Read Tangkhul Naga 1 SAMUEL 28 Bible Online

1 SAMUEL 28 - Tangkhul Naga bible

1 SAMUEL 28

¹Atam chitharan Philistinenaobingna Israelli ngarar khavai athumwui raimi kazipkhui. Kala Achishna Davidli hānga, “Theilu, kaja nala nawui mila iwui raimili ngasoda rai vāphalungra.”

²Davidna Achishli hānga, “Phālaka, naraona khi sāmishapkhala kaji nana theinaora.” Kala Achishna Davidli hānga, “Phālaka, ina mathiranglakha eina tangda na iwui ngākkhame sāra.”

³Chitharan Samuel thihaoda Israel saikorana awui vang chapngachāda awui keinung Ramahli chifahaowa. Kala Saulna kazei kazang sākatheibing kala laivā kasābingli lam chiwui eina kashamserhairasai.

⁴Philistinenaobingna Shunemli rairum sāda akaziphaowa; kala Saulna Israel saikora kazipkhuilaga Gilboali rairum sai.

⁵Saulna Philistinewui raimibing theilaga ngacheehaowa, kala malung mapampaithuwa.

⁶ Kala Saulna PROHOli khangasan eina, PROHOna ali mangahānkāmithuwa, mang nganālala, Urim yanglala, marānbingnala khikha matheirarthuwa.

⁷Chieina Saulna awui raobingli, “Ina ngahānkhuipai khavai khanong sha̱nao akha phākhuilu” da hānga. Kala awui raobingna “Endorli khanong akha leili” da hānga.

⁸Chieina Saulna azak ngacheida kachon khangatei ngavailaga mi khani thānphungda preiva̱ chili ngayā vai. Kala, “Iwui vang khanong yanglaga, ina ming singda nali kahānga chili hokhuimilu” da hānga.

⁹Preiva̱ china, “Saulna kazei sākatheibingli kala leivā kasābingli kathāda kashamhaokhala kaji nala thei. Laga kathāda ili thikhavai nana hithāda khalen rākasangkhala?” da hānga.

¹⁰Kha Saulna PROHOwui ming singda, “PROHOwui ming singda kahāngna, nawuitungli hiwui vang khikha kashong kharāng marālakmara” da khangashit sai.

¹¹Chieina preiva̱ china, “Thakha khipāli homirakhala?” da khangahān eina, “Samuelli homilu” da ana hānga.

¹²Preiva̱ china Samuelli kathei eina, ana panglāk eina vaoda Saulli hānga, “Ili khisāda minamkhala? Na Saulna.”

¹³Awungana ali hānga, “Mangacheealu, nana khi theikhala?” Preiva̱ china Saulli hānga, “Ina vare akha ngaleiwui eina kashok thei.”

¹⁴Ana hānga, “Awui azak kathākhala?” Preiva̱ china, “Khararnao akha wungnao sāri ngavailaga shoka,” da hānga. Samuelna kaji theihaoda Saulna amai mashunzangda khayākashi mi.

¹⁵Chieina Samuelna Saulli, “Ili shokluda khisāda sheikhautkhala?” da hānga. Saulna hānga, “I wukkhananglākhaowa, kaja Philistinenaobingna ili rai rāngararhaowa, kala Varena iwui eina mai ngareithuihaida mangahānkāmithuwa, manglila, marānbinglila mahāngmilakthuwa; chiwui vang eina khi kasā phāmeirakhala da nali ngahān khavai kahona.”

¹⁶Chieina Samuelna hānga, “PROHOna nali mamayāmada mai ngareithuihaida nawui yangkashe ngasahaiakha, khisāda ili ngahānkhala?

¹⁷PROHOna ili hangkhangasak athishurda kasāna; kaja nawui wungram ngakaida nawui khongnai Davidli mihaira.

¹⁸Khikhalajila nana PROHOwui tui makhuikasangwui vang, kala PROHOna Amalekli malungkhavāt chiwui athishurda makasawui vang aja PROHOna hi shokkhangasakna.

¹⁹Chili lāngda nali ngasoda Israellila Philistinenaobingwui pāngli horsangmihaora; kala akhama nashi vānaongarā ili ngasopamra; PROHOna Israelwui raimibingla Philistinewui pāngli horsangmira.”

²⁰Samuelwui tui chi shālaga Saulna ngacheenahaida matheithang eina pisanghaowa. Kala ngashun ngayā maphazālak kajiwui vang yāng kānhaowa.

²¹Kala preiva̱ china Saulli rāyanglaga awui khangachee chi theida, “Yanglu, narao ina nawui tui khuida, imanglā hamlaga nana sālu kaji chi sāhaira.

²²Chiwui vang eina narao iwui tuila kakhuimilu; khamui ahangkha khuimiga, kala shongfali mavān khavai kazākhuilu” da hānga.

²³Ana “Mazāmara” jihaowa. Kha awui raobing eina preiva̱ china suisui kaji eina mayahaowa. Chieina ngaleitungli pikasāwui eina petli thuipama.

²⁴Preiva̱ china asākakā seinao akha keisāda, ana totot taithatkhui, kala chieina khawok makazang khamui sākhui,

²⁵kala preiva̱ china Saul kala awui raobing chili kashakazā chi khuimi, kala athumna chi zakhui. Athumna phazākhuilaga chithang ngayā thuihaowa.