Read Tarao Naga MARK 10 Bible Online

MARK 10 - Tarao Naga bible

MARK 10

¹Che mahchuta amthlahche Judia aveel Jordan araalla sehsei, che miitam in veikhat inleng inlenga amahta anlomlapei; che amahtu anono veia anmahta amtheih ei.

²Che Pharisi in thlenga amahta chaang anna arui, “Trongsuur nujuih a kupakhat in akmei inthrekpi ajame?”

³Amah in ankuunga amsangei, “Moses in nankuunga jaknang trongthuun amlanme?”

⁴Anmah in amisang, “Kupakhat in rai majih a kumei inthrekpi Moses in ajapei, che amahta amnomtu.”

⁵Chuta Jisu in ankuunga asonei, “Nannih nanril in atrangrelna mah trongthuun i amjih.

⁶Chuta aseem amthron lainata, ‘Ringpu in kumei kupa aseempei.’

⁷‘Mah in alamveia kupakhat in anuleh apa mathlah a kumeisoh inchuntu,

⁸che anmah innih in ruung khalek veiusei.’ Chunna anmah in innih veijnoh a chuta ruung khalek veiusei.

⁹Chunna Ringpu in alamveia amchun ei i, mii in threknoh eiso.”

¹⁰Che aroi in mairella innsuunga veikhat akuunga anrui.

¹¹Che ankuunga asonei, “Tukhat in akmeita anthrekpiche aktlei kumei khatta changvaang leva, kumei laalthlou atlohpei;

¹²Che kumei inkho amsalta anthrekpiche aktlei kupata changvaang leva, amah inkho kupa laalthlou atlohpei.”

¹³Che naoeita amah in apalnatu; akuunga anthlen, che aroi in anmahta ansaalei.

¹⁴Chuta Jisu in mahchu amuh in amlunghaangsa, che ankuunga asonei, “Nao eikha keikuunga thlengeiso, anmahta khaamnoh eive; alamva Ringpu vaa kurung huunnakha mah naonang antasa.

¹⁵Atak a, keiin nankuunga kisonchou, tukhat in naokhat nangjimma Ringpu kurung huunnata lounoh choulevah mahchun luutnoh uchou.”

¹⁶Che naoeita akutbaanga akoneiche anchunga akut jamma doi amlanei.

¹⁷Che amah in rapkheitla ah asehnatu amthronso, kupakhat in tlaanna thleng che amaikuunga akhuk amkamche akuunga arui, “Akthra lulok, ache amnoh chaan kphahnatu keiin jangkitloh ume?”

¹⁸Che Jisu in akuunga ason, “Jarella keita akthrata nak ong angme? Tukhatkho akthra amnoh chuta Ringpu khopning.

¹⁹Nangin trongthuunkha nirom; ‘Inthatnohve, miimei miisa laalnohve, Inrunohve, Akchimnoh sakhi a ngirnohve, malei seinohve, nannu nanpata injahve.’ ”

²⁰Che amah in akuunga ason, “Lulok, keiin nao kivei lainata mah anaamte i kimjuih kirpei.”

²¹Che Jisu in akuunga a an in arilvol hangsa, che akuunga ason, “Nangin inkhat namvaatmang; seh a nangin nidoon naamtekha juurro, che anrankuunga malaneiro, che nangin ringramma doonkhaal veiuche; che thlenga kiknu keijuihro.”

²²Mahchu ason in amai inthimsa, che amah in marhuuia inlengsa; alamva amahva andoon ankhaal tam asih.

²³Che Jisu in invella a anche aroi ankuunga asonei, “Akdoonei in Ringpu kurung huunna ah luuttupot ei i khalmoa klu!”

²⁴Che amah in atrong chunna aroi in salungkhousei, chuta veikhatla Jisu in ankuunga asonei, “Naoeio, mah i jikcha phah a klume Ringpu kurung huunna a luut i!

²⁵Akdoon mii in Ringpu kurung huunna ah aluuttu ngutva kukthrimpoa uuksa in aluut in aklaitu.”

²⁶Che anmah in thloia salungkhousei, che akuunga anson, “Chuleva tunang in achaan inkal aphahchek tupotme?”

²⁷Jisu in anmahta a anche asonei, “Miiningva mahchu veinohtu, chuta Ringpu ningva mahchunoh; alamva poot anaamte Ringpu ningva veikir.”

²⁸Pitar in Jisu kuung ason amthronpei, “Anro, kannih in anaamte kanmahkirpei che nangta kanjuihpeiche.”

²⁹Jisu in asonei, “Atak a keiin nankuunga kitihchou, akthra trong rella che keiturel tukhat in a inn alou nohle auh anao nohle asar ajuur nohle anu apa nohle asa anao nohle aram amuul mathlahnoh leva,

³⁰ipek chup in tukhat in, a inn alou che auh anao che asar ajuur che asa anao che aram amuulchung klah knang athlenglai loutho cheknohle, athlengsam ache amnoh punsi a saruk reijavak phahnohtu.

³¹Che aktam matsah in juktooltu che juktool in matsahtu.”

³²Che Jerusalem a asehnatu, anmah in lamma louamsei, che Jisu va anmah anmaa a lousehsa; che anmah in salungkhousei, che akjuih eikho intrisei. Che veikhatla somleinihta inruuipia, akuunga jaknangthlou suuktume tihrella ankuunga son amthronpei.

³³Anmahta asonei, “Anve, inih in Jerusalem ting hangrasei; che miivaa Asa kupakha akthloi thiimpu leh ringjih lulok ankuunga amilantu, che anmah in amahta thatnatu amilaaltu, mahche Jental kuunga amilan usa;

³⁴che amahta amirattu, anthattu; mahchuche nithum aknua amah in veikhat ringtu.”

³⁵Jebedi asa kupa Jems leh John in akuunga thlenga anson, “Lulok, kannih in kanditpot nangta kamitlohja hangche.”

³⁶Che amah in ankuunga asonei, “Nannih turella jangthlouta namitlohja sangme?”

³⁷Che anmah in anson, “Nangin paarthra niveilaia, inkhat in nikchangtonga che inkhat in nikveitonga, inboknatu kanijaro.”

³⁸Chuta Jisu in ankuunga asonei, “Nannih in jangthlouta nanruiangme tihkho romnohchou, keiin ki iinna chapla a nannih in iin nanchek ume, nohle keiin tuii kinlupna khanna nannih in inlup nanchek ume?”

³⁹Che anmah in akuunga anson, “Kanchektu.” Che Jisu in ankuunga asonei, “Keiin ki iinna chapla a nannihkho nan iintu; che keiin kinlupna akhanna nannihkho inlup uchou;

⁴⁰chuta kikveitong nohle kikchangtong inbokva keiin kamlantu phunoh, chuta maiva anmah turelna machaangche a asih antasa.”

⁴¹Che som in mahchuta antheih lai, Jems leh John ankuunga saal amithronpei.

⁴²Che Jisu in anmahta akuunga aongeiche atih ei, “Nannih in mahchu nanrom tukhat in Jental akpuchunga paaltangta paallei, che anmah akliin mii in akchek amneh thlou anchuunga antloh.

⁴³Chuta mahchu nankaar avah veinohtu; chuta tukhat in anrol aveijale nannih roijuih veitu,

⁴⁴che tukhat in nankaar a matsahremtang tihle nannaamtu roijuih roithaang veitu.

⁴⁵Alamva miivaa Asa kupa in amahta rou antlohnatu thlengnoh chuta amah in miita rou atlohnatu, che amah punsita malanna miita thloknatu thlengsa.”

⁴⁶Che anmah in Jerikho a thlengsei, mahcheva miitam leh aroisoh inruuia Jerikho mathlah a ansehsuunga, Timias asa kupa Bartimias mitcho, doh a aksaa mii in lamkomma a inbok a am.

⁴⁷Che amah in Najareth na Jisu tih a atheih in, trap a ongsa che ason, “Davit vaa Asa kupa, Jisu, keita niril kamvolro!”

⁴⁸Che amah in rimta a amnatu ansaalpei; chuta ral ralla ongsa, “Devit vaa Asa kupa, keita niril kamlvolro!”

⁴⁹Che Jisu in inngaia ason, “Amahta ongve.” Che anmah in mitchota an ongpei; che akuunga anson, “Niril lahnohro; inthouro, amah in nangta nak onga am.”

⁵⁰Che apuunta alonche chongsa che Jisu kuunga thlengsa.

⁵¹Che Jisu in akuunga ason, “Keiin nang turella jangnimtlohja angme?” Mitcho in akuunga ason, “Lulok, keiin kimuhjasa.”

⁵²Che Jisu in akuunga ason, “Sehrosa; nangin namlotrella nangta namthratpei.” Che kak hanga amah in amuhpei che lamma amahta ajuihveipei.