Read Tangkhul Naga 1 SAMUEL 15 Bible Online

1 SAMUEL 15 - Tangkhul Naga bible

1 SAMUEL 15

¹Kala Samuelna Saulli hānga, “PROHOna awui Israel mibingwuitungli awunga sākhavai nali thao neomi khavai ili kachihona. Chiwui vang eina ara PROHOwui tui nganālu.

² Ashangva̱wui PROHOna hithāda hānga, Israelna Egyptwui eina kashok tharan shongfali Amalekna athumli makhamayāwui vang ali ina tandi mira.

³Ara vāda Amalekli vāsāthathaolu; athumwui khalei saikora, sha̱nao, mayarnao, naoshinao kala ana̱ khamangbing mateila, sei, kala yao, ut, kala gadhāla akhanida mashākla sashimānmiserhaolu.”

⁴Chieina Saulna mibingli hokhui, kala athumli Telaimli shānkhuida pheiwui raimi lakh khani, kala Judahwui eina mi thingtharā jiya.

⁵Kala Saulna Amalekwui keinungli vāda tampākli arimpama.

⁶Kala Saulna Kenbingli, “Thuiulu, Amalekbingwui eina ngapākthuihaolu, maningakha nathumli ina athumli ngasoda sākazamhaipaishina; kaja Israelwui mibingna Egypt eina kashok tharan nathumna lukhamashan chitheihaida lei” da hānga. Chieina Kenbing Amalekbingwui eina yāmhaowa.

⁷Kala Saulna Havilah eina thuilaga Egyptwui zingshoshong khalei Shur vāshungda Amaleknaobingli yuihaowa.

⁸Kala ana Amaleknaobingwui awunga Agagli kharing eina tukkhui, kala mi saikorali raighai eina sāthatserhaowa.

⁹Kha Saul eina mibingna makānāki kaji saikora sāthatserhailaga, awunga Agag kala yao, sei, asā kaphābing chi masāthatthuwa.

¹⁰PROHOna Samuelli hānga:

¹¹“Ina Saulli awunga sākhangasak hiwui vang I wukkhananghaira; kaja ana iwui thi mashurla ngareithuihaira, kala iwui ningkhamibing mamayonmana.” Chieina Samuel malungvāthaida ana PROHOli ngayā seihā sāthai.

¹²Kala Samuelna Saulli samphang khavai ngathorthak kathui eina, Samuelli, “Saulna Carmel keinungli awui wonrā akha kāsāhailaga Gilgalli latunghaira” da hānga.

¹³Chieina Samuelna Saulwuili vai, ani samkaphang eina Saulna Samuelli hānga, “PROHOna somiranu; PROHOna kakaso chi ina sāhaira.”

¹⁴Chieina Samuelna hānga, “Chithākha ina shāda khalei seila, yaola kakhong chi khikhala?”

¹⁵Saulna hānga, “Athumna Amalekbingwui eina khuikhaungna; kaja seila yaola khamathāthābing chi PROHO nawui Vareli pha̱phayā khavai taikahaina,” kateibing chiya sāthatserhaira.

¹⁶Chieina Samuelna Saulli hānga, “Thāhaolu! Angayā PROHOna ili kahāng tui chi ina nali hangga.” Chieina Saulna, “Hānglu,” ji.

¹⁷Kala Samuelna hānga, “Nakhalattawui mikyanli na khikha maningmana da theilala, na Israel shangbingwui akhavā maningmala? PROHOna nali Israelwuitungli awunga sākhavai thao neomihaira.

¹⁸Kala PROHOna nali ot akhawui vang chihoda, ‘Morei kaphung Amaleknaobingli rai atāda mashimān ngakanranglakha eina tangda athumli sāshimānhaolu’ da kasoi.

¹⁹Chithākha khisāda nana awui tui manganāthu? Kala khiwui vang sakakathān otbing chi vamkhuikhala kala PROHO mangāli makaphā ot sākhala?”

²⁰“Ina PROHOwui kahāng nganāhaira,” da Saulna ngahānkai, “PROHOna ili kakaso athishurda ina ot chi asāhaira, kala Amalekwui awunga Agaglila tukunghaira; kha khangateibing chiya peichaoda sashimānmihaira.

²¹Kha mibingna ngaponkakhuibing, sei, yao khamathāthābing chi Gilgalli nawui PROHO Vareli pha̱phayākhavai mibingna khuikaphungna.”

²² Kala Samuelna hānga, “PROHOwui kahāng khanganāli lāngmeida rikkata kachigat kala phākaphayāli PROHOna ningyāng ungmeihaola? Yanglu, pha̱kaphayāli kahāng khanganā phamei, kala asā kakā yaovāle awui tui khuikasang phamei.

²³Kaja ngakaikashi hi khanong khayang kathāna, kala nurkhangahar hi meoma̱li khokharum kathāna. Khikhalajila nana PROHOwui tui makhuikasangwui vang, PROHOnala nali awunga sākhavai mamayāthura.”

²⁴“I morei sāhaira,” da Saulna ngahānkai, “PROHOwui ningkhami kaihaira, nawui tuila makhuisangthuwa; kaja ina mibingli khangacheewui vang athumwui kahāng nganāhaowa.

²⁵Chiwui vang eina, ili kahuimilu, ina kapona, kala PROHOli khorum khavai ini ungusa.”

²⁶Kha Samuelna Saulli hānga, “I nali mangasoungmara; kaja nana PROHOwui tui makhuisangmana; kala PROHOnala, nali Israelwui awunga sāki kaji mamayathura.”

²⁷ Samuelna thuiukida khangarei eina, Saulna awui kachonli khangakhun eina kākhaowa.

²⁸Chieina Samuelna ali hānga, “PROHOnala aja nawui ngalei ngakaikhaihaida nali phākhamei nawui khongnai akhali mihaira.

²⁹Kala Israelwui Tekkhamatei chinala makapikmara lah ning khangateila maleimara, kaja a mikumo maningmana.”

³⁰Chieina Saulna hānga, “Ina morei sāhaira; chitha-ilala kathānabingwui mangāli kala Israelwui mangāli maiyā khavai ini kha-ungphalungsa, chithāda nawui PROHO Vareli I ungkhorumra.”

³¹Chieina Samuelna Saulwui thi shurunga; kala Saulna PROHOli ungkhoruma.

³²Chiwui thili Samuelna hānga, “Amalekwui awunga Agagli khuirālu.” Kala Agagna ningmathānlak eina ali rāda, “Kachangkhat eina kathiwui kachotkachāng kānthuilakhaira” da hānga.

³³Kala Samuelna hānga, “Nawui raighai eina preinaobingli nao malei khangasak thāda nava̱la nao manganaoranu” da hānga. Kala Gilgalli, PROHOwui mangāli Samuelna Agagli yorsa̱sanghaida akha̱ sāmihaowa.

³⁴Chiwui thili Samuelna Ramahli vāhaowa; kala Saulla Gibeahli khalei awui shimli unghaowa.

³⁵Kala Saulwui kathi zimiksho marāshungranglakha eina tangda Samuelna Saulli masamphangluithuwa, kha Samuelna Saulwui vang wuk khananga. Kala Saulli Israelwui awunga sāngasak kahaiwui vang PROHOna ningmalathaowa