Read Tarao Naga MARK 1 Bible Online

MARK 1 - Tarao Naga bible

MARK 1

¹Ringpu Asa kupa, Jisu Khrista vaa Akthra Trong amthronna.

²Ringraan Isaiah nirik ah injih khananga, “Anro, keiin trongraanta nang nimaa a kimthlah, “amah in nilam amchaangtu;

³“raprilla inkhat in ong ahouchuva; “Akpu alam machaangve, “amah in asehnalam mathluunve.”

⁴Aklup John in raprilla thlenga alehnata ipnaturel rilthlenga lupnatu araan.

⁵Che Judia ram anaamte mahche Jerusalem na mii naamte in amah kuungah thlenga, anmah anlehta anphoong, Jordan avaa a anmahta alupei.

⁶Ipek John in uuksa amulvaa puunta asilh, che savun inraakna khapat anaamta akraak, che khaoleh raprilna khuuiningta asaak.

⁷Che amah in raanna ason, “Kei kiknua akthleng amah in keichunga akchek amneh keiral, amah akehkhraang arui keiin inluk a majak keiva kimtik amnoh.

⁸Keiin nannihta tuiia kiluppeichou, chuta amah invah nannihta Li Akseenga naniluptu?”

⁹Mah aknichunna Kalili vaa Najareth nata Jisu in thlenga amahta Jordan a John in aluppei.

¹⁰Che tuiinata anthruhsoh, kak hanga ringram inhoong amuhpei che Li in ukthru nanga amahchunga trumsa;

¹¹cheva ringramnata hou inkhat thlengsa, “Nangi keiin kamchaal Kisa kupache; nangkuunga keiin khalmo pelsang.”

¹²Kak hanga Li in amahta raprilla aphurhpei

¹³Che amahta Seitan in amdoi a raprilla nijan sopli rapril sasoh inruuia amjou, che ringroiin amahta rou antloh.

¹⁴Ipek John ta ansuurnua, Jisu in Kalili ah thlenga, Ringpu vaa Akthra Trongta raanna,

¹⁵asonei, “Lai i tlungsa, che Ringram kurung huunna i innaisa; nanril thleng choulaia, akthra trongta malotve.”

¹⁶Kalili tuiiboom apaalla asehlai, amah in Simon leh Simon anao Andriu in tuiiboomma toro denna amta amuh ei; alamva anmahva ngaman miiei,

¹⁷cheva Jisu in anmahta asonei, “Kei kiknu keijuihve che nannihta miisuur kamvei uchou.”

¹⁸Kak hanga anmah torota anmahche aknu anjuihpei

¹⁹Che ste asehche, amah in Jebedi asa kupa Jems che amah anao John in toro phoh a mulisuunga louam amuh ei.

²⁰Mahchun kak hanga anmahta aongei; che anmah in anpa Jebedita baobeh akthrulh roijuih eisoh mulisuungah anmahche, amah aknuta anjuihpei.

²¹Che anmah in Kaparnaum ah sehsei; che Sabat niah kak hanga amah in Sinakok ah luut a amtheih ei.

²²Che amah in amtheih khanna anmahvah salungkhousei, alamva ringjih lulok nangnoh a, aktloh akhal mii nanga anmahta amtheih ei.

²³Kak hanga anmah Sinakok ah akseengnoh li in anruuipi mii khat am;

²⁴cheva amah in ongsa, “Najareth na Jisu, kannihsoh jangnitlohjame? Kannihta mamaangnatu thlengcheme? Nang tucheme keiin kirom, Ringpu Akseengche.”

²⁵Chuta Jisu in amahta saalla ason, “Rimta amro, che amah ningnata inthruh rosa!”

²⁶Cheva akseengnoh li in amahta dir dirta amchuunche rool inkaanga onga amah ningnata inthruh rosa.

²⁷Che anmah naamtein salungkhousei, cheva anmah senga seeng inruia insonsei, “Mah i jangsame? Akthar matheihnasa! Akchek amnehkho jaoa amah in akseengnoh li eita jathang atloh ei, che amah in asonta amijuih.”

²⁸Che kak hanga Kalili velna ram anaam amun naamtea amah akming inthangsa.

²⁹Che kak hanga amah in Sinakok amthlahpei. Che Jems leh John soh inruuia Simon leh Andriu inna luutsei.

³⁰Ipek Simon api atlunna intolh a am, che intha a amah turella akuungah anson,

³¹cheva amah in thlenga akut matuh a, amahta amthohpei, chunna atlunkha thrasa, che anmahta rou atloh ei.

³²Mahni khulouhram kini aluutsoh, akna aksa annaam che khousaar in anruuipi eita amahkungah anthlen.

³³Che khuuboomna miinaam in innkhaar kuungah inboomsei.

³⁴Mahchunna alam tam natna rii aknaeita amah in amthratei, che khousaarta amnommei; che khousaar in antrongnatu majanoh, alamva anmah in amahta anrom.

³⁵Juktiing inranga, ram avaarnatu ste avaatlai, amah in inthoua, achikna amunkhat a asehche, ohchunna angen.

³⁶Mahchunna Simon leh amah in anruuipijou in amah aknuta anthrulh,

³⁷cheva amahta antuukpiche akuungah anson, “Kannaam in nangta kanjonche.”

³⁸Che amah in ankuungah asonei, “Inihsoh innai khuupii khuupii a sehreio, mahchunna keiin Akthra Trong kiraannatu, alamva mairella keiin thlengsang.”

³⁹Che amah in Kalili ram naamte seh a anmah Sinakok Jikcha a Akthra Trong araan che khousaar amnomei.

⁴⁰Reichii akna khatin amah kuungah thlenga, akhuk makamma ason, “Nangin nimdon veile keita namseeng chektung.”

⁴¹Amahta arilvol hanga akut jamma amahta apalche akuungah ason, “Keiin kijapei, nang seengrosa.”

⁴²Mahchunna kak hanga reichii in amahta amahpei, che atakkho seengsa.

⁴³Cheva amah in atrongnoh natu tranga asonche intha amsehpei,

⁴⁴amah kuungah ason, “Anro nangin tukhat kuunga jakhatkho sonnohro; chuta sehchelaia nitaktalta thiimpu ankuungah mamuhro, che nangta namseengpei tihrella Moses trongthuun nujuih miikuungah chim tih a namromnatu inkatphukha katro.”

⁴⁵Chuta amah in seh a amah kharelna inthupthip amnoh a, maphorhnatu trong amthronpei, mahchunna Jisu in indanglonga khuupii a veikhat luut cheknohsa, chuta apaalla amsa; che amun naamtena mii in amah kuungah thlengsei.