Read Tangkhul Naga 1 SAMUEL 6 Bible Online

1 SAMUEL 6 - Tangkhul Naga bible

1 SAMUEL 6

¹PROHOwui oko chi Philistine ngaleili kachāng shini hai.

²Kala athumna pāngmonbing eina khanong khayangbingli hokhuida, “PROHOwui oko hili ithumna khi sāusi? Awui khangachāpamli hanmilui khavai khi eina ngasoda shiunra, hāngmilu?” da ngahāna.

³“Israelwui Varewui oko chi hanmihaoga jiakha khamasai eina mashiunalu, kha ali khayonchigat eina ngasoda shiunlu. Chithākha nathumwui kazāt raihaora; kala khiwui vang nathumwui eina awui pāng makhalankathuikhala kaji nathumna theira” da ngahānkai.

⁴“Khayonchigat ithumna ali hanmiki kaji chiya khikhala?” da athumna ngahāna. “Philistine wungnao mashing athishurda, sinā eina sākakhui moksāzak phangā, kala sinā eina shiok azak phangā sākhuilu; kaja ngaraikachā kazātkashi chi nathumwuitunglila kala nathumwui wungnaobingwuitunglila razaserra;

⁵kaja nathumli kakazā moksā ama̱, kala kashakazā shimān khangasaka shiok da sākhuilaga Israelwui Vareli tekmatei ngasaklu; chithākha nathumwuitungli, nathumwui varebingwuitunglila, nathumwui ngaleilila ana yangmilapai.

⁶Khiwui vang Egyptnaobing kala Pharaohna wuklung khamarar thāda nathumla mararpamkhala? Ana athumli ngareo khanganao thāda sālaga naoda athumna mibingli kachiho matheimala?

⁷Seigari kadhar akha sākhuilu, kala chi seiot maphunglakrang kaje seinao khangathān simukva̱ khanili shimen ngasaklu; kha nao khani chiya mashur ngasakalu.

⁸Kala PROHOwui oko chi seigari tungli sanglaga chiwui ayārli oko akhali sināwui ama̱bing chi sang jilu; chi khayon chigat nathumna kachiphunna. Chiwui thili chihohailaga awui apong thuihaoranu.

⁹Kala yanglu; awui shongfa Beth-shemesh ngaleili unghaikha, ithumli kahaka kalā shikhangasaka chi alaka; kha kalikhada chimathaakha, chieina ithumna theikhuira kaja awui pāng eina shokkhangasak maningmana, kha ithumli kalāshida rākashokna” da hānga.

¹⁰Mibingna chithāda sai, kala anao khangathān sei khani khuilaga chiphunhaowa, kha anao khanile shimli narhaowa.

¹¹Kala athumna PROHOwui oko chi seigarili sanghai, kala sinā eina kasā shiok eina moksā azak chila sangmihaowa.

¹²Kala seiva̱ khani china khongmamānlaga shongfa ngatartei eina Beth-shemeshshong chanrei akhali vāhaowa; uishongla yāshongla mangareithuimana kala Philistinewui wungnaobingna Beth-shemeshwui thari eina tangda shurvai.

¹³Chitharan Beth-shemeshwui mibing chi tampākli athumwui kehu hātsai; kala athumna yangvāda PROHOwui oko chi kathei eina athum ringphāshunhaowa.

¹⁴Seigari chi Beth-shemeshpa Joshuawui luili angasāmhaowa. Ngalung kahakva akha leisai, athumna seigari thing chi kazerlaga simukva̱ khani chi PROHOli rikkatā kachigat sāda pha̱haowa.

¹⁵Kala Levinaobingna PROHOwui oko eina sinā ama̱ kazang oko chi ngazontālaga ngalungtung chili khaninghai; kala chithang Beth-shemeshwui mibingna rikkatā kachigat PROHOli pha̱phayāda chigata.

¹⁶Kala Philistinewui wungnao phangā china chi theilaga, chithang Ekronli hanunghaowa.

¹⁷PROHOli khayonchigat ngasoda Philistinenaobingna sināwui moksā azak eina sākakhui chi hina; Ashdodwui vang akha, Gazawui vang akha, Ashkelonwui vang akha, Gathwui vang akha, Ekronwui vang akha;

¹⁸kala sināwui shiok chi, Philistine wungnao phangā chiwui athishurda keinungbing kala raipan sakahaiya keinung, phākho makasā kha̱ kachiva̱ akharip mashing peida sākhui. PROHOwui ningkhami oko haizang khavai ngalung kahaka chi aja eina tangda Beth-shemeshpa Joshuawui luili leichingda lei.

¹⁹Kala athumna PROHOwui okoli yangkakāwui vang ana Beth-shemehwui mi kaikha sāthathaowa; ana mi hangshini sāthata; PROHOna mi kachungkha sāthat kahaiwui vang mibingna chapngachai.

²⁰Chieina Beth-shemeshwui mibingna, “Kathara PROHO Vareli khipāna ngasungshaprakhala? Kala ningkhami oko hi ithumwui eina khipawuili khuivāhaosikhala?” da hānga.

²¹Chieina athumna Kiriath-jearimli khaleibingli, “Philistinenaobingna PROHOwui oko chi hanmihaira, tākhuida nathumwuili khuiunghaolu” da paomebing chihovai.