Read Tarao Naga MARK 13 Bible Online

MARK 13 - Tarao Naga bible

MARK 13

¹Che amah in mathruunna thlaamnata anthruh in, aroi inkhat in akuunga ason, “Anro, Lulok, jikcha phah a salungkhouna lung mahche jikcha phah a salungkhouna veia anseem innmeio!”

²Che Jisu in akuunga ason, “Nangin mah liinna anseem inni nimuh eime? Lung inkhat in inkhatchunga khalekho inthoongnoh a athlanga inpilkir umang.”

³Che amah in mathruunna thlaamtonga amaingat a chorophol muulla inbok a amlaia, Pitar, Jems, John mahche Andriu in amahkuunga inruktea anrui,

⁴“Kanisonro mahchu tik a suuk ume, che mah thlou naamte atlungna tupot i jaknang daang ah inromna vei ume?”

⁵Chunna Jisu in ankuunga son amthronpei, “Tukhat inkho nannihta inhea nanimruui noh natu cheksilve.

⁶Kei i amah khasang tih a kikminga miitam thlengtuei, mah i antihtu, che anmah in inhea miitam nanimruuitu.

⁷Che nannih in raal khatkho raalhou nantheih laia, nanril malah a inchoinohve, mah i inlitnoh a thlengtu, chuta achenavah nohmang.

⁸Alamva ramboom khatleh ramboom khat in andah tuei, che kurung huunna khatleh kurung huunna khat in andah tuei; amun aje jea runaangnu thoutu, mahche buhchaal suuktu; chuta naopok in klah kanang aphahnanga mah naamte i suuk usa.

⁹“Chuta nanroua cheksilve; alamva anmah in nannihta jama ankuunga nanimlantu; che nannihta sinakok ah nanimrattu; mahche nannih in keirella rampuui leh kurung anmaikuunga ngir uchou, anmah anmaikunga sakhi namilantu.

¹⁰Che Akthra Trongi ramboom anaamtea matsah a inlitnoh a inraantu.

¹¹Che anmah in nannihta chaang naniannatu mahche nanimlannatu nanithlenlaia, nannih in jangkison umeta matsah a inhalnohve; chuta mah pungchun nankuunga nanimlankha trong paningve, alamva mahlaichun nannih in trongnoh uchou, chuta Li Akseeng in trongtu.

¹²Che unaoin unaota mahche apa in asata thihnatu amlantu, che ansa in annu anpachunga andah tuei che anmah in inthat tuei;

¹³Mii naamtein keiming rella nannihta nantirh tuei, chuta tukhat in achena phah a akdouchek mii in inkal aphahtu.”

¹⁴“Che kmaang krem trihkhop ngirhnaphunoh amunta nannih in nanmuh laia (akpaa in louthei eiso). Chuche Judia a ak am ei in muulla tlaaneiso;

¹⁵innchunga ak am in trumnoh eiso, jangmekhat slakho louva atlaannatu innsungakho luutnoh eiso;

¹⁶louvah ak am inkho puunrei lohnatu inlengnoh eiso.

¹⁷Che mahlaichun nao inpooi mahche naoroiei turelva lahnasa a!

¹⁸Mah i phalbia asuuknoh natu ngenve.

¹⁹Alamva Ringpu in tukleiram seem amthron lainata pekphah aksuuknoh klah knang suuktu, che aknu avah suukho suuknoh usa.

²⁰Che Akpu in aknikhata machomnoh leva, tukhatkho inkal cheknohtu; chuta amah in charra akdommii iturella, amah in aknichu amchomtu.

²¹Chunna tukhat in nankuunga, ‘Anve, onna Khrista am!’ nohle, ‘Anve, ohkhanna amah amsa!’ Nannih in mahchu malotnohve.

²²Chimnoh Khrista leh chimnoh ringraan thlengtuei che daang leh salungkhouna jikcha nanimmuhtuei, jaleva achar miiluungta chimnohtinga aphurhtu.

²³Chuta cheksilve, keiin thlou anaamte matsah a kisonpeichou.”

²⁴“Chuta mah aknichun, klah knang aknua, kini in inthimtu, che thla in amah avaarkha malannohtu,

²⁵che ringramna arsi in triltuei, mahche ringramna atuui inloktu.

²⁶Chunna nannih in miivaa Asa kupa in paarthra leh akliin tuuisoh inruuia sumphaia thleng nanmuhtu.

²⁷Chunna amah in ringroi amthlahtu, thliraang akiing manli nata, thalei adongna khatnata ringram achena phah a amah in acharmiita amchuntu.”

²⁸“Thotthingata para veia nanromnatu nanimtheihkha romve: abaak in intha a annouche abur suun, mahchun nannih in suurjai naisa ta nanrom.

²⁹Mahchunanga, thlou anaamte i suuk nanmuh laia, amah i innaia phalkuunga amsa ta nannih in nanrom.

³⁰Atak a, keiin kisonchou, thlou annamte i matsah a asuuknohmiil mah ringnatluun i maangnoh umangtu.

³¹Ringram leh thaleiva maangtu, chuta kei kitrongva tikniakho maangnoh luungtu.”

³²“Chuta mah aknichu nohle pungchu tukhat inkho romnoh, ringramna ringroi inkho romnoh ei, Asa kupa inkho romnoh, chuta Apa akrouin aromning

³³Cheksilve, heithriil theihve; alamva nannih in laichu tik a thlengtu romnoh uchou.

³⁴Mah i kupakhat in rapkheitla ah seh nangjim, amah in inn amthlahltumma roijuihta angut masilla, anmah anthlou nujuih a, che thong angaakta heithriiltheih anveinatu jathang amlanei.

³⁵Heithriilla amve, alamva khulouhramma, nohle jaanjaia, nohle aar ankhuung laia, nohle juktiinga nohle innpuin tik a thlengtu nannih in romnoh uchou

³⁶Chunohleva amah in kak hanga athlenglai nannihta inkhemma am nanituuktu.

³⁷Che keiin nannaamta kisonchou: heithriil theihve.”