Read Tangkhul Naga 1 SAMUEL 7 Bible Online

1 SAMUEL 7 - Tangkhul Naga bible

1 SAMUEL 7

¹ Kala Kiriath-jearimwui mibingna PROHOwui oko chi tākhuilaga kaphungli Abinadabwui shimli kāhai; kala chi yangmi khavai anaomayara Eleazarli athumna tharchigata.

²Kiriath-jearimli oko chi haithang eina, atam kasāngkha thuihairasai, kum maga̱ sha̱kha, kala Israelwui shimkhur saikorana PROHOli chapngachai.

³Chieina Samuelna Israelwui shimkhur saikorali hānga, “Kalikhada nathumna PROHOli nathumwui ningyang tongda hanungda leiakha, yur khangateiwui varebing kala Ashtaroth, nathumwui alungli khalei chi horhaolu, kala PROHOli nathumwui ning ngareiunglu, kala amāngli otram ngatha̱akha, ana nathumli Philistinenaobingwui pāng eina ngatangkhuimira.”

⁴Chiwui vang Israelnaobingna Baal kala Ashtaroth chi horhaida PROHO māngli otram ngatha̱ya.

⁵Chiwui thili Samuelna, “Nathum saikora Mizpahli rākaziplu, kala nathumwui vang PROHOli ina seihā sāmira” da hānga.

⁶Chiwui vang athumna Mizpahli akazipsera kala tara̱ asoklaga PROHOwui mangāli heishokta, chithang kakhum eina pamda hānga, “PROHOwui mangāli ithum morei sāhaira.” Kala Mizpahli Samuelna Israelwui mibingli bichar sāmi.

⁷Chitharan Israelwui mibing Mizpahli kazipta lei kaji kashā eina, Philistinewui wungnaobingna ngasung khavai kai, kala Israelwui mibingna chi kashā eina athum Philistinenaobingli ngacheehaowa.

⁸Kala Israelwui mibingna Samuelli hānga, “Philistinenaobingwui eina kanmi khavai ithumwui Vare PROHOli seihā kasā mathāhailakalu.”

⁹Chieina Samuelna ana̱ khamanga yaonao akha khuilaga PROHOli tongda rikkatāchigat chigata; kala Samuelna Israelwui vang PROHOli ngakaomi, kala PROHOna ngahānkāmi.

¹⁰Samuelna rikkatā kachigat pha̱da leilakha, Philistinenaobingna rai ngarar khavai ranganaimamānhaowa; kha chithanga, PROHOna kazingram eina Philistinenaobingli kapanga akhon akha khangangtāda athumli pa̱ngapāngasakhaowa; kala Israelnaobingwui eina yāmhaowa.

¹¹Chieina Israelwui mibingna Mizpahwui eina Philistinenaobingli Beth-car eina tangda kharomvai, kala athum kachungkhali sāthata.

¹²Chiwui thili Samuelna ngalung akha khuida Mizpah eina Jeshanahwui ngachaili shuna, kala chiwui aming Ebenezer phokmi; kaja “Hi eina tangda PROHOna ithumli ngachonmi” kajina.

¹³Chiwui vang Philistinenaobingwuitungli munghaoda Israel leiretli marāzangluithuwa. Kala Samuel ringlakha eina tangda PROHOna Philistinenaobingli khikha masāthuk ngasakmana.

¹⁴Philistinenaobingna Israelwui eina ngapaikakhuiya keinungbing, Ekron eina thuilaga Gath vāshungda; Israelnaobingli hanmihaowa; kala Israelna Philistinenaobingwui eina athumwui leiret ngapaikhuiluishita. Israel eina Amornaobingla chingrihaowa.

¹⁵Samuelna awui mirin peida Israelli bichar sāmi.

¹⁶Ana kum kachida, Bethel, Gilead, kala Mizpah apam hibingli kuizatta Israelli bichar sāmi.

¹⁷Chiwui thili ana Ramahli unghaowa, kaja awui shim chili lei; kala chilila Israelli mashun eina nganaomi. Apam chili ana PROHOwui hanphut akha sakai.