Read Tarao Naga METHIU 26 Bible Online

METHIU 26 - Tarao Naga bible

METHIU 26

¹Jisu in mah naamte i asonche, aroi ankuungah asonei,

²“Nannih in nanrom mah chuvah nijannih aknua laalna buhdoon i thlengusa, che miivaa Asa kupata thingkharh ah mathlunatu amilantu.”

³Mahche Kaipha tih a an ong thiimpu aklok kurungkool a akthloi thiimpu miivaa anparuul in inboomsei,

⁴Che Jisu ta inruk a suura mathlunatu inboomma intelsei.

⁵Chuta anmah in anson, “Miikaara derderta asuuknoh natu buhdoon suunga tlohnohrei.”

⁶Ipek Jisu in Bethani a amlai reichi in amlom Simon inna,

⁷Jisu in buh asaaklai kumei khat in aman khalmo chaal amrimtui thaobeel khat thlenna akuungah thlengsa, mahchu akangchunga apoihpei.

⁸Chuta aroiin mahchuta anmuh in anmilung inhaanga anson, “Mah i jarelna ampaam peime?

⁹Alamva mah thao i aman khalmo tamma ajurhche, inranring kuungah malan ajata.”

¹⁰Mahchuta Jisu in aromma, ankuungah asonei, “Jarelna kumei ita namilahme? Alamva amah in akthra thlouta keikuungah atlohpei.

¹¹Alamva nannihva anran anringsoh injomma amjouchou; chuta nannihva keisoh injomma amjounoh uchou.

¹²Mah thao i kei kiruungchunga suunga keita kanphuumnatu athlourang turelna amah in atlohpei.

¹³Keiin nankuungah tak a kisonchou, tukleiram apumtea mah akthra trongi raannatu amun naamtea amah kumei in atlohthlou i amahta intheihna veia insontu.”

¹⁴Chunna akming Judas Iskariot somlei innih ankaarna khatin akthloi thiimpu ankuungah seh a

¹⁵asonpei, “Keiin amahta nankuungah nanimlan angleva keikuungah jangnanpek tungme?” Cheva anmah in akuungah harngou baobeh sopthum amilanpei.

¹⁶Che mah chunnata Jisu ta malannatu amah in taancha aphahnatu amjonpei.

¹⁷Pek chol jaonoh laalna buhdoon matsah akniah aroiin Jisu kuungah thlenga ansonpei, “Laalna Buhdoon saaknatu nang turella ramma thlouraang namitlohja ungme?”

¹⁸Amah in ason, “Khuuboomma luut choulaia mii khat kuungah sonve, ‘Lulok in ason, keitu lai innaisa, nang inna kei kiroisoh laalna buhdoon kansaaknatu.’ ”

¹⁹Che Jisu in ankuungah amtheih nujuih a, aroiin laalna buhdoonkha tlohnatu amichaangpei.

²⁰Khulouhram aphah in, aroi somleinihsoh tebor kuungah inbokjousei;

²¹che anmah in ansaaksuunga, anmahta asonei, “Keiin nankuungah tak a kisonchou, nankaarna inkhat in keita lonna nanjurhtung.”

²²Che anmah in anril khalmo lahsei, che anmah in khatleh khat inrui amithronpei, “Akpu, mahchu keisangme?”

²³Amah in amsangei, “Tarpenga keisoh kut akpuurjou miital khanna keita kamlantung.

²⁴Miivaa Asa kupa rella injih nujuih a seh, chuta miivaa Asa kupata amlan miikhava lahnasa! Amah miikhan poknoh leva ralla thra uta.”

²⁵Amahta akjuur Judas in amsang, “Akpu, keisangme?” Amah in akuungah ason, “Nangin nisonluungpei.”

²⁶Ipek anmah in ansaaklai, Jisu in tol loua doi amlanpei, che mahchuta khoia aroi ankuunga malanna asonei, “Loua saave, mah i kei kiruungsa.”

²⁷Mahche kuchaita loua ampaakche, mahchuta ankuunga malanna asonei, “Nannaam mah i loua iinve,

²⁸alamva mah i mii chahchah anlehta ipnatu akluung trongirhnavaa kei kithiisa.

²⁹Keiin nankuungah kitihchou, kipavaa kurung ramma nannihsoh inruuia akthar iinphu i iinjounatu amah aknikha athlengnohmiil, mah nganglirah atuii i keiva veikhat iinnoh usang.”

³⁰Che anmah in laatloh a, chorphol muulla sehsei.

³¹Chunna Jisu in ankuungah asonei, “Mi in khulouh keirella nannih nannaamte vaisi vei usachou; alamva mah i injihchesa, ‘Keiin sadamkemta kamrattu, che sadamte loom in inthek invorhtuei.’

³²Chuta keita kamringche aknua, nannih nanmaa a keiin Kalili a lousehtung.”

³³Pitar in akuungah ason, “Anmah annaamte in nangrella vaisi vei seilakho, keiva tiknikho kivaisi suuknohtung.”

³⁴Jisu in akuungah ason, “Keiin nikuungah tak a kisonche; mi in khulouh aarkhong in ankhuungnoh amaa a, nangin keita veithumkhek kandah uche.”

³⁵Pitar in akuungah ason, “Keiin nangsoh inruuia thijou samelakho, keiinva nangta nandahnohtung.” Mahchunanga aroi annaam inkho ansonpei.

³⁶Cheva Ketsemani antih amunna Jisu in aroisoh sehjousei, che aroi ankuungah asonei, “Kei ousonna vaa a kingenlai, onna louamve.”

³⁷Che amahsoh inruuijoua Pitar leh Jebidi asa kupa innihta asehpiei, cheva aril lah a inlaang amthronpei.

³⁸Mahlai anmah kuunga asonei, “Kei kikli i thih ajaphah a khalmo klahsang; onna louamve, keisoh inruuia doujouve.”

³⁹Che amaatonga ste avache akhuptlop a intolh a angenpei, “Pa o mah i vei ajaleva kei kuungnata kuchai i keilourosa; chuta keiin kimdon veinoh a, nangin nimdon veiso.”

⁴⁰Che aroi ankuungah athlenglai anmahva inna louam aphah ei, che Pitar kuungah ason, “Nannih in keisoh inruuia pungkhatruva doucheknoh choume?

⁴¹Nannih in madoina a nanluutnoh natu doutrangve; li inva amdonta ruung inva marnopsachou.”

⁴²Khatla veinih tihpitu veia seh a angenla, “Pa o, keiin mah kuchainata iinnoh angkleva, mah i ralcheknohtung, nangin nimdon veiso.”

⁴³Che veikhatla athlengin anmah in inna louam antuukpiei, alamva anmahva khalmo an ihmu thonoh a anmit klahsei.

⁴⁴Chela khatla anmahta amah eiche seh a matsah angenna trongsoh intrimma, veithum tihpi veia angen.

⁴⁵Cheva aroi ankuungah thlenga asonei, “Nannih pekphah inna ammang choume? Anve, pungi innaisa, miivaa Asa kupata aleh am ankut ah ajurhpei.

⁴⁶Inthouvesa, seh raseio, anve, keita kamlansam miikha inihkuung innaisa.”

⁴⁷Jisu in tronga amlai, somleinih ankaarna inkhat Judas in akthloi thiimpu eisoh mahche miivaa anparuul tingnasoh chemsei leh sung choia miitam amahsoh thlengsei.

⁴⁸Pekva amahta akjuurin anmah kuungah daangkhat malanna asonei; “Keiin abing kimchohsam mii khasa, amahta suurve.”

⁴⁹Kak hanga amah in Jisu kuungah ason, “Akpu kimthruunche!” Che amah abingta amchohpei.

⁵⁰Jisu in amah kuungah ason, “Ruullo, onna jangtlohtu thlengcheme?” Mahlaia thlenga anmah ankuttal in Jisu ta ansuurpei.

⁵¹Cheva anve, Jisu soh inruui ankaarna khatin chemsei akjuukche, thiimpu aklok roijuihta atuk inva amkuurta apheklokpei.

⁵²Mahlai Jisu in amah kuungah ason, “Nang chemseikha akhumsuungah thunro, alamva chemchoi mii in chemma maangtuei.

⁵³Ringraan lijan somleinih ralla kikomma pektal mathlahnatu keiin Pa kuungah nihcheknoh tuta nimdonme?

⁵⁴Mahchuta mainanga tlohmeleva ringjih in mah i nga tloh a suuktuta asonkha khatloh a tlungume.”

⁵⁵Mah pungtal chunna Jisu in miitamta asonei, “Inruraan aksuinanga chemsei mahche sungsoh inruuia keita keisuureita thleng sachoume? Anirel Ringpu mathruunna thlaamma matheih a inbok a kiamlaiva keisuurnoh choua,

⁵⁶chuta mah naamte i ringraanei ringjihta atlungnatu suuksa.” Cheva aroi naamtein amahta mathlah a tlaankirsei.

⁵⁷Mahlai Jisu ta aksuur raalmii eiin ringjih lulok mahche anparuul annaam anbomna a Thiimpu aklok Keipha kuungah Jisu ta anphurhpei.

⁵⁸Chuta Pitar invah Thiimpu aklok innmai phah Jisu ta inlabep a aknu ajuih mahche asuung luut a khakha suuk umeta annatu amah in santri eisoh inbok a akbirh.

⁵⁹Pek akthloi Thiimpu leh jama annaamtea Jisu ta thatnatu chimnoh sakhi anjonpei,

⁶⁰chuta chimnoh sakhi khalmo thlengslakho, anmah in jakhatkho tuuk cheknoh ei, Juktoolla mii innih in thlenga,

⁶¹“Keiin Ringpu mathruunna thlaam i kikthritche, nijanthum suunga tloh kichektu” tih a amah mii in ason.

⁶²Che Thiimpu aklok in inthoua amah kuungah ason, “Nangin jakhatkho masangnoh ucheme? Nang nichunga anmah in sakhi anmailan i jarelname?”

⁶³Chuta Jisu invah rimta amsa. Mahche Thiimpu aklok in amah kuungah ansonla, “Ringpu Asa kupa Khrista kha nangche, nangnohche nisonnatu akring Ringpu minga suitasoh inruuia trong kiruiche.”

⁶⁴Jisu in amah kuungah ason, “Nangin nisonluungpei, chuta keiin nikuungah kisonche, mah i aknua miivaa Asa kupa in amtik liin akchangah inbok mahche ringram sumphai chungah thleng nannih in nanmuhtu.”

⁶⁵Mahlai Thiimpu aklok in anluut insuulta akthritche atih, “Amah in Ringpu usitnoh a trongsa. Maiche aktlei sakhi darkaar ammangme? Amah in Ringpu ta usitnoh a trongkha nantheihpei.

⁶⁶Nannihva kha namidonme?” Anmah in amisang, “Amah i thituru.”

⁶⁷Cheva amah amaia amichil, anhai che arouin anbeeng.

⁶⁸Mahche antih, “Khrista o, tunang in nanhaime kaniphoongro?”

⁶⁹Pek Pitar in innmaia inbok a am. Mahcheva rungaak khat in thlenga amahkuunga ason, “Nangkho Kalili na Jisu soh inruuijou miinoh cheme?”

⁷⁰Chuta anmah kuungah indah a ason “Mah nisonkha jangnitihname romnoh ang khame?”

⁷¹Mahche innmuk ah anthruhlai aktlei rungaak khatin amahta amuh a mah khanna ak am ankuunga asonei, “Mahmii i Najareth na Jisu soh inruuijou khare.”

⁷²Chunna amah in suita tloh a “Keiin mahmii i romnohluung ang” tiha indahsa.

⁷³Kak amche amahta akrom eiin thlenga amah kuungah anson, “Tak a nangkho anmah ankaarnahche, alamva nang niroolhou in inromche.”

⁷⁴Mahlai chunna, “Mahmii i keiva romnohluung ang” tih a akroua phool inpea che suita tloh a inso amthronpei. Mah laitalla aarkhong in inkhuungsa.

⁷⁵Mahcheva “Aarkhong in ankhuungnoh amaa a, nangin keita veithumkhek kandah uche” ta Jisu in amahkuunga ason trongkha Pitar in intheihsa. Mahcheva apaalla inthruh a aril sok a trapsa.