Read Tarao Naga METHIU 21 Bible Online

METHIU 21 - Tarao Naga bible

METHIU 21

¹Anmah in Jerusalem annailai Jaitun muulla am khuu Betphake anphah in aroi innihta mathlah a asonei,

²“Nannih nanmaa a am khuusonna vaave che kak hanga nannih in samong apuileh atesoh inruuia khit a ansih nantuuktu, mahchuta majak a keikuung thlenve.

³Che tukhat in nannihta jarelname nanitihle, ‘Akpu in darkaar am’ tihve, che kak hanga amah in nanimlantu.

⁴Mah anaamte i ringraan in asonkha atlungnasa, mah chuvah nga tloh a ason,

⁵Jaion vaa asakumei kuungah sonve, ‘Anro, nang kurung in nikuungah thlengsa, amahvah inruruh mahche samong chunga chuung, samong ate inkhat, samong apui inkhat ah.’ ”

⁶Jisu in aroita amtheihna nujuih a anmah in seh a antlohpei;

⁷anmah in samong aruulta anthlenche achunga puun anthah, che Jisu in achunga chuungsa.

⁸Che miitam in anmah anpuunrei lamma anrouthah, mii arouin thingbaak tuk a lamma anrouthah

⁹Cheva miitam in amah amaa a che aknu akjuih in onga antih, “Devit vaa Asa kupa ah Hosana! Akpu minga akthleng miikha doiphah khasa! Ankaang remma Hosana.”

¹⁰Che Jisu in Jerusalem a alutlai, khuuboomna miinaam in derder tih a ansonpei, “Mahmii i tume?”

¹¹Chunna miitam in anson, “Mahmii i Kalili vaa Najareth na ringraan Jisu khare.”

¹²Mahche Jisu in Ringpu mathruunna thlaamma luut a asuungah ak am mii pootjuur leh aklei anaamteta amnom, che baobeh akkhoi mii tebor leh khuinu juur anboknata malat a akthek ei

¹³Che Jisu in ankuungah asonei, “Mah i injih a amsa, ‘Kei innvah ngenna inn tih a in ongtu’ chuta nannih in inru inraanvaa anbu namiveipei.”

¹⁴Cheva mathruunna thlaamsuunga mitcho mahche kehtlik in Jisu kuungah thlengsei che anmahta amthratpei.

¹⁵Chuta akthloi thiimpu mahche ringjih lulok eiin Jisu in atlohthlou khanna salungkhou seia “Hosana, Devit vaa Asa kupa!” tih anao in an ong anmuh in amilung inhaanga akuungah ason,

¹⁶“Anmah in ansonni nitheihme?” Jisu in ankuungah asonei, “Oi, kitheih, Anjih in ason, nangta nandomnatu andihnao mahche chuh in annarra thradek a nandomnatu namchaang,” tih i nannih in paanohchoume?

¹⁷Cheva Jisu in anmahta mah a khuuboom nata Bethani a sehsa, che mahchunna riiksa.

¹⁸Juktiinga Jisu in khuuboomma anlenglai avon traamsa

¹⁹Che lamkomma thotthing inkhat amuh a akuunga avaa in aburnoh a jakhatkho tuuknohsa. Chunna thotthingta ason, “Veikhat inlenga nangin inrahnoh luungrosa!” Kak hanga thotthing in chaarsa.

²⁰Aroi in mahchuta anmuh in salungkhoua anson, “Khatloh a thotthing in khalmo intha a achaar sameio?”

²¹Chunna Jisu in ankuunga asonei, “Keiin nannihta atak a kitihchou, nannih in malot a nanrilla chingna amnohchoule, thotthinga mainang nantlohchek khop noh a, chuta nannih in muul ita inlongbulh a tuiiboomma tlarota nanson inkho veitu.

²²Che nannih in malot a nanngen anaamte nannih in nanphahtu.”

²³Jisu in mathruunna thlaamma luut a miita amtheihlai, akthloi thiimpu mahche anparuul eiin akuungah thlenga anson, “Nangin jaknang akchek amneh ah mah thloui nitlohme? Che mah akchek amneh i tunang in nakpekme?”

²⁴Chuta Jisu in ankuungah amsangei, “Kei inkho nankuungah naniruitang, mahchuta kamsangchoule jarella keiin mah akchek amneh thloui kitlohme kison uchou.

²⁵Aklup John kha ramname? Ringram tingname chunoh a mii tingname?” Cheva anmah sengseeng intella insonsei, “Inih in ringram tingna” tihmale amah in initihtu, “Chunohle nannih in jarelna amahta malotnoh choume?”

²⁶Chuta inih in “mii tingna” tihlamele miitamta trihme, alamva mii naamtein John ta ringraan inkhat antih.

²⁷Chunna anmah in Jisu ta anson, “Kannih in romnoh ung.” Che Jisu in ankuungah asonei, “Keikho jaknang kichek kimneh a mah anaamte i kitlohme nanison nohtung.”

²⁸“Chuta nannih in jangnamidonme? Mii khat in asa kupa innih am; che amah in asa kupa anpaakuungah thlenga ason, ‘Kisakupa o, mi invah kei ngangli billa seh a thlou tlohro.’

²⁹Amah in amsang, ‘Kei sehnohtung,’ chuta kak amche aril athlengpeia sehsa.

³⁰Chela asa kupa innih tihpi kuungah thlenga ason, ‘che amah in amsang,’ oi, ‘sehtung, lulok’ chuta amah in sehnohsa.

³¹Anmah innih kaara jaknangin anpa in amdon atlohme?” Amah in ason, “Matsahna in atloh.” Jisu in ankuungah asonei, “Keiin atak a kitihchou, mah chuvah roithraiei mahche kochanoh kumei eiin matsah a ringram huunna a luutuei.

³²Alamva John in akchimlamseh veia nankuungah athlengche nannih in malotnohchou, chuta roithrai mahche kochanoh kumei eiin amahta amilot; che nannih in mahchuta nanmuhlai nanril thlenga malotnohchou.”

³³“Aktlei pandam khatkho rungaive: Nganglibil aktloh rampu mii khat am. Amah in kooia pal amkhahche asuunga tuklei choua nganglirah soorna amthrun, che stlaan inkhat athong mahche nganglibil lampaarsa eita amsaal eiche amahvah aklah ram inkhat a sehsa.

³⁴Pekva nganglirah luhnatu lai aphah in, anluhpeira ta aroita nganglibil lampaarsaa miikuungah amthlahpei.

³⁵Chunna lampaarsa eiin aroita suura inkhatta ankhon, inkhatta anthat, che aktlei inkhatta lunga anden.

³⁶Matsahnachung ralla amah in aroi khatlakho amthlah, che anmah in matsahna nanga amah kuungah anloutlohpei.

³⁷Chunna achena avah asa kupata anmah in injah tuei ta ankuungah amthlah.

³⁸Chuta nganglibil lampaar aksaa eiin asa kupata anmuhlai, anmah sengseenga insonsei, ‘Mah i amah pipata thlengsa, inih in amahta ithatche achangphu sutreio.’

³⁹Che amahta ansuurpei, che nganglibil apaalla aminomche anthatpei.

⁴⁰‘Chunna nganglibil Akpu in athlenglai, nganglibil lampaar aksaa mii eita amah in kha atloh tueime?’

⁴¹Anmah in anson, ‘Amah in akthranoh miichut eita amramtuei, che amah ngangli bilta aktlei miiting mathlah a nganglirah luhlai akrah amah kuungah amlantu miikuungah amsaaltu.’ ”

⁴²Jisu in ankuungah asonei, “Inntloh mii in akjanoh lungta amuvei akiingna amivei, mah i Akpu in amvei, che mahchu inih imit avah salungkhouna tih a nannih in ringjihta paanohluung choume?

⁴³Churella nannihta kisonchou, ringram huunnakha nankuungnata inloutu che akrah anrahtu jaat in khat kuunga kimlentu.

⁴⁴Che tunangkhat in mah lung achunga anloom miiva invuitu, chuta mah lungin tunangkhat in chuunga tlaleva, uphulnanga invuinektu.”

⁴⁵Akthloi thiimpu mahche Pharisi eiin Jisu vaa pandam antheih lai, anmah rella trongsa tih a amrompei.

⁴⁶Chuta anmah in Jisu ta namma suurnatu antlohta, anmah in miitamta trihsei, alamva anmah in Jisu ta ringraan inkhatsa ta anloh.