Read Tarao Naga METHIU 9 Bible Online

METHIU 9 - Tarao Naga bible

METHIU 9

¹Jisu in muli inkhat ah chuunga tuiiboom avanche amah khuuboomma thlengsa.

²Che anve, anmah in apangnem thi mii inkhat, tuklaia matolh a anthlen; anmah in amilotta Jisu in amuhkhan apangnem thimiita Jisu in ason, “Kisakupa, niril malumro; nang nilehkha ki ip peiche.”

³Cheva anve, ringjih lulok arouin anmahseeng seengta insonsei, “Mahmii kupa in Ringpu ta usitnoh a trongsa.”

⁴Chuta Jisu in anmah anrilta aromma asonei, “Jarelna nanrilsuunga thranoh namidonme?

⁵Alamva ‘Nang nileh ki ip peiche,’ nohle ‘Inthoua sehro’ ta sonni jaknangin aklaime?

⁶Chuta miivaa Asa kupa in thaleichunga aleh ip achekna tuui amtik nanromnatu — apangnem thimiita Jisu in ason, ‘Inthouro, nantolhnakha choia ni inna inlengrosa.’ ”

⁷Cheva amah in anthohche a inna inlengsa.

⁸Mahchuta miitamin anmuh inva, intrisei, mahche Ringpu ta paar amithratpei.

⁹Jisu in mah chunnata seh a, Methiu an ong mii khat in roi thraina phrangki thlaamma inbok a am amuhpei; che Jisu in amahta ason, “Keijuihro.” Chunna amah in inthoua aknuta ajuihpei.

¹⁰Mahchunna Jisu in Methiu inna buh asaaknatu anboklai, anve, roithrai mii eisoh che aleh am mii jikcha in thlenga Jisu aroisoh inbokjousei.

¹¹Chunna Pharisi in mahchuta anmuhlai, amah aroikuunga anson, “Jarelna nannih lulok in roithrai mii eisoh che ale am mii jikchaeisoh buh asaakjoume?”

¹²Chuta Jisu in mahchuta atheih a, anmahta asonei, “Aknanoh mii turel doktar darkaarnoh, chuta akna mii turelva darkaar.

¹³Mah artha i jangasonname seh a romve, ‘Keiin rilvolta kikdit, inkat pootta dinoh ang.’ Alamva keiin akchimlamseh miita ak ong thlengnoh ang, chuta alehchel miita ak ong thlengang.”

¹⁴Chunna John aroi in amahkuunga thlenga anson, “Kannih leh Pharisi in buh injomma kanhel, chuta nang niroiva jarelna buh helnoh eime?”

¹⁵Chunna Jisu in ankuunga asonei, “Changrisoh inruuijoua an amsootvah changri aruul in lah ajame? Chuta anmah ankuungnata changri alohnatu akni thlengumang, mahlai buh anhel umang.

¹⁶Tunangkhat inkho amlui puunta akthar puunkirra rouphohnoh ei, alamva anphohna khata dokleva anthritnakha thloia inlonga inthrittu.

¹⁷Chunohle mii in akthar tuiibuhta amlui savunthongah suunga anlousihme; chuleva tuiibuh sihna savun thongkha koia tuiibuh inleitu, che savunthong khakho maang; chuta anmah in akthar tuiibuhvah savunthong akthar a ansih che annih a thra veitu.”

¹⁸ Mahtrong ita Jisu in ankuunga sonna amsuunga, anve, rampuui inkhat in amaikuungah thlenga ason, “Kisakumei pekkhanna thisa; chuta nangin thlenga atakchunga nikut sihroba, che amah in ringtu.”

¹⁹Chunna Jisu in inthloua amahta ajuihpei, che aroi inkho amahta anjuihpei.

²⁰Cheva anve, kum somleinih thii luunga am kumei khat in amah aknua thlenga Jisu apuunpaarta apalpei;

²¹alamva “Keiin apuun paarruta pal angle, thrakhem tung,” ta arilsuunga amdon.

²²Jisu in inheia kumei khata amuh in akuunga ason, “Rungaak o, niril malumro; nangin namlot kharella nangta namthratpei.” Cheva kak hanga kumeikha thrakhemsa.

²³Che Jisu in rampuui a inna athlengin, pasi aktumleh miitam inlomma dir dirta am amuh ei,

²⁴amah in ason, “Amahta chaive; alamva amah kumei i thinoh chuta inning.” Chunna anmah in Jisu ta aminuihpei.

²⁵Chuta miitam inlomta apaalla amithruhche, amah in asuunga luut a kumeisa kutta amtuh, cheva kumeisakha inthousa.

²⁶Cheva mah aksuukha mah khanna am ramsiin apumtea seh a antongpei.

²⁷Jisu in mah chunnata asehlai, mitcho innnih in ong onga aknujuih a antih, “Devit vaa Asa kupa, kannihta niril kanimvolro!”

²⁸Chunna Jisu in innsuungah aluutlai, mitcho in akuungah thlengsei, che Jisu in asonei, “Keiin nannihta kimthrat uchouta namilotme?” Anmah in Jisu kuunga anson, “Oi Jisu.”

²⁹Chunna Jisu in anmitta palla asonei, “Nannih in namilot nujuih a nankuunga tlung veiso.”

³⁰Chunna anmit inhoongsei che Jisu in ankuunga mathrit a asonei, “Anve, tukhat kuungkho mah i tongnohve.”

³¹Chuta anmah in ohkhannata anthrushoh ram apumtea mahkhata sonna Jisu ta amithangpei.

³²Anmah in anseh laia anve, khousaar in asuur trongtheihnoh miikhatta Jisu kuung anthlen.

³³Che khousaar chuta Jisu in amnom invah, trong theinoh mii in atrong suuksa; cheva miitamin salungkhou seia antihpei, “Israel suunga oinang muhnoh mangme.”

³⁴Chuta Pharisi invah, “Khousaar akpuui kurung apaalla amah in khousaarta amnomchekning,” tih a anson.

³⁵Che Jisu in khuuboom naamte mahche khuu khuua seh a, anmah sinakok ah amtheih ei, kurung huunnavaa akthra trongta araan, che natna rii jikcha khatkho akcheknoh mii jikcha amthratei.

³⁶Amah in miitamta amuh in, anmahta arilvol hangsei, alamva akseel amnoh sadam nanga anmah in inthek invorhtlamsei.

³⁷Chunna aroita asonei, “Saang invaat tuphuva khalmo tam amsa, chuta akvaattu miivah steru ningsei;

³⁸alamchunna amah asa ang luhna ah thloutlohtu mii amthlahnatu saangluh Akpu kuungah nannih in ngenve.”