Read Tangkhul Naga 1 SAMUEL 19 Bible Online

1 SAMUEL 19 - Tangkhul Naga bible

1 SAMUEL 19

¹Kala Davidli sāthatphalungra da Saulna anaomayara Jonathan, kala awui rao saikorali hānga. Kha Saulwui naomayara Jonathanna Davidli leishilāka.

²Chieina Jonathanna Davidli hānga, “Ishāvā Saulna nali sāthat khavai ngarānda lei; chiwui vang eina ngathorshong na ning ngasharda apam akhali yāmngathumhaolu;

³kala nawui leikasapam ngalem chili ina ishāvāli chan shokngazekra; kala kalikhada ina theikakhui leiakha chi nali hāngnaoga.”

⁴Kala Jonathanna avāva̱ Saulli Davidwui pongli mathālak eina hāngmi, kala hithāda hānga, “Awungana Davidwuitungli morei masāranu; khikhalajila ana nawuitungli khikha khayon masāhailakmana; kaja awui otsakna nawui vang khamathā sheba ngasāhaira;

⁵kaja amanglā hamlaga Philistinenaopa chili ana sāthathaira, kala Israel saikorawui vang PROHOna kahaka khayui rai khuirāmihaira. Chi nana theilaga ringphai; chithākha kachiwui vang eina khayon makhalei mi Davidli sāthat khavai sākhala?”

⁶Chieina Saulna Jonathanwui tui khuida khangashit sai, “Ali masāthatlakmara kaji hi PROHOwui ming singda kahāngna.”

⁷Kala Jonathanna Davidli hokhuida saikora chi hāngsera. Kala Jonathanna Davidli Saulwui mangāli thānungda kharewui thāda ali ungngasopama.

⁸Kala rai shokluida Davidna thānlaga vāngarara, kala Philistinenaobing kachungkha sāthathaowa, chithāda sāda athum yāmserhaowa.

⁹Chiwui thili Davidna lyre huida leilakha; Saulna kazei singda shimli pamsai, kala awuitungli PROHOwui eina makaphā manglā rāzang ngasaka.

¹⁰Kala Saulna Davidli phākholi pharshān khavai sai, kha ana Saulwui eina ngarakkhuihaida kazei phākholi nganarshanhaowa. Chieina David ngathishokta yāmchangthuihaowa.

¹¹Ngathorshong sāthat khavai chithang ngayā Saulna awui paomebingli chihoda Davidshi shimli arimpam ngasaka. Kha Davidli apreiva̱ Michalna, “Aja ngayā na mayāmhaiakha, akhama nali sāthathenhaora” da hānga.

¹²Chiwui vang Michalna Davidli charfa eina chihotada ana yāmshokhaowa.

¹³Michalna mimān[3] akha petli chipethaida chiwui kuili mesamwui khumkui haimihai, kala kachon eina farora.

¹⁴Kala Saulna paomebing Davidli akhui khavai mi chihokhavā tharan Michalna, “Ava kazāda lei” jihaowa.

¹⁵Chieina Saulna paomebing chili Davidli ayang khavai hānga, “Pet eina ngazonrālu, chieina ina ali sāthatra.”

¹⁶Kala paomebing china akhayang tharan yanglu, mimān chipethailaga chiwui kuili mesamwui khumkui haimihaisai.

¹⁷Saulna Michalli, “Khisāda nana ili hithāda kapikta iwui yangkasheli yāmngasakhaokhala?” da hānga. Chieina Michalna Saulli ngahānkai, “Ana ili ‘I thuihaoga; ina khisāda nali sāthatrakhala?’ da hānga.”

¹⁸Chitharan Davidna yāmda Ramahli Samuelli asamphanga, kala Saulna ali sākahai saikora ali ahāngsera. Kala Samuel ani Naiothli apamhaowa.

¹⁹Kala “David Ramah ngaleiwui Naiothli pamda lei” kaji Saulli hānghaowa.

²⁰Chieina Saulna Davidli akhui khavai paomebing chihovai; kala marānbingli Samuelna thānda marān kasā chi athumna athei, kala paomebing chilila Varewui manglā zanghaida athumla marānphokuwa.

²¹Chi Saulli kahāng eina, Saulna khangatei paomebing chiholui; kala athumla marānkhami chili azanghaowa. Kala Saulna paomebing kathum shida chihovai, kala athumla marānkhamili azanghaowa.

²²Chieina Saulna akhalatta Ramahli vai, kala Seculi khalei ra̱khong kahaka chili vākashung eina; “Samuel eina David kali leilikhala?” da angahāna. Chieina mi akhana hānga, “Yanglu athum Ramahwui Naiothli leidalei.”

²³ Chieina ana chiwui eina Ramahwui Naiothli phāvai; kala alila Varewui manglā zanghaida, Ramahwui Naioth mavāshungranglakha eina tangda ala marānmamānda vai.

²⁴Kala ala awui kashankachon raiserhaida, khamahong eina Samuelwui mangāli chithang ngashun ngayā peida marānkhamili zanga. Chiwui vang eina, “Saulla marān akhala?” da chānjam sai.