Read Tangkhul Naga 1 SAMUEL 23 Bible Online

1 SAMUEL 23 - Tangkhul Naga bible

1 SAMUEL 23

¹Chitharan mibingna, “Yanglu, Philistinenaobingna Keilahli rai ngararda athumwui zātshimla ngaponthuihaira” da Davidli rāhānga.

²Chieina Davidna PROHOli, “Ina vāda Philistinenaobing hili angararrala?” da khangahān eina “Philistinenaobingli angararda Keilah kankhuilu” da PROHOna hānga.

³Kha Davidwui mibingna ali hānga, “Yanglu, ithumna Judah ngalei hili ngacheerang leilaga kathāda Keilahli ithumna Philistinenaobingli angararrakhala?”

⁴Chieina Davidna PROHOli ngahānlui. Kala PROHOna ali ngahānkai, “Ngakarthuilu, Keilahli tāda Philistinenaobingli angararlu, kaja ina Philistinenaobingli nawui pāngli horsangmira.”

⁵Chieina David eina awui mibingna Keilahli tāngararda Philistine kachungkha sāthata kala athumwui sha̱keila kachungkha khuiunga. Chithāda Davidna Keilahwui mibing kankhui.

⁶Keilahli leilakha Ahimelechwui naomayara Abiatharna Davidwuili yāmkhavā tharan, ana ephod akha khuivai.

⁷David Keilahli rāhaira kaji Saulli hānghaowa. Kala Saulna hānga, “Varena ali iwui pāngli horsangmihaira; kaja mariwui ngavei khalei keinungli ayāmsangda akhalatta shungnamhaira.”

⁸Chieina Saulna raimi saikorali Keilahli tāda Davidli kala awui mibingli tākuinam khavai hokhuisera.

⁹Saulna ali makaphā sākhavai ngarānhaira kaji Davidna theihaoda pāngmon Abiatharli, “Ephod khuirālu” da hānga.

¹⁰Chieina Davidna hānga, “O PROHO, Israelwui Vare, iwui vang eina Saulna Keilah keinung shimān ngasak khavai rāra kaji shāhaira.

¹¹Keilahwui mibingna ili Saulwui pāngli horsangmihaorala? Narao ina kashā thāda Saul tālakrala? O PROHO, Israelwui Vare, ina kapona naraoli kahāngmilu.” Chieina PROHOna, “A tāra” da hānga.

¹²Chiwui thili Davidna hānga, “Keilahwui mibingna ilila iwui mibinglila Saulwui pāngli horsangmirala?” Kala PROHOna “Horsangmihaora” da hānga.

¹³Chieina Davidla awui mibingla, athum shātharuk shakha Keilah horhaida athumwui thuikapaipaili thuihaowa. David yāmhaira kaji Saulli kahāng eina ana rai sākhavai thāhaowa.

¹⁴Kala Davidna Ziph lamhāngwui kaphungli raipan asālaga apamhaowa. Saulna thangkachida Davidli phāchinga, kha Varena Davidli awui pāngli mamilakmana.

¹⁵Saulna awui manglā khuikhavai phākazatwui vang David ngacheehaowa. Davidva Horeshwui Ziph Lamhāngli pamsai.

¹⁶Kala Saulwui nao Jonathanna Horeshli vāda Davidli asamphangda Varewui mingli ning lumngasaka.

¹⁷Kala ana hithāda hānga, “Mangacheealu, kaja ishāvā Saulna nali masamphangrarmara; nana Israelwuitungli awunga sāra, kala ina nawui thi zangra kaji hi ishāvānala thei.”

¹⁸ Kala anina PROHOwui mingli tuingashit akha sai; laga Davidna Horeshli pamhaowa, kala Jonathanna shimli latunghaowa.

¹⁹ Chiwui thili Ziphwui mibingna Gibe-ahli vāda Saulli ahānga, “Horeshli, Jeshimonwui azingshong Hachilah kaphungli Davidna raipan sālaga pamda lei kaji matheimala?

²⁰O awunga, tālu, nawui ningkachāng athishurda ithumna ali nawui pāngli horsangmira.”

²¹Saulna hānga, “Ili nathumna leishikhamiwui vang PROHOna somiranu.

²²Zatlu, yangkazakkhuilu; awui pamkhavai chi kachilikhala kaji yangkhuilu; kala khipāna theikhala kaji; kaja a hi shinglak kahai mi akhana da ili hānga.

²³Chiwui vang eina awui ngathum khavai pam saikora yangkazakkhuilaga kashenga pao rāhāngluilu. Chithakha ina nathumli ngasovālaga Judahnaobing thingthing khalei ngachaiwui eina ina aphākhuira.”

²⁴Chieina athumna Saulli rida Ziphli vāhaowa. Chitharan David kala awui mibing Arabahli khalei Jeshimonwui azingshong Moanwui lamhāngshong leisai.

²⁵Saul kala awui mibingna ali phākhavai vai. Kala chi Davidli hānghaowa; chiwui vang eina Davidna Moan lamhāngli khalei lungkaipamli tāhaowa. Kala Saulna chi kashā eina, ana Moan lamhāngshong Davidli kharomvai.

²⁶Saulna phungrei akhashong vai, kala David eina awui mibingna lākhavāk zata. Saul eina awui mibingna tukkhui khavai ngaphananai kaji eina Davidna thaklāk eina yāmkhavai sai,

²⁷chichangli paome rālaga Saulli hānga, “Thakta unglu, kaja Philistinenaobingna rai rātāhaira.”

²⁸Chieina Saulna Davidli makharomluila Philistinenaobingli ungngararhaowa; chiwui vang eina apam chi Ngathikashokwui Lunghār hoi.

²⁹Kala Davidna chiwui eina kālaga En-gediwui raipanli apamhaowa.