Read Tangkhul Naga 1 SAMUEL 27 Bible Online

1 SAMUEL 27 - Tangkhul Naga bible

1 SAMUEL 27

¹Kala Davidna awui ningli, “Thangkha mathangkha I Saulwui pāngli thisangphalunghaora; Philistine ngaleili yāmkhavāna phameishukra; kaja chili vahaiakha Saulna phāsānhaida Israelwui alungli kānda makharomraluimara, kala apangwui eina ina ngathishokra,” da phaninga.

²Chieina Davidna awui mi shātharuk chi thānphungda, Maochwui naomayara, Gathwui awunga Achishwuili vai.

³Kala Achishwui ngalemli Davidla, awui mibingla kala kachichāshi shimkhur katonga apamhaowa; kala David preiva̱ khani, Jezreelwui Ahino-am eina Carmelwui Nabal preiva̱ Abigaila zangda apamserhaowa.

⁴Kala David Gathli yāmvāhaira da Saulli hāngkahai eina maphaluithuwa.

⁵Chiwui thili Davidna Achishli hānga, “Kalikhada nawui mikyanli ili leishimiakha iwui pamkhavai ngalei akhawui keinung lungli sompam khavai khamayāmilu; kaja nawui raona kathāda nawui wungnao keinung hili nali ngasopamkachangrakhala?”

⁶Chiwui vang chithang Achishna ali Ziklagli pamkhavai mihaowa; chiwui vang aja eina tangda Ziklag hi Judah awungawui ngaleili zangkahaina.

⁷Kala Davidna Philistine ngaleili kapam kumkha kachāng matina.

⁸Chitharan Davidna thānda awui mibingna, Egypt ngaleili kharewui eina leikasā apam, Geshurbing, Girzibing kala Amalekbingli rai atai. Egypt ngaleiwui Shur tāshungda achālakha pamkasābingna.

⁹Davidna yuihaida sha̱naola mayarnaola akhanida mashākla sāthatserhaowa; kha yao, sei, gadhā, ut kala kashankachon katonga khuiphungda Achishwuili unga.

¹⁰Achishna, “Aja khipāshili akhangararkhala?” da ngahānakha, Davidna, “Judahwui Negeb,” kala Jerahmeelwui Negeb, lah “Kenbingwui Negebli akhangararna.” da ngahānkai.

¹¹Kala Davidna sha̱naola mayarnaola sāthatserhaowa, kaja, Davidna hithāda sai kaji chi Gathli unghānghaipaishina da akhala matai ngasakmana. Ana Philistineli leilakha chithāda sāchinga.

¹²“Davidli Israelnaobingna mamayāngailakmana da kaphaningwui vang; ana iwui rao sāchingra” da Achishna phaninglaga Davidli ning horsanga.