Read Tangkhul Naga RUTH 2 Bible Online

RUTH 2 - Tangkhul Naga bible

RUTH 2

¹Chitharan Naomina agahara kaja Elimelechwui shong eina athei-asā kashok Boaz hoda kashānga mi akha leisai.

²Kala Moabpava̱ Ruthna Naomili, “Kachikathā akhawui mikyanli ina lukhamashan samphangkapai leiakha ina luili vālaga mātham vāngamui khavai khamayāmilu,” da hānga. Chieina ana, “Vālu irihāva̱” da hānga.

³Chieina ana vāda kahātabingwui thili mātham aphai; kala ana khavā lui chi, Elimelechwui shimkhur Boazwui luipam sāsai.

⁴Kala yanglu, Boazna Bethlehemwui eina rāda mā kahātabingli, “PROHOna nathumli ngasomiranu” da ahānga. Kala athumna, “Nalila PROHOna somiranu” da ngahānkai.

⁵Chiwui thili Boazna awui rao kahātabingwui kathāna chili “Ngalāva̱ hi khipākhala?” da ngahāna.

⁶Chieina awui rao kahātabingwui kathāna china, “Moab ngaleiwui eina Naomina ngasokhaung Moabpava̱ china.

⁷Sha̱naopava̱na, ‘Matham tātung kahahai ka-phākhui khavai khamayāmilu’ da kahāngwui vang phākhangasakna. Ana ngathorthakva̱wui eina phākaphok chi kasha̱khala mangasāmlakla arui eina tangda kaphā hina” da ngahānkai.

⁸Chieina Boazna Ruthli hānga, “Inao ngalāva̱, nganālu, lui hi chihohailaga luipam khangateili mātham mavāphaluilu, kha iwui ot kasā ngalānaobingli ngayurlu.

⁹Nana mā kahātabingwui athi shurda lui hili phākhukhui jilu. Yaronnaobingna nali masheikhaut khavai ina hānghaira. Kala ra̱changakha yaronnaobingna asokkhui kahai hamli kazang tara̱ chi manglu.”

¹⁰Chieina ana khayāshida kui mashunzanga, kala “Ram khangateiwui eina kharā mi I kathāli nana kathāda hiyākha lumashanmihaokhala?” da hānga.

¹¹Kha Boazna ali ngahānkai, “Nagahara thikahaiwui thili nana nashānili sākhami saikora, kala nava̱ navā, naram nothāhailaga nana makatheiya mibingli kharāwui apong saikora ili hāngserhaira.

¹²Nana sākahai chiwui vang PROHOna nali runmiranu, kala nana ngayinkhuikida angachāngli yāmkasanga Israelwui Vare PROHOna sāman peichaoda miranu!”

¹³Chieina ana, “Ishamei, nana ili lumashanmikachangkhathaira, kaja naraobingwui alungli ina nawui rao akha maninglala narao ili ninglum ngasakta lumashanlak eina hāngmihaira.” da ngahānkai.

¹⁴Kala phazāt atamli Boazna ali hānga, “Hili rālu, khamui rāshailu, khamui chi drakhāra̱li rurshailu.” Chieina ngalāva̱ china kahātabingwui ngalemli apamzanga, kala ana māngataila ngarānmi, kala ana thokashap eina shaikhuida kataila taikhui.

¹⁵Ana mātham aphālui khavai ngakarkathui tharan, Boazna awui mibingli hāngchithei; “Ana māvāmwui alungli zangphālala ali makahararlu.

¹⁶Kala awui vang māvāmwui eina ngakhunshokmida kaphāla phākhui ngasaklu, kala ali khikha makaharalu.”

¹⁷Chieina ana luilungli ngazin vāshungda mātham phai; chiwui thili ana naikhuiserda shungkha samphanga.

¹⁸Kala ana chi khuiphungda shimli phungunga; ana phākakhui chi aniva̱li ungchithei, kala mazārarmada ana romkaphung chila mi.

¹⁹Aniva̱na, “Na aja kachishong aphākhuikhala? Nali yangsangkhami mi chi kala khamahai ngasaranu” da hānga. Chieina ana aniva̱li, “Aja ina khavā lui akhavā chili Boaz hoi” da ngahānkai.

²⁰ Chieina Naomina arihāva̱li hānga, “Thikahaialila kala kharingalila lumashanmiching kaje PROHOna ali somiranu.” Naomina hithāda hānglui, “Mipā chi ishiwui nganailak kahai thei-sāna.”

²¹Kala Moabpava̱ Ruthna hānga, “Laga, hili lāngda ‘Iwui mā mahātkhuiranglakha eina tangda iwui raobingli ngayurchinglu,’” dala ana ili hānga.

²²Chieina Naomina arihāva̱ Ruthli hānga; “Phālakhaira irihāva̱, awui ot kasā sha̱naobingli ngasoda aphālu; maningakha lui khangateili vāda nali yansaipaishina.”

²³Chieina ana ngum eina kehu mahātkupranglakha eina tangda Boazwui ot kasā sha̱naobingli ngayurda mātham aphāchinga; kala ana aniva̱li ngayurpama.