Read Tarao Naga METHIU 3 Bible Online

METHIU 3 - Tarao Naga bible

METHIU 3

¹Mahlai achunna aklup John in Judia vaa raprilla akthra trongta araan,

²“Nanril thlengve, alamva ringram kurung huunnakha innaisa.”

³Mah i ringraan Isaiah in asonmii khasa, mah chuvah nga tloh a ason, “Raprilla an ong houkhava: “Akpu turel lam machaangve, “amah alam mathluunve.”

⁴Ipek John in amah anaamma savun khapat inraak, uuksa amul puunrei asilh: che amah in raprilna khuuining leh khaota asaak.

⁵Cheva Jerusalem leh Judia apumtena che Jordon aveelna mii annaam in amahkuunga thlengsei,

⁶Che anmah anlehta phoonga Jordon avaa a amah in alupei.

⁷Chuta Pharisi leh Sadukiis jikcha in inlupnaturel amah kuungah anthlengta aloumuh ei, alousonei, “Nannih muruul vaa atute eio! Akthlengsam trihkhop malunghaang khannata nantlaannatu tunang in nanimthritme?

⁸Chunna nanril thlenga akthra akrah inrahchu veivesa,

⁹‘Kannihvaa kan pa Abraham am’ tih a nannih in madonnohve, alamva Ringpu in mah lung innata Abraham vaa atute masuuk achek tih a nankuungah kisonchou.

¹⁰Ipektalkho thingi akjungah reii aha tlasamma am, chunna akrah thranoh thing anaamteta tangkirra meia alontu.

¹¹“Nannih nanril nanthlengrella, keiin kiluppeichou, chuta kei kiknua akthlengsam amahvah keichunga atuui am, keivah amah akehkhraang choikho kimtik amnoh; amah invah Li Akseeng leh meia naniluptu.

¹²Amah akut ah mathrahna kulei am, che amah aruimunna amthrahche kihuta atomsuungah abuntu, chuta aksiva thinohluunga intruunga amna meikhura athlaaktu.”

¹³Jisu in Kalili nata Jordon na John kuungah inlupnatu thlengsa.

¹⁴Mahchuta John in indah a alouson, “Keidomta nangin naklup tupot angta, keikuungah thleng sacheme?”

¹⁵Chunna Jisu in akuungah amsang, “Pekva ajana veisaso, alamva akchimlamseh naamteta mathlungna veia mah i inih turelnasa.” Cheva John in aloujapei.

¹⁶Che Jisu in inlup a, tuiinata anthruh dolhsoh, kak hanga ringram inhoongsa che Ringpu vaa Li in ukthru nanga trumsa, che achunga kvaara amuhpei;

¹⁷che ringramnata hou inkhat in ason, “Mah i keiin kirilvol Kisa kupasa, amahkuunga kiril pelsang.”