Read Tangkhul Naga RUTH 3 Bible Online

RUTH 3 - Tangkhul Naga bible

RUTH 3

¹Chiwui thili Naomina arihāva̱li hānga, “Irihāva̱, nawui vang phāmei khavai shim pānkhavai ngarānkhami maphāmeimarala?

²Nana ot sārumda khalei sha̱naobingwui akhavā Boaz chi ishi athei-asā maningmala? Yanglu, a aja ngayā lanpumli ngum sāmathāpida lei.

³Chiwui vang eina ra̱mayangkhuilaga thao neolu, kala nawui mathāmeikap kaje sāri shaksākhuilaga lanpumli vālu; kha a maphazā maphashakkhuiranglakha eina tangda na chili leida lei kaji machitheialu.

⁴Kha a kapi atamli awui pikhavai pam chi yanghailu; laga pheizingli kachon alanzangda pilu; chieina nana khi sārakhala kaji ana hāngmira.”

⁵“Nana kahahāng saikora chi ina sāra” da ana ngahānkai.

⁶Chieina aniva̱na ali kahāng tākam eina ana lanpumli vāda asai.

⁷Kala Boazna phāshak-phazākhuida chirchom kahai eina lanpum chiwui ngum kazip kahai achikun akhali pihaowa. Pikahai eina kasaikha apheizingshong kachon alanzanglaga Ruthna apizanga.

⁸Ngayā sailung mipā chi thuikashuida khayang eina, yanglu, sha̱nao akha apheizingli pisai!

⁹“Na khipākhala?” da ana khangahān eina, “Narao sha̱nao Ruth ina, shimlui kāki kaje chi nana, chieina narao sha̱naowuitungli nawui kachon fasangmilu” da ana ngahānkai.

¹⁰Chieina ana hānga, “PROHOna somiranu, inaongalava̱, nana kashānga yaronnaolapai kachāmalapai khangatei maphāla ili khayākashi kachithei hina ridawuili ajawui hina mataimei.

¹¹Chieina ara, inao ngalāva̱, mangacheelu, nana ningkachāng chi ina sāmira; kaja iramnaobingna na kākashunga sha̱naona da theiser kahaina.

¹² I shimlui khuirāna kachi hi mashunga, kha ili nganaikhamei akha leifaya.

¹³Aja ngayā pisanglu, kala ngathorshong, kalikha shimluikatna khangachā chi sāmira jiakha phāhaira; ana sāranu; kha ana chi mathathurakha PROHOwui ming singda kahāngna, kaja shimluikatna sāran chi ina sāra, ngathor eina tangda pisālu.”

¹⁴Chithāda kazing mathangranglakha eina tangda ana apheizingli piya; akha eina akha mamachukkhuipairanglakha ngakarthuihaowa. Kala Boazna hānga, lanpumli sha̱nao rai kaji khipālikha mathei ngasakalu.

¹⁵Kala ana hānga, “Nana khangavai kachon chi mayālu.” da kahāng eina ana khangavai kachon chi mayai. Chieina kachon chi mayāda khaishon tharuk sha̱kha tamsangmi, kala chi phungda shim unghaowa.

¹⁶Kala shimli khaung eina aniva̱na, “Kathāmameihaokhala irihāva̱?” da ngahāna. Chieina ana ali sāmi kahai saikora hāngsera,

¹⁷Kala ana “Kathāda nanili khamasai eina ungarokrakhala da khaishon tharuk hila ana sangkhamina.”

¹⁸Aniva̱na hānga, “Irihāva̱, khi saminikhala kaji matheiranglakha eina tangda ngaraisalu, kaja ana mayansāngmara, kha aja ngazekmihenra.”