Read Tarao Naga METHIU 12 Bible Online

METHIU 12 - Tarao Naga bible

METHIU 12

¹Mahlai achunna Jisu in loulai vanna Sabat niah sehsa; che aroivah traamsei, churel ansaaktu kihu ahuui majuui amithronpei.

²Chuta Pharisi in mahchuta anmuh in akuungah anson, “Anro, nang niroi in tlohphunoh Sabat nia antlohpei.”

³Chunna Jisu in ankuungah asonei, “Devit in mahche amah in anruuipi mii in antraamlai jangthlouta antlohme:

⁴che khatloh a amah in Ringpu inna aluutche thiimpu noh a mahche amah in anruuipi mii inkho saa janoh tol asaakkha nannih in paanohchoume?

⁵Chunohle Sabat niah thiimpu in Ringpu mathruunna thlaamma Sabat nita sakmang amivei maraal amnoh tih a nannih in trongsuur paanohchoume?

⁶Chuta keiin nannihta kitihchou, mah chuvah amah amun inna Ringpu mathruunna thlaamchunga akliin inkhat amsa.

⁷‘Keiin rilvoltheihta kikdit, inkat pootta dinoh ang’ mah ita artha romchouleva, nannih in amaraal amnoh miita malaalnoh uchouta.

⁸Alamva miivaa Asa kupa in Sabat nivaa akpu.”

⁹Jisu in mah chunnata sehsa, che anmah sinakok a luutsa.

¹⁰Che anve, akut inkhattong thi mii khat rouam, anmah in Jisu ta anrui, “Sabat niah akna mathrat ajame?” Mah i Jisu ta amraal jonnatu anson.

¹¹Chunna amah in ankuungah asonei, “Nannih nankaarna khatin Sadam khat asih, chuta Sabat niah khurra tlasa, mahchuta kaia aklounohtu tu amchoume?

¹²Mii in sadamchunga khalmo amanchaal nohchoume? Chunnava Sabat nia akthra thlou tlohphu.”

¹³Cheva Jisu in akutthi kupa khata ason, “Nikutkha jamro.” Cheva akutta ajam jn inkhatna khananga thrasa.

¹⁴Cheva Pharisi in apaalla inthruh a Jisu ta janoh a khatloh immaang umeta intelsei.

¹⁵Mahchuta Jisu in arompeia, mahkhannata sehsa. Che miitam in aknu anjuih, chunna aknaeita amthratei,

¹⁶che amahta mii amiromnoh natu anmahta matrit a asonei,

¹⁷Mah i ringraan Isaiah in asonkha atlungnau veisa:

¹⁸“Anve keiin kichar roijuih, kei kikli in kipelna kirilvol. Amahchungah kei kikli kisihtu, amah in Jental anchunga akchim aphoongtu.

¹⁹Amah in housuuk a inna ongnohtu, che tukhat inkho lamma ahou rungainoh tuei;

²⁰Amah inchek a akchimta amsehnohmiil raphal khalekho tliknohtu, che annaal ruina meikhu thatnohtu,

²¹Che amah akming Jental jatih in amituurna veitu.”

²²Che Khousaar chuung mitcho trongtheihnoh khatta Jisu kuung anthlen, che amah in amthrat, chunna mitcho trong theinoh in amuhche trong anchekpei.

²³Chunna miinaam in salungkhou seia ansonpei, “Mahmii i Devit vaa Asa kupa meio?”

²⁴Chuta Pharisi in mahchuta antheih a anson, “Mahmii in khousaarta manomnoh, chuta khousaarei aklok Biljebul apaalla anmahta amnomei.”

²⁵Chuta anmah in amidonta Jisu in aromma ankuungah asonei, “Kurung huunna naamte anroua injanoh a inthrek suukei; che anroua injanoh a inthrek khuuboom nohle inn naamte anroua ngir cheknohtu;

²⁶Seitan in Seitanta manomle, anmah in anroua injanoh a inthrektuei; chuleva khatloh a amah kurung huunna in ngir achekume?

²⁷Che keiin khousaarta Biljebul appaalla manom angle, nannih nansa kupava tunang apaalla aminomtu? Alamchunna anmah in nannihtu pichaar akpu vei tuei.

²⁸Chuta keiin Ringpu vaa Li apaalla khousaarta manom angle, Ringpu kurung huunnakha nankuungah thlengsa.

²⁹Chunohle amah in aktrang mii khata makaangnoh maan avah, khatloh a amah inna luut a poot eita sut a lou achekume? Amah khata amkaang maanche innkhanna poot eita sut achektu.

³⁰Tunangkhat keisoh inruuinoh mii khavah keita keijanohsa, che keisoh anchunnoh mii khanna akthek.

³¹Churella keiin nannihta kisonchou, miivaa anlehta mahche aleh alah a trongva ki iptu. Chuta Li ta janoh a alehlah aktrong miivaa ipnohtung.

³²Tunangkhat in miivaa Asa kupata janoh a aktrong khava in iptu, chuta Li Akseengta janoh a aktrong miikhava ipek ringnatluun leh akthlengsam ringnatluun akho in ipnohtu.”

³³“Thingkha akthra inrah maveive che akrahkho mathratve, chunohle thingkha thranoh veile mah akrahkho thranoh veitu. Alamva thingva akrah a inrom.

³⁴Ruulsokvaa atute eio! Nannihva thranoh choua khatloh akthra trong nanchek ume?

³⁵Akthra mii in arilla athra asihkhata amthruh, thranoh mii in arilla thranoh amkhoolkhata amthruh.

³⁶Chuta keiin nannihta kisonchou, mah chuvah mii in cheksilnoh a trong anaamte pichaarniah amlantu.

³⁷Alamva nang nitrongin nangta namchimtu, mahche nannih nantrong in nannihta nanimlaaltu.”

³⁸Chunna ringjih lulok mahche Pharisi arouin akuunga anson, “Lulok, nangningnata daang inkhat muh kandit.”

³⁹Chuta Jisu in amsangei, “Akthranoh leh miimei miisa laal ringnatluun in daang anjon, chuta ringraan Jonah daangnoh a daang amnoh.

⁴⁰Alamva Jonah in suun inthum che khulouh inthum akliin nga vonsuungah am. Mahchunanga miivaa Asa kupa in suun inthum che khulouh inthum tuklei rilsuunga amtu.

⁴¹Nineveh na mii in mah ringnatluun na mii eisoh pichaarniah inthruh tuei che anmah amiraal amilantu alamva Jonah in trong araanlai anmah in ril anthleng. Che anve, Jonah chungah akliin mii khat amsa.

⁴²Akhuna kurungpii in mah ringnatluun na mii eisoh pichaarnia inthruhtuei che amiraal amilantu alamva amah in thaleiram akiingnata Solomon lousing rungeihnatu thlengsa. Chunna Solomon chungah akliin mii khat amsa.”

⁴³“Akseengnoh li inkhat in mii khat ningnata anthruhche, amah in anngeihnatu jonna akchaar ram amunna seh a am, chuta anngeihnatu tuuknohsa.

⁴⁴Chunna amah in ason, ‘Keiin kanthruhna inna veikhat inlengtang.’ Che amah in anlenglai, innkha tlenga inthiira thratea louam antuukpipei.

⁴⁵Chunna inlenga amahchunga akthranoh li sirihsoh inruuia thlengsa, che anmah in luut a amsei; mahchu aknua mahmiichu matsahna chunga ralla thranoh veisa. Chunna mah thranoh ringnatluun ikho maisoh intrimma veitu.”

⁴⁶ Jisu in miitamsoh tronga amsuung, anve, amah anu mahche anao eiin amahta trongpinatu jonna apaalla ngirra amsei.

⁴⁷Chuta tumekhat in Jisu ta ason, “Anro, nang ninu mahche ninao eiin nangta naktrongpinatu apaalla ngirra amsei.”

⁴⁸Chuta Jisu in amsang, “Kei kinu mahche kinaochu tuseime?”

⁴⁹Cheva Jisu in aroi ankuungah akut khoh a asonei, “Onna ak am ei i kinu mahche kinaosei!

⁵⁰ Alamva tungangkhat in ringramma am Pa in amdon aktloh miikha kei kinao, kisar mahche kinusei.”