Read Tangkhul Naga 1 SAMUEL 26 Bible Online

1 SAMUEL 26 - Tangkhul Naga bible

1 SAMUEL 26

¹ Ziphbingna Gibe-ahli rāda Saulli hānga, “Jeshimonwui zingshoshong Hachilah kaphungli David yāmkhangathum maningmala?”

²Chieina Saulna Israelwui mi thingkathum kapangkhuilaga Ziphwui lamhāngshong Davidli phātai.

³Kala Jeshimonwui zingshovāk khalei shongfa ngalem Hachilah kaphungli rairum asai. Kha Davidna lamhāngli pamsāda Saul lamhāngli rāhaira kaji kashā eina,

⁴Davidna ara̱yang khavai chihoda Saul rākachangkhata da theihaowa.

⁵Chiwui thili Davidna Saulwui rairum chili vai; kala Saul eina Nerwui naomayara raimi kathāna, Abner aniwui pikhavai pam theihaowa; raimibingna awui kuikhamareili rairum sāda alungthungli Saulna pipama.

⁶Chiwui thili Davidna Hitpa Ahimelech eina Zeruiahwui naomayara Joabwui achinā Abishaili hānga, “Saulwui rāmrahli nani ili khipa ngasotānikhala?” Abishaina, “I nali ngasotāra” da hānga.

⁷Chieina David eina Abishaina ngayā raimi pamli vai; rāmrahlungli Saul pisai; kala pet kuishakli kazei shunhailaga Abner kala raimibingna kuimareida pisai.

⁸Chieina Abishaina Davidli hānga, “Aja nawui yangkasheli Varena nawui pāngli horsangmihaira; iwui kazei eina ali ngashumkha eina ngaleili ngaruiwutmihaoga, ali khanishida mangashumluimara.”

⁹Kha Davidna, “Ali masāthatpaimara; kaja PROHOna thao neomi kahaia chili pāng kāda khipāna morei maleimarakhala?” da Abishaili hānga.

¹⁰Kala Davidna hānga, “PROHOwui ming singda kahāngna; PROHOna ali sāthatra, lah awui kathi atam rārāsara, maningakha a raili vāda athira.

¹¹ PROHOna thao neomi kahaia chili pāngkakā PROHOna mamayāmana; kha akuishakli shunkahai kazei eina tara̱ phungkhavai chi khuilu, laga thuiusa.”

¹²Chieina Saulwui kuishakli shunkahai kazei eina tara̱ phungkhavai chi Davidna khuilaga thuihaowa. Khipānakha chi matheimana, lah khipākha mathuimathukmana; kaja athum piserhaowa, khikhalajila PROHOwui eina piphup kahai athumwuitungli tāshungmihaowa.

¹³Chiwui thili Davidna phungrei lākhashong vāhaowa, athumwui ngachaili chāngām kahakva̱na mataka, kala ana katāva̱ phungreitungli kānganinga;

¹⁴kala Davidna raimibing kala Nerwui nao Abnerli hoda hānga, “Abner, na mangahānkāmarala?” Chieina Abnerna, “Awungali kaho chi khipākhala?” da ngahānkai.

¹⁵Kala Davidna Abnerli hānga, “Na mi maningmala? Israelwui alungli na kathā khipā leikhala? Chithakha na khisāda awunga nameili makhamayonkhala? Kaja awunga nameili sākazam khavai mi akha rāzanga.

¹⁶Nawui ot kasā hi maphāthura. PROHOwui ming singda kahāngna, na thingayiya, khikhalajila PROHOna thao neomi kahaiya nashameili mathāda mayangmana. Awungawui kuishakli shunkahai kazei eina tara̱ phungkhavai chi kali leilikhala?”

¹⁷Saulna Davidwui khon machuthaoda hānga, “Inaomayara David, hi nawui akhonla?” Kala Davidna “Mha, amei, O awunga, hi iwui akhonna” da ngahānkai.

¹⁸Kala ana hānga, “Ishameina naraoli kharomkazat khiwui vangkhala? Ina khi sahaoda, ipāngli khi khayon leikhala?

¹⁹Chiwui vang eina amei awunga, narao iwui tui khanganāmilu. Kalikhada ili makhamayā khalei hi PROHOna naningli ngatha̱ khangasakna jiakha pha̱kaphayā hi ana khuimiranu. Minakha, ali PROHOna khonkashi ngasaranu; kaja PROHOwui eina samphang khangayi yar chi masamphang ngasakla aja athumna ili kashamhaida hānga, ‘Thuiulu, khangatei varebingli akhorumlu.’

²⁰Chiwui vang eina PROHO khaleipamwui eina tāda iwui ashee ngaleili matātung ngasakmilu; kaja Israelwui awungana imanglā khuikhavai vānao kakap thada phungreili ili rengzathaira.”

²¹Chieina Saulna hānga, “Ina lāngda sāhaira; inao David, latunglu, kaja ina nali makaphā masāluimara; khikhalajila aja imanglā nawui mikyanli saklak eina khui, yanglu, ina mangkhama̱ otsak sāhaira, kala nguilak eina sāhaira.”

²²Kala Davidna ngahānkai, “O awunga! Nawui kazei hili leili, yaronnao akhali kākhui ngasaklu.

²³Khangarong kala ningtongda shitkasang mi kachiva̱li PROHOna sāman mi; kaja aja PROHOna nali iwui pāngli horsangmi, kha ina PROHOna thao neomi kahaia chili ipāng maparza̱mana.

²⁴Yanglu, namanglāli ina hiyākha sakta kaphaning thāda PROHOnala imanglāli chiyākha sakta phaningmiranu, kala kachotkachāng saikorawui eina ili ngatangmiranu.”

²⁵Chieina Saulna Davidli hānga, “Inaomayara David! na sokhami ngasaranu! Nana ot kachungkha sāra kala ungshungserra.” Kala Davidna awui apongshong thuihaowa, Saulna awui pamli latunghaowa.