikhamorwui raighai chi singda ina athumwuitungli rai rātāra.

¹⁷ “Churchbingli Manglāna kahāng chi khanā kakaana nganākhuiranu! “Khayuia athum chili ina ngathum kahai manna mizāra; Ina kachara ngalung akhala mira, ngalung chiwuitungli aming kadhara akha kapisanghai. Aming chi samkaphangapa maningla khipānakha matheimana.

¹⁸ “Thyatira Churchwui kazingraoli kapilu: “Amik meiwon kathā kala aphei hānshi kahai pithrai kathā Varewui Naomayara chiwui paona.

¹⁹Ina nawui otsak, leikashi, ningkatong, ngachon khangarok kala ningzinghākharinglila, nathum khare otsakli aruihonwuina phākhamei ina thei.

²⁰ Kha nali mamayākhangai hi lei: Jezebel, khalatta marān kahova̱ chili nana mayai. Awui tamkachitheina iwui raobingli yonngasaka, khamathang-khamarang meoma̱li pha̱kahai sā chi ana shaingasaka.

²¹Ning ngatei khavai ina ali atam mihaira, kha ana shām kasāwui eina ning mangateingaithuwa.

²²Chiwui vang ali petli pingasakra kala ali leikashebing ning mangateiakha, athumli kakhanang khangacheeli horsanghaora.

²³ Awui thikashurabingli ina sāthatserhaora, chieina church saikorana I hi mi saikorawui kaphaning sākhangai katheiana da theikhuira. Kala nathum kachiva̱li kachichāna sākahai athishurda mira.

²⁴Kha Thyatirali khalei kateibing, tamkachithei chi makakhuiabing, kaikhana Satanwui kathuka otbing da kaho chi matheithangkhamabing, nathumli ina kahāngna, nathumwuitungli ina otphun khangatei machiphunmara.

²⁵Kha I marāranglakha eina tangda nathumwui khalei chi singtitmalu.

²⁶ Khayuia kala khanao eina tangda iwui ot kasāpa chili yurbingwuitungli ina pangshap mira;

²⁷ina iwui Avāwui eina pangshap samkaphang thada, ana mari khāmshui singda athumwuitungli mungra kala ham kasaawui hambing shaokakhai thada shaokachupra,

²⁸kala ali zingthanwola mira.

²⁹“Manglāna churchbingli kahāng chi khanā kakaa a china nganākhuira̱nu!