Read Tangkhul Naga 1 SAMUEL 16 Bible Online

1 SAMUEL 16 - Tangkhul Naga bible

1 SAMUEL 16

¹PROHOna Samuelli hānga, “Saulna Israelwui awunga saki kaji ina mamayāmana kaji thatheilaga nana awui vang karankha sifarakhala? Thaokhongli thao sangkhuilu, kala zatulu; ina nali Bethlehempa Jessewuili chihovāra; kaja awunga sākhavai iwui vang awui naomayarabingwui eina ina akha kapangkhuihaira.”

²Chieina Samuelna hānga, “Ina kathāda vārakhala? Kalikhada Saulna hi shaakha, ana ili sāthathaora.” Chieina PROHOna hānga, “Seilānao akha khuiphunglu, kala ‘PROHOli apha̱phayāra’ jilu.

³Kala pha̱kaphayā chili Jesseli hosanglu, kala nana khisamameira kaji ina hāngchitheira; kala ina aming hāngkhamipa chili nana iwui vang thao neomira.”

⁴PROHOna kakaso athishurda Samuelna sai, kala Bethlehemli vai. Keinungwui khararnaobing china kathirriri rāsamphangda hānga, “Na chingri eina kharāla?”

⁵Chieina ana, “Chingri eina kharāna; PROHOli pha̱phayā khavai kharāna” da ngahānkai; kala “Nathum khalatta tharchigatlu, kala pha̱kaphayā hili ili ngasoda rālu” da hoi. Kala ana Jesseshi vānaongarāli tharchigatmi, kala athumli pha̱kaphayāli hosanga.

⁶Athum kharā eina, ana Eliabli yanglaga, “Kachangkhat eina PROHOna thao neomi kahai chi hilakra” da phaninga.

⁷Kha PROHOna Samuelli hānga, “Azakli mayangalu, lah asho-areplila mayangalu; khikhalajila ali ina mamayāmana. Kaja miwui thāda PROHOna azakli mayangmana; kha PROHOva wuklungli khayangna.”

⁸Chiwui thili Jessena Abinadabli hokhuida Samuelwui mangāli vāngasaka. Kala ana “PROHOna kapangkahai chi hila maningmana” jihaowa.

⁹Chiwui thili Jessena Shammahli vāngasaka. Kala ana “PROHOna kapangkhui kahai chi hila maningmana,” jihaowa.

¹⁰Kala Jessena anaomayarabing chili Samuelwui mangāli vāngasaksera. Kha Samuelna, “PROHOna athumli makapangkhuimana” da Jesseli hānga.

¹¹Kala Samuelna “Nanaomayarabing hili peiserda leila?” da Jesseli ngahāna. Chieina ana, “Paisho akha leifaya, kha ava yao kahom vāhaira” da hānga. Kala Samuelna Jesseli hānga, “Ahokhuilu; kaja a maungranglakha eina tangda ithum mapamzangmara.”

¹²Chieina mi chihovāda ali ahokhui. Asho-arep unglaka, mai hungping eina miknaola mathingrika, kala yarshova̱na. PROHOna hānga, “Hipa hina, ngakarthuida ali thao neomilu.”

¹³Chieina Samuelna thaokhong chi khuida, ali achinā ngarāwui mangāli thao neomi; kala chithang eina thuida Davidli PROHOwui manglāna chipemmihaowa. Kala Samuelna Ramahli latunghaowa.

¹⁴Chitharan PROHOwui manglā Saulwui eina pākthuihaida PROHOwui eina makathar manglāna Saulli ningrāk ngasaka.

¹⁵Kala Saulwui raobingna ali hānga, “Yanglu, Varewui eina makaphā manglāna nali ningrāk khangasakna.

¹⁶Hili khalei naraobingli, ameina tingteilā huikathei mi akha aphākhui khavai kasoranu; kala Varewui makaphā manglāna nali ningrāk khangasak atamli ana tingteilā kahui eina, na raihaora.”

¹⁷Chieina Saulna awui raobingli hānga, “Tingteilā huikathei mi akha aphākhuida ali iwuili khuirālu.”

¹⁸Yaronnao akhana ngahānkai, “Yanglu, Bethlehempa Jessewui nao akha tingteilā huitheilak kahai ina thei; a kapinga, raimina, chanhān unglaka, kala otsakla mathālaka kala PROHOna ngasokhame mi akhana.”

¹⁹Chiwui vang eina Saulna Jesseli mi chihovāda, “Nanaomayara yaokahoma Davidli hili chihorāmilu” da hānga.

²⁰Chieina Jessena khamuila zang, sāhuili kathai drakhāra̱ kala yaonao akha da khuilaga gadhā akhali shaksāmi, kala anaomayara Davidli Saulwuili chihovāhaowa.

²¹Kala Davidna vāda Saulwui otram khangatha̱li zanga. Kala Saulna ali leishilakhaowa, kala awui chāngvei phungme sāngasaka.

²²Chieina Saulna Jesseli, “David iwuili pamhaoranu, ina ali ngahānngailaka” da pao hāngchiphuna.

²³Kala Saulli Varewui eina makaphā manglā rākachida Davidna tingteilā huida ringkaphā samphang ngasaka; chithāda Saul khamathing samphanga, kala raihaida makaphā manglā chi awui eina thuihaowa.