Read Tarao Naga METHIU 6 Bible Online

METHIU 6 - Tarao Naga bible

METHIU 6

¹“Miimai kuunga mamuhna tukhop nannih in akthra thloutloh veinohve, chunohleva ringramma am nanpa ningnata nannihtu khaan amnoh.

²“Churella nangin daan nitlohlai sinakok leh sorok ah khuung daarnang inpaova mii in paarthra namiveinatu akthra veisin mii nanga tlohnohve, keiin nannihta tak a kitihchou, anmah ankhaan amsa.

³Chuta nangin daan nitlohlai nikchang kut in atlohkha jangmeta nikveina kut in romnohso.

⁴Chunna nangin daan nitlohkha inruktea nitloh veiso, che inruktea akmuh nanpa in indanglonga khaan nanimphahtu.”

⁵“Che nangin ningenlai, akthra veisinnang tlohnohro, alamva anmahva mii in anmuhnatu sinakok leh sorok komma ngirra ngen andit, keiin tak a kisonchou, anmah ankhaan amchesa.

⁶Chuta nangin ningenlai khumsuunga luutro che inn nikhaarche achikna khumma am nipakuunga ngenro, che inruktea nakmuh nipa in indanglonga khaan namphahtu.

⁷“Chuta nangin ningenlai Ringpu romnoh Jental ei nanga sulla inleng lenga sonnohve; alamva anmah in ansontrong jikcha mii in antheihnatu angen.

⁸Churella anmah nanga veinohve, alamva nang nidarkaarkha ningennoh maa a nanpa in aromkir.

⁹Chunna oinanga ngenve: Ringramma am kan pa, nang nikming akseeng veiso.

¹⁰Niram huunna thlengso, ringramna nangna nimdonkha thaleichung akho veiso.

¹¹Akni akninatu tol mi in kanimlanro.

¹²Che kannih kanleiman antoleita kan ip nanga, leiman kantool kani ipro.

¹³Che madoina a kantlaknoh natu kaniseh piro, chuta akthranoh nata kanithlokro, alamva nang niram kurung huunna leh nituui, che napaarthra ache amnoh. Amen.

¹⁴“Alamva nangin chimnoh aklaal miita ipchele ringramna nanpa inkho nani iptu.

¹⁵Chuta nangin chimnoh aklaal miita ipnohchele ringramna nanpa inkho nani ipnohtu.”

¹⁶“Mahchuche nangin buh nihellai akthra veisin mii nanga aklah nimeelta mamuh veinohro, alamva anmah in anmai amihuui, chunna buh kanhel tih a mii kuungah amiromna amivei, keiin nannihta atak a kitihchou, anmah ankhaanva amsa.

¹⁷Chuta nannih in buh nanhellai nanmai phih a nankang thao teive.

¹⁸Chuleva buh kanhel tih i mii kuungah mamuhnoh uchou, chuta inrukte akmuh nanpa in indanglonga khaan nanimphahtu.”

¹⁹“Veithra in saa a pat, mahche inruin khoia amirukna thaleichunga nannihtu akvei lal sinohve.

²⁰Chuta veithra in saa a pat aramnanoh, che inruin khoia amiruknanoh ringramma nannihtu akvei lal hansihve.

²¹Alamva nannih nanlal amna a nanrilkho amtu.”

²²“Ruungtu mittonvah mit, chunna mitta thrale nantak pumte akvaar in siptu.

²³Chuta nanmit in thranohle nantak apumtekho inthimchettu, inthimchet i jikchahphah liinsame!”

²⁴“Tukhat inkho Akpu innihva routloh veicheknoh, alamva amah in aktlei khatta antirhche aktlei khatta aringvoltu. Chunohle amah in inkhatta arungeihtu che aktlei khatta rungainohtu. Nannih in doonkhaal leh Ringpu ta routloh cheknoh uchou.

²⁵“Churella keiin kitihchou, nannih in nanringnatu jangnansaaktu che jangnan iintu chunohle nannih nantakturel jangisilhtuta lah tlohnohve. Nansaaktu phuleh puunrei nansilhtu phuchunga nannih nanchaan in akthloi nohme?

²⁶Marvaanna va ta anve, anmah in linkho linnoh ei, luhkho luhnoh ei, tom akho mahuunga sihnoh ei, chuta ringramna nanpa in ajokei. Anmah chungva nannih in ralla amuveinoh choume?

²⁷Tunangkhat in alah khanna ankaangnatu kiilkhat thun achekme?

²⁸Chuleva jarella nannih in puunrei rella lahchoume? Louna reita nannih in madonve anmah in thloukho tlohnoh ei, inchekho incheknoh ei.

²⁹Chuta nannihta kitihchou, Solomon in apaarthratna anaamte reipaar inkhatnanga inliingnoh.

³⁰Akirua amloteio, mi inva mah i tungva avah taploimeia inhaal tuphao Ringpu in vachah thra mapungsale, nannihvah ralthloia amah in puunrei nanimsilhnoh ume?

³¹Churel nannih in khota isaak ume? Che khota i iin ume? Chunohle khota isilh ume? tih a lah tlohnohve.

³²Mah poot anaamte ita aktlei jaat in anjon, alamva poot anaamte darkaar tih a ringramna nanpa in arom.

³³Chuta nannih in matsahremma ringram kurung huunna leh amahvaa akchimlamsehta jonmaanve che mah poot anaamte i nanidaaktu.

³⁴“Chunna tungvahna turella insuul tlohnohve alamva tungvahnatu vei avah tungvahnatu rouamsa. Akni aknitu lahna khanna inkhopna veiso.”