Read Tarao Naga METHIU 20 Bible Online

METHIU 20 - Tarao Naga bible

METHIU 20

¹Ringram huunna khavah ngangli billa thloutloh mii aneknatu juktiing anranga anthruh rampu khanangsa.

²Amah in thlou aktlohtu miisoh nikhat kutlang baobeh injana hoonga amah in ngangli billa amseh ei.

³Che amah in pung kuvak atlaklai keithiil munna seh a jakhatkho tlohnoh a ngirra am amuh ei.

⁴Che amah in ankuunga asonei, “Nannihkho ngangli billa sehve che thlou tlohve chunna nanphahtu phukha kamlan uchou” chunna anmah in sehsei.

⁵Veikhatla amah in pung somleinih leh pung inthumvak akho amah in seh a juktiingna nanga atloh.

⁶Che pung rangavak jakhatkho tlonoh a talla ngirra am ankuungah asonei, “Nannih in jakhatkho tlonoh a jarella nikhat suuntla ngirra amchoume?”

⁷Anmah in akuungah asonei, “Alamva tukhat inkho kannihta thlou tlohnatu kanisonnoh ei.” Amah in ankuunga asonei, “Nannihkho ngangli billa sehve, che thlou tlohve nanphahtuphu kamlan uchou.”

⁸Chunna khulouhram aphahlai nganglibil akpuin amrel akputa ason, “Thlou aktlohmii onga juktoolnata matsah phah nikhat antlohman malaneiro.

⁹Che pung rangavak ah akthleng mii in nikhat kutlangna baobeh anphah.

¹⁰Chuta matsah a akthleng miiva thloia anphahphu, chuta aktleisoh intrimma baobeh anphah.

¹¹Che anmah in mahchuta anphahlai, ram akpu kuunga insoa antih,

¹²Juktoolla akthleng mii in pung inkhatruta antlohning, che nangin anmahta nikhat antlohna amanleh kini insa kanimrat akdou kannihsoh nimtrim.

¹³Chunna ankaarna inkhatta amah in ason, Ruul o, keiin nankuunga chimnoh tlohnoh ang, nangleh keiin nikhat kutlang manna injanoh meme?

¹⁴Nangta jikchahme loua inlengrosa, nikuunga kimlan nanga juktoolna miikho malan kikdit.

¹⁵Kitak in dia madonna kitloh i janohme? Chunohle kiril athratrelna nimit intaangsme?

¹⁶Chunna juktool in matsahtu mahche matsah in juktooltu, alamva mii khalmo tam aong, chuta steruta achartu.”

¹⁷Chunnata Jisu in Jerusalem a sehsa, che aroi somleinihta ajea aphurhche lamma anmahta asonei,

¹⁸“Anve inih in Jerulalem a seh ume; che miivaa Asa kupata akthloi thiimpu mahche ringjih lulok ankut a amilantu, che amahta thatnatu amilantu,

¹⁹Che amahta aminuihnatu, ankhonnatu mahche thingkharh ah thatnatu Jental ankut ah amilantu, che nithum tihpia amah in veikhat kiringtu.”

²⁰ Chunnata Jebedi vaa anuin asasoh inruuia Jisu kuungah thlenga, akhuk makamma mathruunna jangmekhat angen.

²¹Che Jisu in akuungah ason, “Nangin jangnikdtime?” Amah in Jisu kuungah ason, “Mah kisakupa innih i nang kurung huunna ah inkhat in nikchangtonga che inkhat in nikveitonga inboknatu jathang malaneiro.”

²²Chuta Jisu in amsang, “Nangin jangta ninihme tihkho romnohche, keiin ki iinnasam chapla nannih in iin nanchek ume?” Che keiin kinlupna a nannih in inlup nanphahchek ume? Anmah in “Kanchektu” ta amisang.

²³Chunna Jisu in ankuungah asonei, “Nannih in kei chaplata nan iintu, chuta kikchangtong leh kikveitonga nanboknatu amlanva keitanoh. Chuta maiva Pa in amchaang anmahninga amlantu.”

²⁴Chunna aroi som in mahchuta antheih lai unao innih anchunga amailung inhaangsa.

²⁵Chuta Jisu in anmahta aongche asonei, “Nannih in nanrom mah chuvah aktlei Jental rampuui eiin miichunga akpu veia paallei, che anmah anchunga aktloh akhal eiin liinna anlenna.

²⁶Nannih nankaar avah mahchunang veinoh. Chuta nannih nankaara tunangkhat in akliin vei dile amah khanna nannihtu roijuih hukveiso,

²⁷che nankaara tunangkhat in akliin aveija khanna nannihtu roijuih hukvei tuei.

²⁸Miivaa Asa kupa in keita rou keitlohveta thlengnoh, chuta miita routlohnatu mahche miita thloknatu amah chaanta mathlah thlengsa.”

²⁹Anmah in Jerikho nata inthruh a anseh in miitam in Jisu ta anjuihpei.

³⁰Che anve, mitcho mii innih in lamkomma inbok a amsei, Jisu in lam vanna sehta antheih in onga antih, “Devit vaa Asa kupa o! Kannihta kanirilvolro!”

³¹Miitam in anmahta rim amveta ansaalei, chuta anmah in ral ralla onga antih, “Devit vaa Asa kupa Akpu o! Kannihta kanirilvolro!”

³²Jisu in anngeihche anmahta asonei, “Keita nannih turel jangnamitlohja angme?”

³³Anmah in Jisu kuungah antih, “Akpu, kanmit kanimmuhro.”

³⁴Mahchunna anmahta arilvolsei, che anmah anmitta apalpei. Che kak hang anmit muh anphahpei, cheva amah aknuta anjuihpei.