Read Tangkhul Naga 1 SAMUEL 12 Bible Online

1 SAMUEL 12 - Tangkhul Naga bible

1 SAMUEL 12

¹Kala Samuelna Israel saikorali hānga, “Yanglu, ina nathumwui kahāng saikora khuisangda nathumwuitungli awunga akha phāsangmihaira.

²Ara yanglu, awungana nathumli thānda lei; Iva sarhaida kuila ngapokhaira, kala yanglu, inaomayara khanila nathumli ngasoli; kala ina nganuilakha eina thuida aja rāshungda nathumli thānrāhaira.

³Arui I hili leili, PROHOwui mangāli kala awui thao neomi kahaiawui mangāli hāngphatlu. ina khipāwui sei khuihaira? Lha ina khipāwui gadhā khuihaira? Lha ina khipāli kateizāhaira? Ina khipāli rekharekhaira? Lha ina khipāwui pāng eina pheizā khuida khamashungli imik ngapeo ngasakhao? Ili hāngphatlu, chieina ina nathumli hanmira.”

⁴Athumna, “Nana ithumwui eina kateikazāla maleimana lah rekakharekla lah miwui pāng eina kakhuila maleimana” da ngahānkai.

⁵Ana athumli hānga, “Iwuili khikha khayon maleilakmana da nathumna kahāng hi PROHOna theira, kala aja awui thao neomikahaia hina theira.” Kala athumna, “Mha, ana shākhina” da hānga.

⁶ Kala Samuelna mibingli hānga, “Egyptwui eina navā ngarāli thānshokkhame, Moses eina Aaronli kapangkakhuia PROHOna katheina.

⁷Chiwui vang eina kasaikha nganinglu, chithāda nathumli kala nashāvā ngarāli kankhami otsak sami kahaia PROHOli ina nathumwui vang pomira.

⁸ Jacobna Egyptli khavā tharan Egyptnaobingna athumli rekhareka, chieina navāngarāna PROHOli ngakaowa kala PROHOna Moses eina Aaronli chihovāmi; kala anina navāngarali Egyptwui eina thānshokmida athumli apam hili pānkhangasakna.

⁹Kha athumna athumwui Vare PROHOli malaihaowa, chieina ana athumli Hazorwui awunga Jabinwui raimi akhava Siserawui pāngli, kala Philistinewui pāngli kala Moab awungawui pānglila yorsangmihaowa.

¹⁰ Kala athumna PROHOli ngakaowa, ‘Ithum morei sāhaira, kaja ithumna PROHOli horhaida Baalli kala Ashtarothli khorumhaowa; kha ara ithumli ithumwui yangkashibingwui pāng eina kakankhuimilu, kala nawui otram ngathaga’ da athumna poi.

¹¹ Chiwui vang PROHOna, Jerubbaal eina Barak, Jeptha, kala Samuelli chihoda apam kachiva̱li yangkashebingwui eina nathumli kanmida chingri eina pānkhangasakna.

¹²Kala Ammonnaobingwui awunga Nahashna nathumli rakhangarar tharan, nathumwui PROHO Varena nathumwui awunga sāda leilakha, ‘Ngga, kha ithumwuitungli mungkhavai awunga akha sangmilu’ da nathumna ili hānga.

¹³Ara yanglu, nathumna pokhuida, awunga akha kapangkhuihaira, yanglu, PROHOna nathumwuitungli awunga akha sangmihaira.

¹⁴Nathumna PROHOli khangachee eina otram ngatha̱da awui kahāng nganaakha kala PROHOwui ningkhamili mangakaishiakha; kala nathumla, nathumli khamunga awungala, nathum Varewui thi shurakha, phālakra;

¹⁵kha maningla, awui kahāng manganamada PROHOwui ningkhami mamayonakha nathumwuitungli, kala awungawuitungli, PROHOna mamayāmara.

¹⁶Chiwui vang eina kasaikha nganingda nathumwui miktāli PROHOna kahaka ot akha saki kaji hi yanglu.

¹⁷Aruihon māhāt maningmala? Ina PROHOli polaga kazing ngashumda kazing rongasakakha, nathum khalattana awunga pokakhui hi PROHOwui mangāli makhayā ot kahakva̱ sāhaira da theikhuira.”

¹⁸Chieina Samuelna PROHOli kapo eina, chithang PROHOna kazing ngashumda kazing rongasaka; kala mi saikorana PROHOlila Samuellila ngacheelakhaowa.

¹⁹Kala mi saikorana Samuelli hānga, “Naraobingwui vang nawui PROHO Vareli seihā sāmilu, chithāda ithum mathimara; kaja ithum khalattawui vang awunga akha kapo hiwui makaphā hi ithumwui moreitungli morei ngarorda sāhaira.”

²⁰Chieina Samuelna athumli hānga, “Mangacheealu; nathumna khayon saikora hi sāhaira, chitha-ilala PROHOwui thi kashurwui eina mangareithuihaialu, kha PROHOli nathumwui ning tongda otram ngathalu;

²¹kala arema ot, nathumli katong makhalei lah kaphā makhalei otbingwui thi mashurthuihai alu, kaja athum khikha masākhavaiana.

²²Kaja awui hakkhamahā amingwui vang PROHOna awui mibingli mahorhaimara, khikhalajila nathum awui miyur khangasā hi awui ringkaphāna.

²³Chili lāngda, nathumwui vang pokhami thahaida PROHOli morei sāra kaji hi iwui eina katāvali leiranu, ina nathumli khamashung kala kaphā shongfa chi tamchitheira.

²⁴PROHOli ngacheemalu kala ningtongda otram ngathalu; kaja phaningyanglu, nathumwui vang hiyākha kahaka ot ana sāmihaira.

²⁵Kha kalikhada nathumna makhayā ot sāchingakha, nathumla, nathumwui awungala shimānra.”