Read Tangkhul Naga 1 SAMUEL 22 Bible Online

1 SAMUEL 22 - Tangkhul Naga bible

1 SAMUEL 22

¹ Davidna chiwui eina yāmlaga Adullamwui lungkhurli angathumpama; kala achināngarā kala ashi avāva̱shi shimkhurna chi kashā eina, athumna chili ali asamphanga.

²Kala kakhanang kachiva̱, leiman kazanga kachiva̱, kala ningyāng makhaunga kachiva̱, awuili rākazipserda ana athumwuitungli kathāna sāhaowa. Kala athum ali ngasoda mi shāmati sha̱khana.

³Kala Davidna chiwui eina Moabwui Mizpehli vai; kala ana Moabwui awungali hānga, “Varena iwui vang khi sāngasak khangaikhala kaji ina matheikhuiranglakha eina tangda ishāvā eina ishāva̱ nawuili pamsa ngasak khavai kapona.”

⁴Kala Davidna raipamli leilakha eina tangda, awui shimkhur Moab awungawui ngalemli pamchingsai.

⁵Kala Gad marānna Davidli hānga, “Raipanli mapamchingalu, kha Judah ngaleili vālu.” Chieina Davidna chiwui eina Hereth ngahongli vāhaowa.

⁶David eina awui mibing pamkhavai theihaira kaji Saulna shāhaowa. Atam chili Saulna kazei singlaga Gibe-ahwui kaphungtung tamarisk akhawui azingli pamsai, kala awui mibingna kuimareida nganingsai.

⁷Kala Saulna ali kuimareida khanganinga awui raobingli hānga, “Benjaminnaobing, nganālu, Jessewui naona nathum kachiva̱li lui kala drakhā yāmgui mirala kala nathum saikorali thingthingwui, kala shāshāwui otva̱bing sāngasakrala?

⁸Kaja nathum saikora ngarumda ili mithit khalen masāmala? Inaomayarana Jessewui naomayarali longnao sākakhui tharan ili khipākhana mahāngmana, lah iwui raobingli inaomayarana ning ngatha̱ ngasakta ajawui hithāda ili makaphā sākhavai rimkapam hi thatheilaga khipākha iwui vang wukmakhanangmana, kahāngla mahāngmana.”

⁹Chieina Saulwui raobingwui ngachaili nganingkasā Edomwui mi Doegna ngahānkai, “Jessewui naomayara Nobli Ahitubwui naomayara Ahimelechwuili kharā ina thei,

¹⁰kala ana, PROHOna awui vang khi hāngkhala kaji rāngahāna, kala ali kashakazāla mi, kala ali Philistinepa Goliathwui raighai chila khuimi.”

¹¹Chieina awungana, Ahitubwui naomayara pāngmon Ahimelechli, kala Nobli pāngmon sāda khalei avāva̱wui shimkhur saikorala ahokhuilu da kasoi; kala athum saikora awungawuili rai.

¹²Chieina Saulna, “Nganālu, Ahitubwui naomayara” da hānga. “Amei, I hili leili” da ana ngahānkai.

¹³Kala Saulna ali hānga, “Kachiwui vang eina Jessewui naomayarali ngasoda ili mithit khalen sākhavai ngarānkhala? Kala kashakazāla, raighaila mida Varewui tui hāngmilaga, aja ili rimkazat khiwui vangkhala?”

¹⁴Chieina Ahimelechna awungali ngahānkai, “Nawui rao saikorawui ngachaili narihā David thāda ningtongda shitsangkapai, nali ngākkhame, kala raithanme, kala nawui shimkhurli a thada khipa khayā kameikapkhala?

¹⁵Varewui tui ina ali hāngkhami ajana kharela? Maningmana! Awungana hi narao ina shokkhangasakna majiranu, lah ishi shimkhurli ningkhamaong masāmilakalu; narao ina hiwui pongli, kateoala, kahakala khikha akhanida matheilakmana.”

¹⁶Kala awungana hānga, “Ahimelech, na kala navāwui shimkhur saikora thilakra.”

¹⁷Kala awungana shantri chili hānga, “PROHOwui pāngmonbing chili sāthathaolu; khikhalajila Davidwui khayon hili athumla zanga, kala athumna Davidna yāmkahai theilaga ili mahānglakmana.” Kha awui raobing china PROHOwui pāngmonbingwuitungli athumwui pāng maparngaithuwa.

¹⁸Chieina awungana Edompa Doegli hānga, “Pāngmonbingli nana sāthathaolu.” Chieina Edompa Doegna vāda pāngmonbing chili sāthathaowa, kala ana chithang, khamanaka ephod khangavai pāngmon hangchishatta phangā sāthata.

¹⁹Kala pāngmonbingwui keinung Nobli khalei sha̱nao mayarnao, naoshinao mateila, seila, yaola, gadhāla katonga ana raighai eina sāthatserhaowa.

²⁰Kha Ahitubwui ara̱ kaja Ahimelechwui naomayara Abiathar kaho chi, amāng chakshokta Davidwuili yāmvāhaowa.

²¹Kala PROHOwui pāngmonbing Saulna sāthatserhaira da Abiatharna Davidli ahānga.

²²Chieina Davidna Abiatharli hānga, “Chithang Edompa Doeg leikasā chi theilaga, mashoila ana Saulli unghāngra da ina thei. Nashāvāwui shimkhurwui mi kathi saikora chi ina shokkhangasakna.

²³Mangacheelu, iwuili pamlu; kaja manglā khuiki kaji mi china namanglā khuikhavai sāda lei; ili ngasolakha na kalā mashimara.”