Read Tarao Naga METHIU 28 Bible Online

METHIU 28 - Tarao Naga bible

METHIU 28

¹Ipek sabat achesoh; kouhtu matsahni ram didata avaarsoh, Makadalini Meri mahche aktlei Meri in rusuun ak an sehsei.

²Mahche anve, runaangnu tranga thousa, alamva Akpu vaa ringroi khatin ringramnata trumma lungta amlatche, achunga inboksa.

³Amah ameelva kini inthlanang, che apuunrei in hurnanga inngou.

⁴Che rusuun akngaak in amahta trihseia inchuunsei cheva akthi miinangsei.

⁵Chuta ringroiin kumei kuungah asonei, “Intrinohve, mah chuvah thingkharh ah anthat Jisu ta nanjon ta keiin kirom.

⁶Amahvah onna amnohsa, alamva amah in ason khananga thinata ringsa. Thlenga ansihna amun i anve.

⁷Pek intha seh a amah aroi ankuunga sonvesa mah chuvah Akpu vah thinata ringsa, mahche anve, nannih nanmaa a amah in Kalili ah lousehsa; nannih in mahkhan ameelta nanmuhtu. Anve, keiin nankuungah kisonpeichou.”

⁸Mahchunna anmah in intrisoh khalmo roomthoksoh inruuia innotslamma rusuunta anmahche amah aroi ankuunga ansonnatu tlaansei.

⁹Cheva anve, Jisu in anmahta intuukpia asonei, “Doiphah veive,” cheva amahninga thlenga akehta matuh a amithruunpei.

¹⁰Mah laitalla Jisu in ankuungah asonei, “Intrinohve; seh choulaia kiuh kinaoin Kalili ah ansehnatu soneive, mah khanna keita kanmuhtung.”

¹¹Anmah in ansehlai anve, rusuun akngaak ankaarna mii ste in khuuboomma seh a aksuuk thloukhata akthloi thiimpu kuungah antongpei.

¹²Chuche anmah in anparuul eisoh inboomjoua trong intelsei, raalmii ankuunga baobeh tam malannatu

¹³anrouva intelsei, “Amah aroi in thlenga khulouh kan ihsuunga amirukpei,” ta mii kuungah sonve.

¹⁴Che mah i rampuui in theihle amah aril mathlanna nannihta klah knang nanimphahnoh natu kantlohtu.

¹⁵Nga tloh anmah in baobehta anlohche, ankuungah amitheih khananga antlohpei; che mah i Judi ankaara mi in phah ansonmang.

¹⁶Ipek aroi somleikhat in Kalili a Jisu in amtheihna muulla sehsei.

¹⁷Cheva amahta anmuh in amithruunpei; chuta arou invah chingnasei.

¹⁸Cheva Jisu in ankuungah thlenga asonei, “Ringram mahche thaleia am amtik amneh naamte keikuungah kamlan peiang.

¹⁹Churella nannih in seh choulaia jaat naamteta aroi seemve che anmahta Apavaa, Asa Kupa vaa, mahche Li Akseengvaa miinga lup eive.

²⁰Keiin trongthuun pumte kamlanchoukha, anmah in amijuihnatu matheih eive, che anve, juk achenohmiil phah a keiin nannihta lai amrel kanruuipi uchou.”