Read Tangkhul Naga 1 SAMUEL 2 Bible Online

1 SAMUEL 2 - Tangkhul Naga bible

1 SAMUEL 2

¹ Hannahna seihā sāda hānga: “Iwuklung PROHOli masot chigatli; PROHOna ili pangngasaka. I khamorna iwui yangkashebingli mana̱shi, kaja nawui huikhamiwui vang eina ina mathāna.

²“PROHO thāda kathar khipakha maleimana, Ali langda katei maleimana; ithumwui Vare kathā lunghār maleimana!

³Langsoda tui mamatuiluilu, yākhangai tui nakhamorli mashokranu; kaja PROHOhi theiser kaje Varena, kala otsak saikora ana tama.

⁴Kapingabingwui malā tekhaira, kha khangazanana pangshap shaneikhui.

⁵Kashāngabingli pheizā ngasaka; kha khumkasābingli thongasaka. Nao kashumva̱na shini pharāhaira, kha kachungkha kapharābingna ngachakyanghaira.

⁶PROHOna sāthata kala ringung ngasaka; Kathewui ramli ana vāngasaka, kala ringngasaka.

⁷PROHOna chām ngasaka kala shāng ngasaka, ana nemtā ngasaka, ana kajuila jui ngasaka.

⁸Ana kachāmali chifawui eina khāngkhui, khavātali hotlāwui eina khāngkhuida, athumli wungnaobingli thuingaren ngasaka, kala maikhayā pam samphang ngasaka. Kaja okathuiwui pakra̱bing PROHOwuisera, kala chiwuitungli ana apuk-apagva̱ khaningkai.

⁹“Ningtongda shitkasangbingli ana mayonmira; kha makhayābingle tangkhamangli katatshokhaora; kaja, mina pangshap eina mayuimara.

¹⁰PROHOli yangkashebing akha̱-akhā ngasāra; athumwuitungli mamayāmada kazingramli ana khangangra. Okathui vāshungda PROHOna bichar sāra; ana awui wungnaoli yangmira, kala awui thao neomi kahaiya chili khayā kāngasakra.”

¹¹Chiwui thili Elkanahna awui shim Ramahli unghaowa. Kala nao china Elili ngasoda PROHOli otram ngatha̱ya.

¹²Chitharan Eliwui naomayarabing makakachanga mi ngasāsai; athumna PROHOli khayākashi maleimana.

¹³Pāngmonbingwui khangachā athishurda, kachikathāna pha̱kaphayā rākachigat tharan, pāngmonwui raobingna pāngli akasui kathum kakā marik-kapei eina ngatarda khalei hanham,

¹⁴lah khāng, lah sāham lah ketli lungli tosangda chiwui eina khaikakā chi pāngmon khalattawui yar sai. Chithāda athumna Shilohli pha̱kaphayā khuikharā tharan Israelnaobing saikorali chithāda sāchinga.

¹⁵Chili lāngmeida, athao mariktāranglakha pāngmonwui raobingna rāda pha̱phayāda khalei mi chili, “Pāngmonwui vang ruishai khavai sā milu; kaja ana nawui eina sā kahup makhuimara, kha sā kharing milu” da poi.

¹⁶Kala mi china, “Tharifalu, athao riktāfaranu, laga nawui ningkachāng eina tangda khuinaolu” jilala, “Ngga, arui miphalungra; mamiakha, ina tandi eina khuira” jihaowa.

¹⁷Chithāda sāda PROHOwui mangāli naongarābingwui morei haklakhaowa; kaja PROHOli kachigat chi sharkhara̱mihaowa.

¹⁸Samuelna nganuilakha eina thuida khamenga kachon eina kasā ephod ngavaida PROHOwui sheba sai.

¹⁹Kala ava̱va̱na agaharali ngasoda kum kachidawui pha̱kaphayā sākhavai khavā chitharan, ava̱va̱na awui vang kateowa katuma phahon akha khoplaga khuivāmimi ji.

²⁰Chieina Elina Elkanah kala apreiva̱li somi, kala Elkanahli “Nanina PROHOli chigat kahai nao hiwui mahut, nali sha̱nao hiwui eina khangatei naongarā miranu” da hānga. Chieina anina shimli latunghaowa.

²¹Kala PROHOna Hannahli phaningungmida nao vaingasaka kala mayarnao kathum kala sha̱nao khani da pharākhui. Kala naoshinao Samuelna PROHOwui mangāli otram ngatha̱da rarkai.

²²Chitharan Eli rarshunhaowa; kala anaomayarabingna Israel saikorali kasāsā, kala athumna kazip khavai kachonshim khāmong ngalemli otram khangatha̱ sha̱naobingli ngasopikazat saikora chi ana shai.

²³Kala ana, “Khisāda nathumna chikathā ot sākhala? Kaja nathumna makaphā kasā saikora ina mibingwui eina shāhaira.

²⁴Maningmana, inaongarā, PROHOwui mibingna ayarli hithāda ngayaokazat hi khamathā pao maningmana.

²⁵Kalikhada mi akhana katei akhali morei saakha awui vang PROHOna ngachammira; kha kalikha mi akhana PROHOli morei saakha khipāna ngachammirakhala?” da hānga. Kha athumna avāva̱wui khon manganāmana; kaja athumli sāthathaora kaji hi PROHOwui kaphaning ngasāhaowa.

²⁶ Chitharan naoshinao Samuel rarsangmamānda PROHOwui kala miwui khaluma nao ngasai.

²⁷Kala Varewui mi akhana Elili rai, kala ali hānga, “PROHOna hithāda hānghaira, Egypt ngaleili navā ngarāna Pharaohwui rao sāda leilakha I khalattana rāchitheimi.

²⁸ Kala Israel shang saikorawui eina pāngmon sākhavai, iwui mangāli ephod ngachālaga, iwui hanphutli nganamkaphā riktā khavai ina ali kapangkhui; kala Israelwui mibingna ili rikkatā kachigat saikora ina navāwui shimkhurli mi.

²⁹Chithakha ina kaso kahai kachigat kala pha̱kaphayā hili khisāda ngamarkhala; kala iwui Israel mibingwui kachigat kachiva̱wui eina mathāmeikap kaji china nakhalatta mathaopamlaga ili lāngda nanaomayarabingli khayā mihaokhala?

³⁰Chiwui vang Israelwui Vare PROHOna hangdalei: Nawui shimkhur kala navāwui shimkhurna iwui mangāli katang mavaila kashok-kazang yangmichingra da ina ngashithairasai; kha ara PROHOna hānghaira: Chi iwui eina katāva̱li leiranu; kaja ili khayākashi mili inala maiyā ngasakra; ili khayākashi mi chili inala khayā shira, ili ningkakachaiya saikorali ina khonshira.

³¹Yanglu, navāwui shimkhur, kala nawui shimkhurlila, ina pangshap katatmihaoki kaji atam nganaihaira; chithada sāda nawui shimkhurli khararnao akha eina tangda maleisamara.

³²Chieina Israelwuitungli somida mataikasang chi theilaga nana wukkhanangda mikpaishira; kala atam kachida nawui shimkhurli khararnao akha eina tangda maleiluimara.

³³Iwui hanphutpamwui eina makatathaila pamki kaje nawui mi chila amikli chāra̱ longra kala malung ringra, kala nawui shimkurwui eina mataikasang athum miwui raighai eina thira.

³⁴ Kala nanaomayara khani, Hophni eina Phinehasli, hina nali machutkhui khavai sāra; ani thangkha thitkha sāra.

³⁵Kala iwui ningli ningkachāng saki kaje ningtongda shitkasanga pāngmon akha ina shokngasakra; kala ina ali makhangachei shimkhur sakāmira, kala iwui thao eina neomi kahai chiwui mangāli ana kashok-kazang yangmichingra.

³⁶Kala nashi shimkhurli kataibing kachiva̱na ali lupāsā, lah khamuitang rāpoda, ili zāt ngahomkhamāngla samphang khavai pāngmonpamli kasangmilu” da rāpora.