Read Tangkhul Naga PHONGKHAMI 3 Bible Online

PHONGKHAMI 3 - Tangkhul Naga bible

PHONGKHAMI 3

¹“Sardis churchwui kazingraoli kapilu; “Varivarawui manglā shini, sirā shini kasinga chiwui paona. Ina nawui otsak theisera, na ringdalei kaji amingli leilala na thihaira.

²Mathichaoranglakha ngakarthuida kateokha khalei chi pangsang ngasaklu, kaja Varewui miktāli nana sākahai kāshung kahai ina matheimana.

³Chiwui vang eina nana kathada samphangkhuida shākhuikhala kaji phaningunglu, chi mayonda ningngateilu, mamathukakha, ina khale thada rāra, kala ina kharā pung chi na matheimara.

⁴Thālala Sardiswui alungli kashankachon mamakhaola kahai kha lei, athumna ili ngasoda charshi kahai kachon ngavailaga yaothuira kaja, athum chi khangayebingna.

⁵ Khayuiapa chili chithada kachara sāri ngavaimira kala ina awui ming kharinga lairikwui eina mashimitmimara; kaja iwui Avāwui kala awui raobingwui miktāli athum iwuina da tharlāk eina phongmira.

⁶“Manglāna churchbingli kahāng chi khanā kakaa a china nganākhuiranu!

⁷ “Philadelphia churchwui kazingraoli kapilu: “Kathara khamashunga, Davidwui sho kasinga, ana shohaiakha khipānakha mashungkapai, ana shunghaiakha khipānakha mashokapai, awui eina kharā paona.

⁸Ina nawui otsak theisera kala yanglu, ina nawui mangāli khipānakha mashungkharar khāmong akha shomihaira; khikhalajila nawui pangshap teolaka, thālala iwui tui mayonhaira kala iming mahorhailakmana.

⁹ Yanglu, Jehudina jilaga akachanga Jehudi makhaning, kha kakapika, Satanwui synagogueli khaleibing athumli nawuili rāngasakta napheizingli ngakhumzang ngasakra, kala ina nali leishiya kaji theingasakra,

¹⁰khikhalajila nana iwui tui mayontit kahaiwui vang okathuili okthuida khalei mi saikorali chāng yangkhavai apuk-apagawuitungli rāki kaji kachotkachāng chiwui eina ina nali kanmira.

¹¹Yanglu, I thākta rāra; nawui khalei chi singtitlu, chithākha nawui kuihon kateina makhuithuimara.

¹² Khayuia chili ina iwui Varewui khorumshim pakra̱ akha sāngasakra; ana chiwui eina mangapākluimara kala ina awuitungli iwui Varewui ming kala kazingramwui eina iwui Varewui eina tāki kaji iwui Varewui keinung kadhara Jerusalemwui aming chi kapisangmira; kala iwui kadhara aming chila kapisangmira.

¹³“Manglāna churchbingli kahāng chi khanā kakaa a china nganākhuiranu!

¹⁴ “Laodicea churchwui kazingraoli kapilu: “Amen kaho ningkatonga kala khamashunga shākhi, Varena sākahai ot saikorawui angayung chiwui paona.

¹⁵Ina nawui otsak theisera; na khamakuila maning, kasāla maning, makuiakha makui, saakha sā jisi kaja teokha phārala!

¹⁶Kha lumra̱sa̱ eina khamakuila mamakui, kasāla maning kajiwui vang ikhamor eina nali kapha̱shokhaora.

¹⁷ Nakhalatta ‘I shāngshuna, ringphāshuna, kala khavāt akhala meleimana’ da hānga kha na makathuka, khikha masā khavai, kachāma khangapeowa, kala kachon makhangavaiana kajiva matheimana.

¹⁸Meili lāngkahaiya sinā iwui eina lokhuida shāngchang khavai kala kachon kachara iwui eina lokhuida ngavailaga, mahonghat kahaiwui kakhayak malei khavai, kala mikli ari neolaga theikhavai nali hāngkachitheina.

¹⁹ Ina leishilak kajebingli hāngmachinda tandila mi; chiwui vang eina ningmazingda ningngateilu.

²⁰Yanglu ina khāmongli nganingda shaoda lei, kachikathāna iwui khon shāda khāmong shomiakha ina ali zangra kala ina ali kala ana ili phazārumra.

²¹Ina khayui samphangda Ishāvāli ngasoda awui wungpamkhongli ngasokapam thada khayuiyapā chili iwui wungpamkhongli ili ngasopam khavai ina mayāmira.

²²“Manglāna churchbingli kahāng chi khanā kakaa a china nganākhuiranu!”