Read Tarao Naga MARK 15 Bible Online

MARK 15 - Tarao Naga bible

MARK 15

¹Che anrang juktiingpia akthloi thiimpu ei, ringjih lulok ei, anparuul ei in inruuia jama annaamsoh trong intelsei; che Pilat kuunga masilnatu anphurhpei.

²Che Pilat in akuunga arui, “Nangi Judi eikuruung cheme?” Chunna amah in akuunga amsang, “Nangin nisonpei.”

³Che akthloi thiimpu ei in amahta janoh a maraal khalmo amithlak.

⁴Che Pilat in veikhat aruilapei, “Nangin namsangtu amnohsame? Anro, anmah in nangta nakjanoh a nichunga maraal jikcha namthlak ei.”

⁵Chuta Jisu in masangnoh luungsa, mahchunna Pilat in salungkhousa.

⁶Ipekva ujouhoong amipaangrel mii in annih nujuih a simma am mii khat amithlahtrang.

⁷Ramboomta akjanoh, simma am miithat miisun ankaarna akming Barabbas kupakhat am.

⁸Che miitam in anthlengche Pilat in atlohnanga ankuunga atlohnatu trongrui amthronpei.

⁹Che amah in ankuunga amsangei, “Nannih turella Judi ei kurungta mathlahnatu nannih angme?”

¹⁰Alamva akthloi thiimpu in kallak eia amahkuunga amisilta amah in arom.

¹¹Chuta anmah turella Barabbas ta mathlahnatu akthloi thiimpu ei in miitamta anchok ei.

¹²Che Pilat in veikhat ankuunga asonei, “Chunna nannih in Judi eikuruungta nan ong mii akuunga keiin jangkitloh ume?”

¹³Che anmah in veikhat tranga onga, “Amahta mathluve.”

¹⁴Che Pilat in ankuunga ason, “Jarella, jaknang thranoh atloh relname?” Chuta anmah in “Amahta mathluve” ta ral ralla ongsei

¹⁵Cheva Pilat in miitamta anpelna turella, Barabbas ta mathlah a; Jisu ta maratnatu che mathlunatu anmahta amlanpei ei.

¹⁶Cheva raalmii in amahta kurungkool asuunga anhoongpipei (mahchu, pretorian antih); che anmah in raalmii apumteta an ongpei.

¹⁷Amahta bukal amchu lungluut amisilh, che akanga kuling lukhum amikhum.

¹⁸Che amahta injah amithronpei, “Soot ringso, Judi ei kurung!”

¹⁹Che anmah in akanga sungah marat amithronpei, amaia amichil, ankhuk makamma amahta injah amimuh.

²⁰Anmah in aminuihche, bukal amchu lungluutta anliimche amah ataksak lungluutta amisilhlapei, cheva amahta mathlunatu anphurhpei.

²¹Che anmah in lamma antuukpi Sairini na Simon, ramboom nata akthleng, Alekjendar leh Ruphas anpata, namma thingkharh amiphurhpei.

²²Che anmah in Kolkotha ah amahta anthlengpipei (Mahchu arthava kangruh amun).

²³Che anmah in tuiibuh leh amrimtui thao mairh mapoolla akuunga amilan; chuta amah in mahchu iinnohsa.

²⁴Che amahta amithlupei, che anmah in rasi chaang anna veia amah puunreita tutu in chang umeta anromnatu ankaar a insemsei.

²⁵Amahta amithlu laichun pung inthum tlasa.

²⁶Che amahta janoh a majih a antaarva, “Judi ei Kurung” ta anpa.

²⁷Che anmah in inrumii innih amahsoh inruuia amithlupei, inkhat in akchangtonga mahche khat in akveitonga.

²⁸Ringjih in asonkha atlungnasa mahchuva, “Amahta alehchel ankaar a ateenpipei.”

²⁹Che amahta vanna akseh ei in akuunga manuih a, che ankang lek a anson, “Khasa! Nangin mathruunna thlaamta nikthritche nithumma kitlohtuta nisontamo,

³⁰nikroua inkalrosa, che thingkharh nata trumrosa!”

³¹Cheva akthloi thiimpu leh ringjih lulok eiin khatleh khat in amahta manuih a anson, “Amah in aktleiva akalche; akrou avah inkal cheknohsa.

³²Khrista, Israel va kurung, thingkharh nata ipektalla trumrosa, mahche kannihkho nakmuh a namlot tasung.”

³³Che pung kuruk atlak lainata ram apumtea pungku phah inthimchetsa.

³⁴Che pungku atlak in Jisu in ongsa, “Eloi, Eloi lama sabakhthani?” Mahchuva, “Kei Ringpu o, kei Ringpu o, jarella keita namthlah peiangme?”

³⁵Mahchunna akseh akloon arouin mahchuta anthleih a anson, “Anve, amah in Elaijah ta aong,”

³⁶Che mii inkhat in tlaanna putsia tuiibuh aphuumche, thing apaara khit a amah in a iinnatu amlan, che amah in ason, “Elaijah in athlengche amahta louva amthrumme anrei.”

³⁷Che Jisu in tranga an ongche amah akphuk dongsa.

³⁸Cheva mathruunna thlaamma anjaarpuun arelnata athlangphah innih suuk a inthrelsa.

³⁹Che amahsoh amaingat a akngir, raalmii reijapuui in amah akphuk dongchu amuh in ason, “Atak a, mahmii i Ringpu vaa Asa kupa reo!”

⁴⁰Mahchun kumei ei inkho inlabeb a anna amsei, anmah ankaar a Meri Makadalini leh Meri Jems anuleh anao Joses khatkho Solomi kho injaosei,

⁴¹amah in Kalili a amlai amahta anjuih, che rou antloh; mahche aktlei tam inkho Jerusalem a amahsoh inruuijoua thlengjousei.

⁴²Che khulouhram aphah in, mahchu sabatni athlengnoh maa a, inchaangna akni veisa,

⁴³Arimathia Joseph, trongtloh ankaar a injahna vei, ataktal in Ringpu kurung huunnata jonna ak am in aril inthok hanga Pilat ninga sehsa, che amah in Jisu aruungta lohnatu anihpei.

⁴⁴Che Pilat in thi sameta salungkhousa; che amah in raalmii reijapuuita, amah in athina sootsme ta aruipei.

⁴⁵Che amah in raalmii reijapuui kuungnata aromche, amah aruungchu Joseph in alohnatu amjapei.

⁴⁶Che amah in bulapuun aleiche, amahta thingkharh nata amthrumpei, bulapuun khanna atuumpei, lungpiita khurh a anseem rusuunna amahta amitolhpei; che rusuun akhaarta lunga amikhumpei.

⁴⁷Meri Makadalini leh Joses anu Meri in ramma amitolhme ta anmuhpei.