Read Tangkhul Naga 1 SAMUEL 14 Bible Online

1 SAMUEL 14 - Tangkhul Naga bible

1 SAMUEL 14

¹Thangkha Saulwui naomayara Jonathanna awui chāngvei phungkhame chili hānga, “Rālu, ini Philistinewui raimipam lakhashong vāsa.” Kha ana avāva̱li mahāngmana.

²Saulva Migronli khalei Gibeahwui ayarshong kabotheirongwui azingli pamsai; ali ngasoda mi shātharuk sha̱kha leisai,

³kala Ahitubwui naomayara Ahijah, Ichabodwui agato Phinehaswui naomayara, Eliwui naomayara, PROHOwui pāngmon, ephod ngavaida Shilohli leisai. Kala mibingna Jonathan thuihaira da matheimana.

⁴Philistine raimipamli vazang khavai Jonathana makānki kaji shongfawui ngalemli lungkai kajui lunghār khani lei: akhavāk Bozez, kala lakhashong Seneh hoi.

⁵Akhana atungshong Michmashwui mangāli, kala khangatei akhapāna azingshong Gebawui mangāli lei.

⁶Kala Jonathanna awui chāngvei phungkhame yarona chili hānga, “Rālu, ini ahui marimkashoka shipaibingli ayangsa; PROHOna iniwui vang ngararmilapai, kaja kanmi khavai PROHOwui vang teokhana lah chungkhana maleimana.”

⁷Chieina awui chāngvei phungkhame china, “Nawui ningna sākhangai chi sālu; yanglu, iniwui ning ngaraikacha thāda ila nali ngasozatta lei” da hānga.

⁸Chieina Jonathana hānga, “Yanglu, athumna inili theikhavai vāmeisa.

⁹Kalikhada athumna inili, chili ngaraisālu jiakha inina chili ngaraihaosa, inina athumwuili mavāsa.

¹⁰Kha kalikhada athumna, ‘Kālu’ jiakha, inina kāra; kaja PROHOna athumli iniwui pāngli horsangmi kahaina da hieina inina machutkhuira” da hānga.

¹¹Chieina anina Philistinewui raimipamwui eina theikhavai vai; kala Philistinenaobingna, “Yanglu, Hebrewnaobing akhurli yāmkhangayinwui eina shokrādalei” da hānga.

¹²Kala chiwui raimibing china Jonathan eina awui chāngvei phungkhame chili vaoda “Hili kālu, ithumna ot akha hangchitheiga” da hānga. Kala Jonathanna awui chāngvei kaphungali, “Iwui thi shurlu; kaja PROHOna athumli Israelwui pāngli horsangmihaira” da hānga.

¹³Chiwui thili Jonathanna apāng kala aphei zangda ngareikauwa, kala awui chāngvei phungkhame china athi shurkai. Kala athum Jonathanwui mangāli pitāhaowa kala chāngvei kaphunga china awui thishurda athumli sāthatvai;

¹⁴kala Jonathan eina awui chāngvei phungkhamena sāthat khare chi, mi maga̱ sha̱khana kaja apam chi acre tangkhai ngalei kotkahaiwui alunglina.

¹⁵Kala rāmrahlila, luilila, mibing saikorawui ngachailila ngacheeserhaowa; raimi pamlila kala ngararkazatabing eina tangda khangacheena kathirhaowa; neina̱ panglāk eina khanukta ngacheeshunhaowa.

¹⁶Kala Benjaminwui Gibe-ahli Saulwui shantrina yangkhavā tharan, yanglu, mi sorkhangasai yongung yongkhavā thei.

¹⁷Chieina Saulna ali khangasobingli, “Khipā ithumwui eina thuihaokhala, mi shānyanglu” da kasoi. Kala Athumna shānkhayang eina, yanglu, Jonathan eina awui chāngvei phungkhame maleisāthuwa.

¹⁸Kala Saulna Ahijahli hānga, “Varewui oko chi hili khuirālu.” Atam chitharan Varewui oko chi Israelwui mibingli ngasozatsai.

¹⁹Kala Saulna pāngmonli ngazekta leilakha, Philistinenaobingwui rāmrahli ngaunlop kahai chi pangmei khangai pangmeihaowa; kala Saulna, “Napāng khangtāhaolu” da pāngmonli hānga.

²⁰Chiwui thili Saul kala ali khangaso mibingna khokkha sāda raipamli vāhaowa; kala yanglu, maphakhuilakla raighai kasinga akha eina akha, ashi khalatta ngashātreihaida maphakhuilakthuwa.

²¹Rida Hebrewnaobingna Philistinenaobingli ngarumkasā kala ngasoda rāmrahli khavābing chila Saul eina Jonathanli khangaso Israelbingwuili zanghaowa.

²²Chithāda sāda, Ephraimwui kaphungramli athum khalatta vangathum kahai Israelwui mibing chinala Philistinenaobing yāmhaira kaji kashā eina, athumla panglāk eina kharomvāda railung vāzangda angarara.

²³Chiwui vang chithang zimiksho PROHOna Israelli kanshokmi; kala rai chi Beth-avan makānda ngararvai.

²⁴Kala Israelwui mibing chithang ningli khananglākhaowa, kaja Saulna mibingli khangashit sāda, “Ngazin marāranglakha eina tangdawui alungli iwui yangkashibingli ikhalattana athut makhuiranglakha phakazābing chi khonkashi ngasaranu” da hānghaowa. Chieina mi khipākha mamazaplakthuwa.

²⁵Kala mi saikora ngahongli unga; kala leikhurli gahā zangsai.

²⁶Mibingna ngahong chili kazang tharan, yanglu, khuira̱ chi ngaya̱sai; kha khipānakha pāng eina saza̱da khamorli masangmana; kaja mibingna khangashit chili ngacheehaowa.

²⁷Kha avāva̱na khangashit chi Jonathanna mashāthuwa; chiwui vang eina ana kasing khāmshui chieina khuihāng chi tokhuilaga shaihaowa; kala amik mathingsanghaowa.

²⁸Chieina mi akhana, “Mibingli navāna, ‘Aja phakazā mi chi khonkashi ngasaranu’ da saklak eina ngashithaida lei” da hānga. Chiwui vang mibing vānkahaina.

²⁹Chieina Jonathanna hānga, “Kakhanang saikora hi ishāvāwui einana; ina khuira̱ kateokha khamang eina imik kayākha mathingsanghairakhala?

³⁰Yangkashibingwui eina ngapaikakhui chi raimibingna zāhairasasi kaja kayākha pha̱ra; kaja arui eina tangda Philistinenaobing chungda mathimana.”

³¹Chithang athumna Philistinenaobingli Michmash eina thuida Aijalon eina tangda sāthatvai. Kala mibing chi vānlakhaowa;

³²mibingna ngaponkakhui yao, seivā, seinao, shaothatlaga ashee eina ngarumda shaihaowa.

³³ Chieina athumna Saulli vāhānga, “Yanglu, mibingna ashee eina ngarumda shaida PROHOwui mangāli morei sāhaira.” Kala ana, “Nathum zakshina sāhaira, iwui hili ngalung kahaka akha khaningrālu” da kasoi.

³⁴Kala Saulna hānga, “Mibingli ‘Kachichāwui sei, yao khuirāda hili rataithatranu, kala hili rashairanu, kala ashee eina ngarumda shaida PROHOwui mangāli morei masāluiranu’ da mibingli ahāngserlu.” Chieina mi kachiva̱wui sei khuirāda chithang ngayā chili ataithatsera.

³⁵Kala Saulna PROHO wui vang hanphut akha sākhui; ana PROHO wui vang hanphut kasā china kharena.

³⁶Chiwui thili Saulna hānga, “Aja ngayā Philistinenaobingli kharomvāda kazing mahoranglakha eina tanga ithumna mi akha eina tangda matai ngasakla tāsākazamhaosa.” Kala athumna, “Nana phāra kaji eina vairanu” da hānga. Kha pāngmon china, “Vareli ngaha̱nsa” da hānga.

³⁷Chieina Saulna Vareli, “ina Philistinenaobingwui thi kharomvārala? Kala Israelwui pāngli mahorsangmirakhala?” da ngahāna. Kha ana chithang mangahānkāmithuwa.

³⁸Kala Saulna, “Hili rāserlu, nathum mibingwui kathānabing saikora; yanglu aja morei hi kathāda shokhaokhala kaji theikhuira,” da hokhui.

³⁹“Kaja Israelli kankhame PROHOwui ming singda kahāngna, inao Jonathan thathalu, a thilakra.” Kha mibing saikorawui ngachaili khipākha mangahānkāthuwa.

⁴⁰Chieina ana Israel saikorali, “Nathum lākhavāklu, kala inaomayara Jonathan ini lākha jira” da kahāng eina, “Nana phāra kaji chieina vailu” da mibingna ngahānkai.

⁴¹ Chiwui vang eina Saulna hānga, “O PROHO Israelwui Vare, aja naraoli khisāda mangahānkāmithukhala? O PROHO, Israelwui Vare, kalikhada khayon hi ini vānaoniwuina jiakha, inili Urim milu; kha khayon hi Israel mibingwuina jiakha, athumli Thummim milu.” Chieina Saul eina Jonathanli tāhaoda mibing kanshokhaowa.

⁴²Chieina Saulna hānga, “inaomayara Jonathan iniwui ngachaili kalā yanglu.” Khayang eina Jonathanli tāhaowa.

⁴³Chieina Saulna Jonathanli hānga, “Ili hānglu, nana khi sāhaokhala?” Kala Jonathanna “Khuira̱ ipāngli kasinga khāmshui eina ina khuilaga kateokha shaihaowa; I hili leili, ili sāthathaolu” da ngahānkai.

⁴⁴Kala Saulna hānga, “Nali masāthatakha Varena ili sathatranu; Jonathan! Na thiphalungra.”

⁴⁵Chieina mibingna Saulli hānga, “Hakmahālak eina Israelna yuikhavai sakhame Jonathan thira kajila? Chi mathapailakmara! PROHOwui ming singda kahāngna, Jonathanwui kuisam akha eina tangda matatungpaimara; kaja aja Varena ngasomida ana khamathā ot sāhaira.” Chiwui vang mibingna ali ngatangkhuihaoda Jonathan mathithuwa.

⁴⁶Chieina Saulna Philistinenaobingli makharomvāluithuwa; kala Philistinenaobingla athum kachichāwui ramli unghaowa.

⁴⁷Saulna Israelwui wungpam kakhui eina, ana apam kachiva̱wui eina yangkashebingli rai sāda Moabli, Ammonnaobingli, Edomli, Zobahwui awungabingli, kala Philistinenaobingli ngarara; ana khangararpam kachida ana athumli maikashi mi.

⁴⁸Kala ana marāklak eina ngararda Amaleknaobingli shimitmihaida Israelli ngaponkazābingwui pāng eina kankhui.

⁴⁹ Chitharan Saulwui naomayarabing: Jonathan, Ishvi, kala Malchishuana; kala anaongalāva̱ khani: khararva̱li Merab, kala khanganopava̱li Michal hoi;

⁵⁰kala Saul preiva̱wui ming Ahino-am hoi, Ahima-azwui naongalāva̱na. Kala awui raithānali Abner hoi, Saulwui avāgato Nerwui naona.

⁵¹Saulwui avāva̱ Kish eina Abnershāvā Nerli Abielna pharai.

⁵²Saulna ringda leilakha eina tangda, ana Philistinenaobingli rai sakchanglak eina ngararchinga; kala Saulna kachikathā kapanga lah khamarāka mi theiakha, a zazangda ngararar jiya.