Read Tangkhul Naga 1 SAMUEL 4 Bible Online

1 SAMUEL 4 - Tangkhul Naga bible

1 SAMUEL 4

¹Kala Samuelwui tui Israel saikorali vāshunga. Chitharan Israelna Philistinenaobingli rai ngarar khavai, athumna Ebenezerli rairum vasai, kala Philistinenaobingna Aphekli rairum sai.

²Philistinenaobingna Israelli ngasungda angaher eina shoknganinga, kala rai alung kazang eina, Israelli Philistinenaobingna maikashi mida mi thingmati sha̱kha thihaowa.

³Kala raimibingna shimli hankhaung tharan Israel khararnaobingna, “Kachiwui vang eina PROHOna ithumli Philistinenaobingwui mangāli maishi ngasakhao? Ithumna PROHOwui tuingashit oko chi Shilohwui eina hili khuiunghaosa; chithākha ana ithumwui alungli rāda yangkashebingwui pangshap eina ithumli kanmira” da hānga.

⁴ Chieina Shilohli mibing chihovai, kala cherubim tungli chipam kahai, saikorawui PROHOwui tuingashit oko chi chiwui eina khuiunga, kala Eliwui naomayara Hophni eina Phinehasna Varewui tuingashit oko chili ngasorai.

⁵PROHOwui tuingashit oko chi rāmrahli khuikhaung eina, Israel saikorana panglāk eina vaowa, chiwui vang ngalei nganukyikhaowa.

⁶Kala akhon chi kashā eina Philistinenaobingna, “Hebrewnaobingwui rāmrahli akhon hiyākha kashok khiwui vangkhala?” da hānga, kala PROHOwui ningkhami oko khuirāhaira kaji shālaga,

⁷Philistinenaobing ngacheehaowa; kaja athumna hānga, “Vare akha rāmrahli rāhaira! Ithum khonkashi ngasahaira! Khikhalajila hikathā khareli mashoklakranga.

⁸Ithum kalākashi! Hiyākha kapinga varebingwui eina khipāna kanshokmirarrakhala? Egyptnaobingli lamhāngli kazātkashi yur eina shimān ngasak kahaiya varebing chi hina.

⁹Malung pinglu, mayarnao akha thāda, O Philistinenaobing, Hebrewnaobingna nathumli raonao sākasā thāda mangasā khavai, nathum khalatta mayarnao thāda sālu kala ngararlu.”

¹⁰Chiwui vang Philistinenaobingna rai ngarara, kala Israelli mayuithuda athum ichichāwui shimli yāmungserhaowa; kala chili tarakha sāthathaowa, kaja Israel pheiwui raimi thingthumrā thisanghaowa.

¹¹Kala Varewui tuingashit oko chi khuithuihaowa; kala Eliwui naomayara khani, Hophni eina Phinehasli sāthathaowa.

¹²Chithang ngalāngda Benjaminwui mi akha, kachon serkhākta, akuili ngalei neolaga, raiphungwui eina Shilohli yongunga.

¹³Ana ungkashung tharan, Elina shongfa ngalemli awui pamkhongli pamda ngashānsai; kaja, Varewui oko khuithui kahai chiwui vang ngacheeshunhaowa. Kala mipa china pao chi ungkahāng eina keinungwui mi saikora chapngachai.

¹⁴Ngurngur kahai chi shālaga Elina, “Ngaunlop kahai akhon hi khikhala?” da ngahāna. Chieina mipā china ngasamrāda Elili hānga.

¹⁵Chitharan Eli kum hangchikoda chishat kashunghaoda amik ngazanhaida matheirarthuwa.

¹⁶Kala mipa china Elili hānga, “Raiwui eina khaunga chi ina; aja raiwui eina yāmkhaungna.” Chieina ana, “Kathāda leilikhala inao?” da ngahāna.

¹⁷Pao khuikhaunga china, “Philistinenaobingwui mangāli Israel yāmserhaowa; mila kachungkha sāthathaira; nanaomayara khani, Hophni eina Phinehasla thihaira, kala Varewui okola ngapaithuihaira.”

¹⁸Ana Varewui okowui tui hangkhaleoda, ngavei ngalemli awui pamkhavaiwui eina matheida pitāhaowa; kala akahung tekhaida thihaowa; kaja sarnahaida mangayuikhuirarthuwa. Ana Israelli kum hangmati bichar sarai.

¹⁹Chitharan arihāva̱, Phinehas preiva̱ nao asaklamhairasai. Varewui oko ngapaithuihaowa kaji pao, kala awova̱la, agaharala thihaira kaji shālaga nao ra̱katurhaowa.

²⁰Kala a thinanai ali yangkhame sha̱naobing china, “Mangacheealu, mayarnao akha shokhaira” da hānga. Kha ana khikha mangahānkāmana, saktala manganāsangmana.

²¹Kha ana naoming Ichabod phokmida hānga, “Tekhamatei chi Israelwui eina pākthuihaira!” kaja Varewui okola ngapaithuihaowa kala awova̱la agaharala thihaowa.

²²Ana hānga, “Tekhamatei chi Israelwui eina pākthuihaira kaja Varewui oko ngapaithuira.”