Read Tangkhul Naga RUTH 1 Bible Online

RUTH 1 - Tangkhul Naga bible

RUTH 1

¹Wungva̱-wungvābingna munglakha ngalei chili chāmrei rāda, Judahli khalei Bethlehemwui mi akha, apreiva̱ kala anaomayara khani zangda Moab ngaleili yāmvai.

²Awui ming Elimelech kala apreiva̱li Naomi hoi, kala awui naomayara khanili Mahlon eina Chilion hoi; athum Judahli khalei Bethlehemwui Ephrathwui mina. Athumna Moab ngaleili vāda chili pamhaowa.

³Kha Naomi agahara Elimelechna, apreiva̱ kala naomayara khanili nothahailaga thihaowa.

⁴Naomayara khanina Moab ngalā khui; akhapava̱li Orpah hoi, kala khangatei akhapava̱li Ruthh hoi. Athum chili kum tharā sha̱kha pama;

⁵kala Mahlon eina Chilionla thihaida, preiva̱̱ chi nao khani kala gaharawui vang eina ning thenghaowa.

⁶Chieina ana Moabwui eina arihāva̱ khanili thānphungda latung khavai sai; kaja PROHOna awui mibingli yangkhamiwui vang kashakazā samphanghaira da ana Moab ngaleili leilakha shai.

⁷Chiwui vang eina Judahli latung khavai arihāva̱ khanili thānphungda apam chiwui eina zatphokuwa.

⁸Kha Naomina arihāva̱ khanili, “Ungulu, kachichā shāva̱wui ngalemli hanungulu. Kathebinglila, kala ilila nanina mathālak eina sākhami thāda Varenala nanili mathālak eina nganaomiranu.

⁹Kachichā gahara samphangthathuida shim pānkhavai PROHOna mayāmiranu!” da hānga. Kala anili mai maya̱kakhui eina anina akhon shokta chapsasuihaowa.

¹⁰Kala anina ali hithāda hānga, “Ngga, inila nali ngasoda nawui mibingwuili ungra.”

¹¹Kha Naomina hānga, “Irihāva̱ khani, hanunghaolu, khiwui vang ili ngasoung kachangrakhala? Iwui naopamli mayarnao zangda naniwui gahara ngasākapai leila?

¹²Ila ara sarhaira, gahara maleirarluimara. Khikateikhada, arui ngayā ina gahara leida nao pharālala,

¹³nanina mafathuila chiwui vang ngaraichingrala? Maningmana, irihāva̱ khani, PROHOna ili makhamayā hi theilaga naniwui vang wukkhanangnaya.”

¹⁴Chieina anina kairarang chapluiya. Kala Orphana aniva̱li maya̱khui; kha Ruthva ali ngathāntithaowa.

¹⁵Kala ana “Yanglu, namuiva awui mibingli kala awui varebingli latunghaira, nala awui thi shurungulu” da hānga.

¹⁶Kha Ruthna hānga, “Nali nothāhailaga, ili ungulu kaji tui makahāngmialu; kaja nawui khavāpamli I vāra, nana akazunpamli ila vāzunra; nawui mi iwui mi sāra, kala nawui Vare iwui Vare sāra;

¹⁷na kathipamli ila thira, kala ilila chili chifara. Kathina maningla ina nawui eina pākthuihaiakha PROHOna ili chithāda lah chili lāngda sāranu” da ngahānkai.

¹⁸Kala ali shurphalunghaorali kaji theihaoda Naomina khituikha mahāngluithuwa.

¹⁹Chithāda sāda ani Bethlehemli ngasounga. Ani Bethlehemli ungkazang chi kashā eina aniwui pongli aram ngazeklophaowa; kala preinaobingna “Hi Naomila?” da ngahāna.

²⁰Ana ngahānkai, “Ili Naomi mahola Mara holu,” kaja “Pangshap sāshapa china ili sāshilak eina sai.

²¹Ishi peida vai, kha PROHOna ili khamasai eina hanung ngasakhaira. PROHOna khanang ngasakta, Pangshap sāshapa china kachotkachāng hiyākha chiphunhailaga ili khisāda Naomi hokhala?” da hānga.

²²Chithāda sāda Moabpava̱ arihāva̱li ngasoda Naomina Moab ngaleiwui eina latunga. Anina Bethlehemli kehu hātkaphok atamli unga.