Read Tarao Naga METHIU 13 Bible Online

METHIU 13 - Tarao Naga bible

METHIU 13

¹Mahnital achunna Jisu in inn nata inthruh a tuiiboom komma inboksa.

²Che miitam in akuungah inlomma inchunsei, chunna amah in muli inkhat suunga luut a inboksa; che miitamvah tuiiboom apaalla ngirra amsei.

³Che amah in pandam jikcha tloh a ankuungah sonei, “Mii khat in chi avorhnatu sehsa.

⁴Che chi avorh in chi arouva lamkomma tla, cheva va in thlenga anchunpei.

⁵Arouin lungkaara tla, mahchunna philtam amnoh a intha moongei alamva tukleisuungah tluumma luutnoh,

⁶chuta kini in ansat in kaangsei; alamva akjung amnoh a chaarsei.

⁷Che arouin kuling kaara tlaei, che kuling in moonga ahipkirpei.

⁸Chuta aktleiva akthra leipiia tla a akrah khalmo inrahsei, che arouin ahuum inkhat ah ahuum reija, arouin sopruk, che arouin sopthum inrah.

⁹Tunangkhat in aroungeihnatu amkuur a am miikhan rungaiso.”

¹⁰Che aroiin amah kuungah thlenga ansonpei, “Jarelna ankuungah pandam veia trongcheme?”

¹¹Jisu in amsangei, “Ringram huunna anthuptrong nanromnatu nankuungah mah i kamlanpeichou, chuta anmah ankuung avah malannoh angei.

¹²Alamva tunangkhat tam aksihkuungah kimlan mahche amah in ralthloia asih, chuta tunangkhat aksihnoh kuunga malannoh ang, chunna amah kuungah ak am khakho kilohtu.

¹³Churella ankuungah pandam veia trongsang. Alamva anmah in muhre rea muhnoh ei, theih rerea rungainoh ei, che lou theihnoh ei.

¹⁴Ringraan Isaiah in asonkha anmah ankuungah tlungsa mah chuvah: ‘Nannih in tak a rungaivah nanrungeihtu chuta lou theihnoh uchou, che muhvah nanmuhtu chuta romnoh uchou.

¹⁵Alamva amah anril i kitalsei, amikuur trangsei, che anmah anmit insiinsei, anmah anmit in muh ah, amikuur in rungaia anrilla amiluutche inhei tupotei. Chuleva anmahta keiin kamthrat tupotei.’

¹⁶“Mit a akmuh mahche makuur in aktheih eikha doi akphahsei.

¹⁷Alamva keiin nannihta atak a kisonchou, mah chuvah ringraan mahche akchimlamseh in nannih in nanmuh ita muh andit chuta muh phahnohsei, che nanrungeih ita rungai andit chuta rungai cheknohsei.”

¹⁸“Chunna chivorhna pandam i rungaive.

¹⁹Tunangkhat in kurung huunna trongta arungeih in rom acheknoh invah, akthranoh khatin thlenga arilsuunga avorhta sut a atlaanpei; mah chi akphah i lamkomma aktla chikhasa.

²⁰Chuta lungkaara aktla chi in trong arungeihche intha a roomthoksoh inruuia arouloh;

²¹chulata akjung thuuk a tlanoh, churel kakruta adouning, alamva klah knang mahche trong irella inchut jikcha athlenglai amahningvah intha a aningdongna veisa.

²²Pekva kuling kaara chi aktla in trong atheihche tukleiramma ringnaleh doon khaalna rilkhanna trongkhata akrah marahnohsa.

²³Chuta akthra leipiia aktla chikhanna trongkhata arungeihche arom. Chunna athloua akrah inrah arouin reija, arouin sopruk, mahche arounin sopthum amsuuk.”

²⁴Jisu in aktlei pandam daak a ankuungah asonei; “Ringram huunna i louvah akthra chivorh miikhatsoh amlak;

²⁵chuta mii in an ihsuunga amah jekna in thlenga kihukaara inlouchi vorh a amahche inlengsa.

²⁶Chuta chi in moonga anrollai, inloukho indangsa.

²⁷Chunna lou Akpu vaa roijuih in amah kuungah thlenga ason, ‘Lulok, nanglouva akthra chita vorhnoh cheme? Che khatloh a inlouchita moongseime?’

²⁸Amahta ason, ‘Mah i jekna mii khat in atlohpei.’ Chunna amah roijuih in akuungah ason, ‘Chuleva kannih in seh a inlouta phoia matlonnatu nakson ungme?’

²⁹Chuta amah in asonei, ‘Ah, inlou nanphoi namitlonlai kihukho jaoa inphoitu.’

³⁰Chi luhnohmiil moongeiso! Chiluh aphahlai akvaat aksirmiita kisontuei, matsah a inlouta matlonna meia nanhaalnatu akhuh a kaanve, chuta kihuva kei tomsuunga bunve.”

³¹Amah in aktlei pandam ankuungah malanna asonei, “Ringram kurung huunna i intramchita mii khat in alohche avorh khanangsa;

³²Mah i chi anaamte kaara andihrem, chuta amoong laiva aktlei inlouchung inrolh che thing veisa, mahche marvaanna va in thlenga abaak ah anbu antloh.”

³³Amah in ankuungah aktlei pandam asonei, “Ringram huunna i kumei khat in chol adih kutrop inthumta buh stesoh anamnohmiil ampolh nangsa.”

³⁴Mah naamte i Jisu in miitam ankuungah pandam veia trong, pandam jaonoh a amah in ankuungah trongnoh.

³⁵Mah i ringraan in asonkhata atlungnatu relnasa, mah chuvah: “Keiin pandameita kisonnatu kbao aangtung. Tukleiram amthron lainata mathup a asih eita keiin kisontu.”

³⁶Cheva Jisu in miitamta mathlah a inn khat ah luutsa. Che aroi in amahkuunga thlenga anson, “Louna inlou pandamkha invuia kanimtheihro.”

³⁷Anmahta amsangei, “Akthra chita akvorhkha miivaa Asa kupasa;

³⁸louin tukleiramsa, che akthra chi in kurung huunnavaa asa kupasei; inlouin akthranohvaa asa kupasei,

³⁹inlouchi akvorhkha seitansa; akvaat aksir in tukleiramtu achenasa, mahche akvaat akluh in ringroisei.

⁴⁰Chunna inlouta matlonna meiah haal khananga nga tloh a chupkha achena ah veitu.

⁴¹Miivaa Asa kupa in amah ringroita amthlahtuei, che aleh ah tlaakna khatkho thranoh aktloh eita amah kurung huunna amunnata amtlontuei,

⁴²che anmahta kthih amnoh meimunna anthlaktuei; mahchunna traptruuia anha amikettu.

⁴³Che akcimlamseh miiva anmah anpa kurung huunna ramma kini nanga intle usei. Tunkhat arungeihnatu amkuur am miikhan rungaiso.”

⁴⁴“Ringram huunna i lou inkhat ah inthup a am, mah chuvah tunangkhat in aktuukche veikhat mathup a asih lalnangsa; che amah in aroomthok rella seh a adoon naamte ajurhche lou inkhat aklei.

⁴⁵“Veikhatlakho, ringram huunnava kthra mukta inkhat jonna akjuur miinangsa,

⁴⁶Amah in amantam muktakhat aktuukche seh a adoon naamte juura achuungnatu amlatmii nangsa.

⁴⁷“Veikhatlakho ringram huunnavah tuiiboomma toro denna alamtanga nga imtlon nangsa;

⁴⁸toroin asiplai ngaman mii in tuiipaalla toro kaia inbok a akthrata pupok suungah anthun chuta akthranohvah anlon.

⁴⁹Chunna chup achenakho nga tloh a veitu, ringroi in thlenga akthranoh eita akchimlamseh ankaar nata athrektuei.”

⁵⁰Che anmahta meimunna athlaaktuei, mah amunkhanna anmah in traptruuia anha amikettu.

⁵¹Jisu in ankuunga asonei, “Mah anaamte i nannih in bahab tlasachoume?” Anmah in akuungah anson, “Oi, Akpu.”

⁵²Chunna Jisu in ankuungah asonei, “Ohchurella ringram huunna rella akrom ringjih lulok anaamte innpu inkhat in amah lal akthar leh amlui amthruh nangsa.”

⁵³Nga tloh a Jisu in pandam ita amcheche, aknua ohchunnata sehsa,

⁵⁴che Jisu in amah ramboomma athlenglai, anmah sinakok ah anmahta amtheih ei, chunna anmah in salungkhoua anson, “Mahmii in ramna lousing leh akchek amneh thlouta aphahmeio?”

⁵⁵Mahmii i thingchal inkhatvaa asa kupa nohme? Anuin Meri nohme? Che anao in Jems, Joses, Simon mahche Judas noh eime?

⁵⁶che asar naamtein inihsoh inruuijounoh eime? Chunnava mahmii in ramnata anaamte i aphahmeio?

⁵⁷Chunna amahta ril amisokpei. Chuta Jisu in ankuungah asonei, “Ringraan inkhatta amah ramboom tak in mahche ataploikung mii in injahnoh ei,

⁵⁸anmah in amilotnoh kharella mah khanna salungkhouna thlou tlohnohsa.”