Read Tangkhul Naga 1 SAMUEL 11 Bible Online

1 SAMUEL 11 - Tangkhul Naga bible

1 SAMUEL 11

¹Chiwui thili Ammonwui Nahashna Jabesh-gileadli shanglaga kuinamhaowa; chieina Jabeshwui mi saikorana Nahashli, “Mayākhangarok akha leisa, laga ithumna nali otram ngatha̱ra” da hānga.

²Kha Ammonwui Nahashna, “Israel saikora maishi khavai, ina nathumwui yāmik latshokmiserhaora, nathumna chi mayaakha mayākhangarok chi sāsa” jihaowa.

³Jabeshwui khararnaobingna ali, “Ithumli shinithang ngaraimilu, hiwui alungli Israelwui leiret saikorali vāshungda pao mivāga. Chiwui thili, kalikhada ithumli khipānakha makanmirarakha, ithum nathumli hamsanghaora” da hānga.

⁴Paomebing china Saulwui kha̱ Gibe-ah vāshungda akahāng tharan aramnaobing saikora chaphaowa.

⁵Chitharan Saulna awui seivābing chi homda lui eina ungrāsai; kala Saulna, “Mibing chili khi kachot samphanghaoda chapser kajikhala?” da ngahāna. Chieina athumna ali Jabesh mibingwui pao chi hānga.

⁶Kala ana tuibing chi kashā eina Varewui manglā Saulwuitungli panglāk eina rāzangda a malungvātshunhaowa.

⁷Ana seiot ngasin khavai mukkā khani chi sathatta marimrim sālaga chi Israelwui leiret saikorali paomebing eina ngasoda chihovāda, “Saul eina Samuelwui thi makashura mi chiwui sha̱keili hithāda sāmira” da hānga. Chieina PROHOwui khangachee chi mibingwuitungli tāshungda athum khokkha sāda rai.

⁸Bezekli ana kazipkakhui tharan Israelwui mi lakh kathum kala Judahwui mi thingthumrā kāshunga.

⁹Kala athumna chili kharā paomebing chili hānga, “Jabesh-gileadwui mibingli hithāda unghānglu: ‘Akhama zingyorshun atamli nathumli rākanmira’ jilu.” Paomebingna chi ungkahāng eina Jabeshwui mibing mathānlakhaowa.

¹⁰Chiwui vang Jabeshwui mibingna, “Akhama ithum hamsanghaora, kala nathumna nathumwui vang kaphā chi sālu.” da hānghaowa.

¹¹Kala akhama kathā Saulna awui raimi khum kathum sālaga ngathorshong Ammonbingwui rāmrah alungli angarara, kala chithang ngashun kasā atam eina tangda sāthata, kala makathebingla kachāyām eina yāmda akha eina akha mangasomana.

¹²Chieina mibingna Samuelli, “Khipalongkhala, ‘Saulna ithumli mungrala?’ da kahāngbing chi. Athumli khuirālu, sāthathaora” da hānga.

¹³Kha Saulna, “Aja zimik PROHOna Israelli huikhami khuirāmihaira, mi akhala masāthatmara,” da hānghaowa.

¹⁴Chiwui thili Samuelna mibingli hānga, “Rālu, ithum Gilgalli ungusa, kala ithumna chili wungram semkaluishitra.”

¹⁵Chieina mi saikora Gilgalli vai, kala chili athumna PROHOwui mangāli Saulli awunga sanga. Kala chili PROHOli ningyatchigat chigata, kala Saulla, Israelwui mibing saikorala PROHO mangāli ringphālakhaowa.