Read Tarao Naga METHIU 27 Bible Online

METHIU 27 - Tarao Naga bible

METHIU 27

¹Juktiing asuuk in, akthloi Thiimpu annaam leh miivaa anparuul eiin Jisu ta thatnatu intelsei;

²amahta ankhitche rampuui kuungah anmilanpei.

³Jisu ta amlan Juda in mahmii i amaraal amnohmii kamlanpeita arompeia, aril athlenga, harngou baobeh sopthumta akthloi Thiimpu leh anparuul ankuunga veikhat thlenna asonei,

⁴“Keiin amaraal amnoh thiita kimlaalli alehsang.” Anmah in anson, “Mahkha kanthlou ammangme? Mahkha nitak nikroua romrosa.”

⁵Cheva Ringpu mathruunna thlaamma amah in harngou inbaobehta lonna amahche inthruhsa; mahche seh a rui inthoia thisa.

⁶Chuta akthloi Thiimpu in baobehta anlohche anson “Mah i akseeng baobeh sihna thlaamma sihmele trongsuur in jaonoh, alamva mah i miithii aman.”

⁷Chunna anmah in intella, rapkheimii phuumnatu beel loupuk tih a amah baobeh chunna ramchuta anleipei.

⁸Ohchurella mah loupukchu pekphah thiivaa loupuk antihpei.

⁹Churella Israel ste in mah chuvah aman ngirhna chaang nujuih a, harngou sopthumta anlohpei,

¹⁰“Che Akpu in keita alam kamtheih nanga anmah in beel loupuk amanturella mahchuta amilanpei” ta ringraan Jeremiah in asonkha mahlaichun atlungna veisa.

¹¹Pek Jisu in rampuui kuungah ngirsa; che rampuui in amahta trong arui, “Nangi Judiei kurung cheme?” Jisu in amsang, “Nangin nisonkhasa.”

¹²Khattingla akthloi Thiimpu leh anparuul eiin amahta lonna antronglai atakin jakkatkho masangnohsa.

¹³Mahlai Pilat in amahta ason, “Anmah in nichungah sakhi khalmo amilanni theihnoh cheme?”

¹⁴Chuta amah in akuungah jakhatkho masangnoh luungsa, mahchunna rampuui in khalmo salungkhousa.

¹⁵Buhdoon niah miitam in andit nujuih a rampuui in mii khatkhat simnata mathlah i tloh a thleng.

¹⁶Mahlai thranoh tloh ah akmingseh Barabbas an ong mii khat simma thunna ansih.

¹⁷Miitam inchunlai Pilat in ankuunga asonei, “Nannih turella tunangta mathlahro nantih angme, Barabbas tameh chunoh a Khrista an ong Jisu tameh?”

¹⁸Alamva amahta ak andah eiin keikuungah anthlenpeita amah in arom.

¹⁹Amah in phompii ah anboklai, amah akmei tingnata trong thlenga, “Akchimlamseh mii i achungah nangin jakhatkho tlohnohro, alamva mahmii irella khulouh kikmanga khalmo klah kphah.”

²⁰Akthloi Thiimpu mahche anparuulei inva Barabbas ta mathlahnatu nihkanga Jisu ta thatnatu miitamta amisoh.

²¹Rampuui in ankuungah asonei, “Anmah innih kaara tuta mathlahro nantih angme?” Che anmah in anson, “Barabbas ta.”

²²Pilat in anmah kuungah asonei, “Chuleva Khrista an ong Jisu i keiin kha kitloh ume” Annaam in anson, “Amahta thingkharh a mathluro.”

²³Che anmah kuungah asonei, “Jarelnasame, amah in jaknang thranohthlou atlohpeime?” Chuta anmah in “Amahta thingkharh ah mathluro” ta thloithloi a ongsei.

²⁴Nga tloh a Pilat in thloui mapaang janohsa, chuta mahchu ngut a ralladom housuuk aveinanigta amuhpeia tuii loua miitam anmaikuungah akut aksilche asonei, “Mah miivaa athii irella kei kamraal jakhatkho amnoh; mah i nannih nanthlouning.”

²⁵Miitam in amisang, “Amah athii kannih kanchunga che kansa antakchunga tlaso.”

²⁶Cheva Pilat in Barabbas ta anmah turella amthlahpei, che Jisu ta tranga marat a thingkharh ah mathlunatu anmah kuungah amsilei.

²⁷Mahlai rampuuivaa raalmii in Jisu ta rampuui kool asuunga anhonche, raalmii akpul annaam Jisu kuungah inboomsei.

²⁸Cheva amah apuunsilhta anlohche in aang puunta amisilhpei.

²⁹Mahche kuling lukhumkhat sak a akangah amikhum, che akut akchanga raphalsung khat amichoih. Che amah kuungah ankhuk makamma inkhup a che manuih a anson, “Judiei kurung, nangta kimithruunche!”

³⁰Che amahta machilla, sunga akanga anhai.

³¹Anmah in aminuihche asilhpuunta liimma, amah apuunsilh saakta amisilhpei, mahche thingkharh ah mathlunatu anphurhpei.

³²Anmah in ansehlai, akming Simon an ong Sirini na kupa khatta anmah in thingkharhta mapuihnatu namma anmijapei.

³³Mahche Kolkotha amunna anthleng in (mahchu arthava luisipmun),

³⁴anmah in masingkhasoh inpool nangli atuiita a iinnatu amilan, chuta mahchu amtem in iinnohsa.

³⁵Mahche thingkharh ah amahta mathlua, anmah in rasi anna Akpu apuunta ankaara insemsei;

³⁶che anmah in ohchunna inbok a Akpu ta ngaak a amsei.

³⁷Che akangchunga amahta lonna trong injihkha antaarpei, mahchuva, “Mah i Jisu, Judiei Kurung khare.”

³⁸Mahlai chunna amahsoh inruuia inruraan mii innih, inkhat in akchangtonga, che inkhat in akveitonga thingkharh ah thirkit hemma anjampei.

³⁹Amahta vanna akseh akloon eiin ankang lek lek a injakna veia manuih a,

⁴⁰anson, “Ringpu mathruunna thlaamta thrit a nijanthum suunga akseemsam nang, nikroua inkalro khame! Nangin Ringpu vaa Asa kupa chele, thingkharh nata trumro khame.”

⁴¹Mahchunanga akthloi thiimpuei ringjih lulok khatkho anparuul eisoh amahta manuih a anson,

⁴²“Aktlei miiva akalche; atak anrouva inkahlcheknoh, amahvah Israel kurung; pek amah in thingkharh nata trumso, chunna inih in amahta malotrei,

⁴³amah in Ringpu ta amlot; Ringpu in amahta innarhle, ipek amahta kalso; alamva amah in anson, ‘Keiva Ringpu asa kupa ang.’ ”

⁴⁴Che amahsoh inruuijouva thingkharh ah thirkit hemma anjamjou inruraan inkho mahchunga innangtronga manuih a trongsei.

⁴⁵Ipek pung kuruknata ku phah a ram naamte inthimsa.

⁴⁶Che pungku atlaktumma Jisu in arool inkaanga ongsa, “Eli, Eli, lama sabakhthani” Mahchuva, “Kei Ringpu o, kei Ringpu o, keita jarella namthlah peiangme?”

⁴⁷Che amahta ak an, akmuh mii in mahchuta antheih in ansonpei, “Amah in Elijah ta aong.”

⁴⁸Cheva kak hanga anmah ankaarna khat in tlaanna spankhat loua, mahchu tuiibuh akthuur a aphuumche raphalsung apaara khit a amahta am iinnatu amlan.

⁴⁹Chuta aktlei in anson, “Inngairo, Elijah in thlenga amahta akalume anrei.”

⁵⁰Cheva Jisu in veikhatla ahou inkaanga aongche amah ali amthlahpei.

⁵¹Chunna anve, Ringpu mathruunna thlaam akseeng munna injaarpuun achungnata athlangphah innih suuk a inthrelsa; thaleikho inloksa, che lungkho koisei,

⁵²Rusuunkho inhoongsei, che ak inche akseeng anruungkho inthousei,

⁵³mahche Akpu in rusuunnata aringnua amah in rusuunnata inthruh a akseeng khuuboomma luut a miikuungah atakta ammuh ei.

⁵⁴Raalmii reijapuui leh amahsoh inruuia Jisu ta akngaak raalmii eiin, runaangnu thou khatkho mah aksuukthlouta anmuh in, khalmo intrisei, cheva atihpei, “Tak a mahmii i Ringpu vaa Asa kupasa!”

⁵⁵Kumei tam in klahbeb a anna ammei, anmahchuva Jisu ta rou aktloh Kalili nata aknu anjuih;

⁵⁶anmah ankaar a Makadalini Meri, Jems leh Joseph annu Meri, che Jebidi asa kupa vaa annuei.

⁵⁷Khulouhram aphah in Arimathia na kdoon mii khat akming Joseph atakkho Jisu aroi veiin thlengsa.

⁵⁸Amah in Pilat kuungah seh a Jisu aruungta anihpei. Mahlai Pilat in mahchuta malannatu jathang amlanpei.

⁵⁹Mahche Joseph in Jisu aruungchuta loua akthra bulapuunna tuumma,

⁶⁰amah in lungpiita viit a aseem amah atasaak akthra rusuunna mahchuta asihpei; mahche rusuun akhaar a lung inrolkhat amdolhche amahpei.

⁶¹Makadalini Meri mahche aktlei Meri in rusuun amaatalla inbok a ammei.

⁶²Tungvah nanga, mah chuvah thlouraangni aknua, akthloi thiimpu leh Pharisi eiin Pilat kuungah inchunna,

⁶³anson, “Lulok, amah miileemtheih kupa in aringlai, ‘Nithum aknua keiin rusuunnata veikhat ringtung’ ta asonkha kannih in intheih ung.

⁶⁴Mah churella nithumphah a rusuunta ngaaknatu jathang malanro, chunohleva amah aroiin thlenga amah aruungta amiriukche ‘Amah in kthinata ringsang’ ta miikuungah tong aja; mahche matsahna miileemtheih khachunga juktoolna miileemtheih in ralla thranoh vei aja.”

⁶⁵Pilat in anmah kuunga asonei, “Akngaaktu raalmii louve; seh a nannih in ansoinoh natu thra seella ngaakve.”

⁶⁶Mahchunna anmah in seh a akngaaktu raalmii eisoh lungta chum namma rusuunta thra a amingaakpei.