Read Tangkhul Naga 1 SAMUEL 3 Bible Online

1 SAMUEL 3 - Tangkhul Naga bible

1 SAMUEL 3

¹Kateowa naoshinao Samuelna Eliwui azingli PROHOli otram ngatha̱sai. Chitharan PROHOna mili chan mangazekphāphāmana, kala marāmahāmiphāphāmana.

²Atam chitharan Eli ngazanhaida mik mathāda makathei atamna, chieina awui pamli pida leisai;

³Varewui thaomei chila masashimitrangsai, kala Samuelna Varewui ningkhami oko haikhavai pam PROHOwui shimlungli pihairasai.

⁴Chieina PROHOna, “Samuel! Samuel!” da kaho eina, ana “I hili leili!” da ngahānkai,

⁵kala ana Eliwuili yongvāda, “I hili leili, kaja nana ili hoi” da ahānga. Kha ana “I mahomana, ungpiluihaolu” da hānga. Chieina ana ungpihaowa.

⁶Kala PROHOna, “Samuel!” da raholuishita kala Samuelna ngakarthuida Elili, “I hili leili, kaja nana ili hoi” da ahānga. Kha ana, “I mahomana, inao; ungpiluihaolu” da hānga.

⁷Samuel PROHOli matheilakrangsai, PROHOwui tuila ali maphongmilakrangsai.

⁸PROHOna Samuelli kakathuma raholuishita; ana ngakarthuida Elili, “I hili leili, kaja nana ili hoi” da hānga. Chieina nao hili PROHOna kaholakra da Elina phaningkhui.

⁹Chiwui vang eina Elina Samuelli hānga, “Ungpiulu, kala kalikhada ana raholuishitakha, ‘PROHO, hāngmilu kaja narao I nganādalei da ngahānkālu.’” Chieina Samuelna awui apamli ungpihaowa.

¹⁰Kala PROHOna ranganingda kharewui tākam eina, “Samuel! Samuel!” da hoi. “Kahāngmilu, kaja narao ina nganādalei.” da Samuelna ngahānkai.

¹¹Chieina PROHOna Samuelli hānga, “Yanglu, ina Israelwui alungli sākida khalei ot hi khanā khani kakā kachiva̱na shāda nganaringhaira.

¹²Chithang ina rida hāngkahai athishurda khare eina thuilaga khanao eina tangda Eliwui shimkhurli ungshung ngasakra.

¹³Kaja ana kathei khayonkhamāng chiwui vang ina awui shimkhurli katang makhavai tandi miki jihaira kaji ina ali hānga, kaja anaomayarabingna ili chipata, kala ana athumli mahāngmachinmana.

¹⁴Chiwui vang eina Eli shimkhurwui khayonkhamāng hi pha̱kaphayā lah kachigat hina atam kachida mapheomirarlakmarada ina ngashit kahaina.”

¹⁵Samuelna ngathor eina tangda piya; chiwui thili ana PROHOwui shim khāmongbing ashohaowa. Kala Samuelna ali rākhamahā chi Elili hāngkida ngacheehaowa.

¹⁶Kha Elina Samuelli hokhuida hānga, “Inaomayara Samuel!” Kala ana, “I hili leili.” da ngahānkai.

¹⁷Kala Elina hānga, “Ana nali rakahāng chi khikhala? Ili mathumhailakalu. Kalikhada ana kahahāng chi nana thumhaiakha Varenala nali chithada sāra.”

¹⁸Chieina Samuelna mangathumlakla katonga chi hānga. Kala Elina hānga, “Chi PROHOna; ana awui vang phara kaji chi sāranu.”

¹⁹Kala Samuelna rarsangmamānda PROHOna ngasomi, kala awui tui akhala mangapatlakmana.

²⁰Kala Israel saikora Dan eina thuilaga Beer-sheba vāshungda, Samuel hi PROHOwui marān akhana da theikhui.

²¹Kala Shilohli PROHOna Samuelli rachitheiluiya, kaja PROHO akhalattana Samuelli awui tui eina rāphongmiluishita.