Read Tangkhul Naga 1 SAMUEL 5 Bible Online

1 SAMUEL 5 - Tangkhul Naga bible

1 SAMUEL 5

¹Philistinenaobingna Varewui oko ngapaikhuida athumna Ebenezerwui eina Ashdodli khuivai;

²chieina Philistinenaobingna Dagonwui shimli khuiungda Dagonli ngalengda unghai.

³Kala akhama kathā Ashdodwui mibingna ngathorthakva̱ thuikhayang tharan, yanglu, PROHOwui oko ngalemli Dagon ngakhumshām eina leisai. Chieina athumna kharewui tākam eina khangmathotluishita.

⁴Kha akhama kathā ngathorthakva̱ ayanglui kaji eina, yanglu, PROHOwui oko mangāli ngakhumshāmhaida Dagon angunmāng leisai; kaja akuila, apangla katatshokhailaga khāmongpheili leisai.

⁵Chiwui vang eina Dagonwui pāngmonbing kala chiwui shimli kazangbingla aja eina tangda khāmongpheili manaikaza̱ chiwui vangna.

⁶PROHOwui pāng Ashdod mibingwuitungli saklak eina tāngasaka; Ashdod kala chiwui luingnaili khalei mibingli PROHOna khangachee-khangachā kala moksā kazāt zakshilāk eina rāngasaka.

⁷Kala Ashdodwui mibingna kashoshok chi theilaga, “Israel Varewui oko hi hili mahaiphalungmara; kaja awui tandi hi ithum kala ithumwui vare Dagonwuitungli saklak eina tāngasakhaira.” da athumna hānga.

⁸Chieina athumna Philistinewui wungnaobingli hokhuiserda “Israelwui Varewui oko hili ithumna khisausi?” da hānga. Athumna, “Israelwui Varewui oko chi Gathli khuiunghaoranu.” da ngahānkai. Chieina athumna Israelwui Varewui oko chi Gathli khuivāhaowa.

⁹Kha athumna chili khuikhavā eina keinung chilila, PROHOna tandi mida khararnaosan mateila keinung chili moksā shokserhaoda khangacheena nganukyikhaowa.

¹⁰Chieina athumna Varewui oko chi Ekronli chihovāhaowa. Kha Ekronli khuikhavā tharan chiwui mibingna, “Ithumwui mibingli sāthat khavai Varewui oko chi ithumli khuikharāna.” da mamayāthuwa.

¹¹Chiwui vang eina, Philistinewui wungnao saikorali hokhuilaga, “Israelwui Varewui oko chi chihounghaolu, kala awui pamli unghaoranu, chieina china ithum kala ithumwui mibingli masāthatmara.” da hānga. Kaja keinung katonga khangacheena nganukyikhaowa.

¹²Varewui tandi saklak eina rāhaoda, mathila kharingbingna moksā shokserhaowa, kala keinung chiwui ringkhangā kazingram kāshunghaowa.