Read Tangkhul Naga 1 SAMUEL 18 Bible Online

1 SAMUEL 18 - Tangkhul Naga bible

1 SAMUEL 18

¹Ana Saulli ngazekkup kahai eina Jonathanwui ning Davidli shāptithaowa, kala Jonathanna akhalatta leikashi thāda Davidli leishihaowa.

²Kala chithang Saulna awui shimli thanunglaga avāva̱wui shimli malatung ngasakthuwa.

³Chieina Jonathanna Davidli tuingashit akha sai; khikhalajila akhalatta leikashi thāda Davidli leishihaowa.

⁴Kala Jonathanna awui sāri raikhuilaga Davidli ngavaimi, kala awui raisāri, raighai, malā, kala awui shānneira̱ Davidli miserhaowa.

⁵Kala Saulna kachiho apam kachiva̱li Davidna yuichinga; chiwui vang Saulna ali raimiwuitungli yangkhavai haimi. Kala hi mi saikora kala Saulwui raobingwui mikyanli phālakhaowa.

⁶Davidna Philistinenaobingli sāthathaida shimli hankhaung tharan, Israelwui keinung saikorawui eina sha̱naobingna, laa kala pheichak sāda Saul awungali vāsamphangkida timbrel singda, kala tingteilābing singda ringkaphāwui laa saphungda shoka.

⁷ Kala mathānda sha̱naobing china akha eina akha laa sāngaroka, “Saulna awui thingkhali shaothata, kala Davidna thingtharāli shaothata.”

⁸Athumwui khavaokhon chi shālaga Saul malungvātlakhaowa, kala ana hānga, “Athumna Davidli thingtharā da masochikata, ile thingkha da somaya; hiya awunga ngalei eina tangda ali mikahai kathā maningmala?”

⁹Kala chithang eina thuida Saulna Davidli yangphokhaowa.

¹⁰Kala akhama kathā, Davidna thangkachida kahui thāda, ana tingteilā huida leilakha, Varewui eina makaphā manglā Saulli rāzanga, kala ana awui shimli kapumpama. Saulna awui kazei apāngli hai;

¹¹kala Saulna “Ina Davidli phākholi pharshānhaora” da machukta kazei chi phara. Kha khanishida Davidna ngarakkhuihaowa.

¹²Davidli Varena ngasomi, kha ale mangasomithuda Saulna Davidli ngacheehaowa.

¹³Chiwui vang eina awui ngalemli mahaila thingkhawui akhavā sāngasakta athumli thānzata.

¹⁴Kala PROHOna ali ngasomihaoda; Davidna awui kasāsāli athei khamathei samphanga.

¹⁵Kala awui khayuia otsak kachiva̱ theilaga, Saulna ali matakhak eina yanga.

¹⁶Kha Israel eina Judahwui mi saikorana Davidli leishi; kaja ana athumli ngasoda thanung-thanvā sai.

¹⁷Saulna Davidli hānga, “Inao ngalāva̱ kharara, Merab leili; ali napreiva̱ sākhavai ina mira; iwui vang marākta kala pingda PROHOwui rai ngararmalu.” Saulna hithāda phaninga kaja, “Iwui pāng awuitungli maparmara, kha Philistinenaobingwui pāng eina sathatranu.”

¹⁸Chieina Davidna Saulli hānga, “I khipānida, kala iwui theisā khipāda, Israelwui alungli ishāvāwui shimkhurli ina awungawui arihā sāpairakhala?”

¹⁹Kha Saulwui naongalāva̱ Merab Davidli miki kaji chi, Meholathwui Adrielli apreiva̱ sākhavai mihaowa.

²⁰Chitharan Saulwui naongalāva̱ Michalna Davidli leishiya; kala athumna chi Saulli hānga, kala china ali ningyāng ungngasaka.

²¹Saulna phaninga, “Inao ngalāva̱ hina khalen ngasā khavai Davidli mira, chithāda Philistinenaobingwui pāngna ali sāthatra.” Chiwui vang eina Saulna Davidli, “Ara na irihā sāra.” da hāngluishita

²²Kala Saulna awui raobingli, “Davidli ngathumda hithāda hānglu, ‘Yanglu, awungana nali ningyāng unglaka, kala awui mibingnala nali leishisera; chieina awungawui arihā sālu’ jilu.”

²³Chithāda Saulwui raobingna Davidli ahānga. Kha Davidna hānga, “Mishānli makazanga kachāma I kathāna, awungawui arihā saki kaji hi nathumna kateowa otna da khuila?”

²⁴Chieina Saulwui raobing china, “Davidna hithāda hangli,” da ali unghānga.

²⁵Chieina Saulna hānga, “Davidli nathumna hithāda ahānglu, awungana manho maningchāngmana, kha awui yangkashe Philistinenaobingli awungawui athut khuimida atonhui shākha akhuimilu.” Davidna Philistinenaobingwui pāngli thikhavai Saulna hi khangarānna.

²⁶Kala raobing china pao hi Davidli akahāng eina, china ali ningyāng ungngasakhaoda Davidla awungawui arihā sangaihaowa. Hāngkahai atam chi makānranglakha,

²⁷Davidna ngakarthuida, awui mi thānphunglaga Philistine mi shākhani ashaothathaowa; kala arihā sākhavai athumwui atonhui chi awungali khuiungmi. Chieina Saulna anao ngalāva̱ Michal apreiva̱ sākhavai mihaowa.

²⁸Kha Davidli PROHOna ngasokhami, kala Israel saikorana ali leikashi chi theilaga,

²⁹Saulna ngacheekhangai ngacheeya. Chiwui vang Saul Davidwui yangkashe ngasachinghaowa.

³⁰Chiwui thili Philistinewui wungnaobingna rai rāsai; kala rākhangarar kachiva̱li, Davidna Saulwui rao saikorali maiyāmeikapa. Chithāda awui ming khayākālakhaowa.