Read Tarao Naga METHIU 5 Bible Online

METHIU 5 - Tarao Naga bible

METHIU 5

¹Jisu in miitam inboom amuhlai muul khatchunga kalsa, che amah in anbok in, aroikho amahkuunga thlengsei.

²Cheva amah in ankuunga matheih amthronpei:

³“Doiphah eikha Li ah anran miikhasei, alamva ringram huunnakha anmah anta.

⁴“Doiphah eikha marhuui miikhasei, alamva anmahta amthlantuei.

⁵“Doipha eikha inruruh miikhasei, alamva anmah in thaleiram anphahtu.

⁶“Doiphah eikha akchimlamseh rella traamkraal akphah miikhasei, alamva anmahta amvahtuei.

⁷“Doiphah eikha rilvoltheih miikhasei, alamva anmah in Ringpu rilvol anphahtu.

⁸“Doiphah eikha ril akseeng miikhasei, alamva anmah in Ringpu anmuhtu.

⁹“Doiphah eikha leh oi akthlenmii khasei, alamva anmahta Ringpu vaa asa ih a aongtuei.

¹⁰“Doiphah eikha akchimlamseh relna anchut miikhasei, alamva ringram huunnakha anmah antasa.

¹¹“Doiphah eikha kei turella mii in bilam anaamtea machimnoh janoh a thranoh amithlakche saal raanna anchut miikhasei.

¹²Roomthok a tlan veive, alamva ringramma nannih nankhaan khalmo liin, oinanga nannih nanmaa a anmah in ringraan eita anchutei.”

¹³“Nannihva thaleiramtu machih sachou, chuta machih in a alnohsale, khatloh a a alnatu itloh ume? Jakhatkho athratna amnohsa, chuta ilonche ikeh a ichuun uningsa.

¹⁴“Nannihva tukleiramtu akvaarchou, muul inkhatchunga anseem khuuboom inthup janoh.

¹⁵Tunangkhat inkho mitton ataarche luktoong makhumma sinohme, chuta ataarna chunga ithongche innsuung apumtea amvaar.

¹⁶Mahchunanga, nannihva akvaarkha aktlei miikuung akho vaarso, chunna anmah in nannihva akthrata muh a ringramma am nanpa in paarthratna veiso.”

¹⁷“Moses trongsuur nohle Ringpu trong akson ringraan antrongta ammaang thleng tih a kamdonnohve, keiva ammaang thlengnoh ang, chuta amthlung thlengsang.

¹⁸Alamva, ringram mahche thalei amaang nohmiil Moses trongsuurnata tikta ansun nohle thretta ankai alip anaamte atlungnohmiil maangnoh tuta keiin nannihta taktak a kisonchou.

¹⁹Mairella tunangkhat in trongthuun akaarnata andihrem inkhatta khoia mahchunang mii ninga amtheih amahta ringram kurung huunna a andihrem tih a aongusa. Chuta tunangkhat in majuih a miita matheihle ringramna amahta anrolrem tih a aongusa.

²⁰Nannih in akchimlamseh nanveiche Moses trongsuur lulok leh Pharisi ei akchimlamseh ta ralnoh chouleva nannih in ringramma luutnohluung uchouta kisonchou.”

²¹“Nangin mii thatnohve chuta tunangkhat in mii thatle pichaarnia amahvah thihnaringna veitu ta leithingnata anson nantheihpei.

²²Chulata tunangkhat in auh anaota biklam tihleva jama pichaara thihnaringna veitu tlasa, che tunangkhatta mongo tihleva repnanga thihnaringna aphahtuta nankuunga kisonpeichou.

²³Chunna nangin thiilla nikatphu kutthol nithlenlai niuhnao khat in nikuunga ajanoh intheihchele,

²⁴nikattuphu kuttholkha thiilkuung amaia nimahche inlengmanna niuhnaosoh injamanro. Che thlenga nang kuttholkha katro.

²⁵Niandah miisoh inruuia lamma nansehlai intha a inchamve, chunohleva amah in nangta pichaarpu kuunga namthruhtu. Chuleva pichaar Akpu in nangta jama ankuunga masilla simma niluutna veitu.

²⁶Keiin nankuunga tak a kitihchou, nannih in achena namilan tuphu baobeh nansiin nohmiil mah khannata inthruhnoh uchou.”

²⁷“Nannih in miimei miisa laalnohve tih i leithingnata nantheihpei.

²⁸Chuta tunangkhat in kumei khatta dia anleva arilsuunga amahmii khasoh inlaalthlou atlohpei.

²⁹Chunna nikchangna mit in nangta aleh ah nakthlakle kholla lonro, alamva nitak apumteta repnangah nakthlakpi ngutva nitakna akhol inkhat amnoh in nichuungna veitu.

³⁰Che nikchang kut in nangta aleh ah nakthlakle, tanna lonro, alamva nitak pumte repnanga nakthlakpi ngutva nitakna akhol inkhat amnoh in nangtu nichuungna veitu.”

³¹“Maichung lakho anson am, ‘Tunangkhat in akmeita inthrekpi leva anthrekpina anjih rai malanso.’

³²Chuta kumei kupa laalthlou nanoh a tunangkhat akmei inthrekpi miiva akral amsal amvei, che tunangkhat in anthrekpi kumeita changvaangle kumei laalthlou atlohpeita nankuunga kisonchou.”

³³“Veikhatlakho nannih in leithinga anson nantheihpei, ‘Mah chuvah nangin chimnoh a suita tlohnohro, chuta nang suitakha Akpu ninga athlou veia tlohro.’

³⁴Chunna keiin nannihta kisonchou, suita tlohnoh luungve thranoh, ringramkho sonna tlohnohve, alamva Ringpu amna,

³⁵thaleikho sonna tlohnohve, alamva amah akehchuunna, Jirulalem slakho sonna tlohnohve, alamva anrol kurung ankhuuboom.

³⁶Nikang matuh a suita tlohnohve, alamva nangin sam akmol khatrukho mangou nohle mavom cheknohche.

³⁷Chuta nangin ‘Oi’ nitihkha ‘Oisa’ che nangin ‘Ah’ nitihkha ‘Ah veisa’ alamva maannata akralkhava akthranoh tingnasa.”

³⁸“ ‘Mit khatvaa angut mit inkhat, ha inkhatvaa angut aha inkhat’ tih i nantheihpei.

³⁹Chuta akthranoh miita roujanoh veta kisonchou, chunna tunangkhat in nikchangtongna nimaipi a nakbeengle khattingkho inheia roudohro.

⁴⁰Tunangkhat in nangta atuulmuk ah thlenna nilungluut ansuulta lou dile nilukphaikho malanro.

⁴¹Che tunangkhat in nangta mel inkhat senoh janoh naktihle innih tihpi melkho sehpiro.

⁴²Nangkuunga naknih miita malanro, che amah in nang ningnata apujale inlenga masiinnohro.”

⁴³“ ‘Nangin nanthringpi miita ringvolro, che niandah miita intirhro’ tih a anson nantheihpei.

⁴⁴Chuta keiinva niandah miita ringvolro, namtommii khata doi malanro, nangta nantirh miita akthra tlohro, che nangta nak antheihnoh a nakchutmii turelva ngenveta kisonchou.

⁴⁵Chuleva ringramma am nanpa vaa asa veiuchou, alamva amah in akthra leh thranoh anchunga kini amsuuk, che akchimlamseh leh akchimlamseh noh anchunga khu amsuur.

⁴⁶Alamva nangta nakringvol miikhopta ringvolchele jaknang khaan niphahtu amme? Baobeh thrai mii inkho mah chunanga tlohnoh eime?

⁴⁷Che nannih in nan uh nannaota mathruun chouleva aktlei miikuung avah akral jaknangthlou nantloh usa? Baobeh thrai miiluung inkho oinanga tlonoh eime?

⁴⁸Chunna ringramma ak am nanpa in athrat nangjimma nannih inkho akthra veive.”