Read Tarao Naga METHIU 19 Bible Online

METHIU 19 - Tarao Naga bible

METHIU 19

¹ Jisu in mah anaamte i son amchenua Kalili nata seh a Jordon araalla Judia ramma thlengsa;

²che miitam in amah aknuta anjuih, che ohkhanna anmahta amthratei.

³Pharisi inkho amahta chaang anna veia anrui, “Mii khat in jangmekhat rella akmei inthrekpi i trongsuur in ajame?”

⁴Che matsahrem akseem Akpu amah in kupa khatkho kumei aseemta Jisu in ankuungah amsangei.

⁵Che mahchunang relna “Kupa inkhat in anuleh apa mathlah a akmeisoh amjoutu che anmah anruung innihkhata inkhat vei tuei” tih i nannih in paanohchoume?

⁶Chunnava anmah in mii innihnohsei, chuta ruungkhat veisei. “Oirella Ringpu in amchunkha tukhat inkho threknohso.”

⁷Anmah in Jisu kuunga anson, “Chuleva jarella Moses in inthrekna anjih rai malanna mathlahveta trongthuun amlanme?”

⁸Jisu in ankuunga asonei, “Nannih nanril atrangrella Moses in nanmeisoh inthrek amja, chuta matsahrem avah ngata veinoh.

⁹Che keiin nannihta kisonchou: tunangkhat in akmei miisoh leengnohta anthrekpiche, aktlei inkhatta changvaang miikha miimei laalthlou atlohche anthrekpi kumeita changvaang khakho miimei laalthlou atloh.”

¹⁰Jisu aroiin akuungah ason, “Kupa inkhat in akmeisoh mahchunang veile changvaangnoh in thra.”

¹¹Chuta Jisu in ankuunga asonei, “Mahtrongi mii naamtein romma lou cheknohchou, chuta mah i anmah kuungah amlanna miikhop in lou achekning.

¹²Alamva anmah in annu vonsuung nata aksarh inseemma akpok ammei, che mii in aksarh inseemkho ammei, che ringram kurung huunna turel anmah anruungin aksarh akseemkho ammei. Mah ita akromchek mii khanna mah i louso.”

¹³Mahchunna Jisu in nao anchunga akut sih a ngennatu amahkuunga anthlen, chuta aroiin mii eita ansaal.

¹⁴Chuta Jisu in ason, “Andihnao eikha kikuungah thlengeiso, anmahta khaamnoh eive, alamva ringram kurung huunakha anmahnang anta.”

¹⁵Che amah in anchungah kut asihche mah chunnata sehsa.

¹⁶Anve, mii khat in thlenga Jisu kuungah ason, “Akthra lulok o, keiin ache amnoh ringna kiphahnatu jaknang akthra thlou kitlohtu tlame?”

¹⁷Chunna Jisu in akuunga ason, “Jarelna keita akthra tih a nak ong angme? Ringpu noh a tukhatkho akthra amnoh. Chuta nangin ringna phah dichele trongthuunkha majuihro.”

¹⁸Amah in Jisu ta ason “Jaknangme?” Jisu in ason, “Nangin mii thatnohro, nangin miimei miisa laalnohro, nangin inrunohro, nangin chimnoh sakhi malannohro,

¹⁹nangin ninu napata injahro, che nanthringpi miita nitaknanga ringvolro.”

²⁰Intlangsa in Jisu ta ason, “Mah naamte ivah nao kivei lainata juih a thlengsang; pek kimjuihtu akvaat jangam mangme?”

²¹Jisu in akuunga ason, “Nangin ralla akthra dichele, nangin nidoon naamte juura anranriing mii kuungah malanro, che thlenga kiknu keijuihro, nang nilal ringramma louamtu.”

²²Chuta intlangsa in mah asonchuta atheihlai aril lah a inlengsa. Alamva amahvah khalmo doonkhaal mii.

²³Chunnata Jisu in aroikuunga asonei, “Atak a keiin nannihta kisonchou, mah chuvah akdoon mii khat in ringram kurung huunna ah luut i khalmo klu.

²⁴Che veikhatlakho kisonchou, akdoon mii khat in ringram kurung huunna ah luutchunga vaksa inkhat in kukthrimpo ah luut in aklai.”

²⁵Jisu aroiin mahchuta antheih lai khalmo salungkhoua anson, “Chuleva tunang in inkal achekume?”

²⁶Chuta Jisu in anmahta antlinga asonei, “Miikuung avah mah i veinohtu thlou, chuta Ringpu avah bilam naamte veikir.”

²⁷Chunna Petar in Jisu ta amsang, “Anro, kannih in anaamte mathlahkirra niknu kanjuih peiche, chunna jangta doon usungme?”

²⁸Churel Jisu in ankuungah asonei, “Keiin nannihta atak a kitihchou, mah chuvah akthar tukleiramma miivaa Asa kupa in amahvaa paarthra phompiiah anboklai, kiknu keijuih nannih in phompii somlei innih ah inbok a Israel sakhei somlei innihta pichaar nantlohtu.

²⁹Che keiturel a inn, alou, auh anao, anu apa, akmei asa, khatkho aram amuul amthlah mii in reija ah reija chaang anphahtu, che ache amnoh ringna anphahtu.

³⁰Chuta tukhat matsah mii in juktooltu, che juktool mii in matsahtu.”